ປີໃໝ່ໄລ່ປາບຄົນໂກງ
ທິດກໍ່າ:
ໃນວາລະກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ທີ່ຫາກໍຈົບລົງໃນຕົ້ນເດືອນທັນວາ 2019 ມານີ້, ມີຫລາຍບັນຫາທີ່ສ້າງຄວາມສົນໃຈແກ່ມວນຊົນຊາວລາວ ແລະ ຕ່າງຊາດບໍ່ໜ້ອຍ, ໜຶ່ງໃນທີ່ເດັດກໍແມ່ນການປະກອບຄຳເຫັນຂອງບັນດາຜູ້ແທນທີ່ຕາງໜ້າໃຫ້ປະຊາຊົນແຕ່ລະເຂດເລືອກຕັ້ງ. ທ່ານ ສາຍທອງ ແກ້ວດວງດີ ໄດ້ມີຄຳເຫັນສະເໜີຕໍ່ທີ່ປະຊຸມສະພາວ່າ: ປະຊາຊົນເຮົາໄດ້ເລີ່ມຕື່ນຕົວປະຕິບັດຕົວບົດກົດໝາຍ ໂດຍສະເພາະແມ່ນພາກັນເສຍພາສີ, ເສຍພັນທະອາກອນຕ່າງໆໃຫ້ລັດຕາມສິດ ແລະ ພັນທະຂອງຕົນ, ແຕ່ເມື່ອເສຍໄປແລ້ວ ພະນັກງານລັດຂັ້ນກາງ ຄືຂັ້ນເມືອງ, ຂັ້ນແຂວງ, ຂັ້ນກະຊວງທະບວງກົມ ຫລື ຂອດລະຫວ່າງກາງ ໄດ້ລັກເອົາເງິນຈຳນວນດັ່ງກ່າວໄປຝາກທະນາຄານກິນດອກເບ້ຍ, ເຫລືອຈາກນັ້ນກໍປັນກັນກິນ, ສ່ວນທີ່ເຫລືອຍັງເລັກໆໜ້ອຍໆຈຶ່ງເອົາໄປຖອກເຂົ້າລັດ. ເມື່ອເປັນສະພາບເຊັ່ນນີ້ ພະນັກງານລັດຂັ້ນກາງນັບມື້ຮັ່ງຂຶ້ນຮັ່ງຂຶ້ນ, ສ່ວນວ່າລັດຖະບານກໍນັບມື້ທຸກລົງທຸກລົງ. ອັນນີ້ມັນຜິດຫລັກການ, ຜິດລະບຽບກົດໝາຍ. ຢາກແກ້ໄຂໄດ້ມີແຕ່ປະຕິບັດວິໄນພະນັກງານລັດທີ່ກະທຳຜິດກົດໝາຍໃຫ້ສຽບຂາດ ເພາະກົດໝາຍລັດຖະກອນມັນມີແລ້ວ. ຈົນມາຮອດປັດຈຸບັນ ຄລິບດັ່ງກ່າວກໍຍັງມີການເຜີຍແຜ່ໃນໂລກອອນລາຍໄປຢ່າງກວ້າງຂວາງໃນທົ່ວປະເທດ ແລະ ທົ່ວໂລກ.
ສ່ວນທ່ານຮອງນາຍົກລັດຖະມົນຕີ ສົມດີ ດວງດີ ໃນຖານະເປັນລັດຖະມົນຕີກະຊວງການເງິນ ກໍໄດ້ອອກມາປະກາດເປີດໄຟຂຽວ ຖ້າພົບເຫັນພະນັກງານເຮັດຜິດຕໍ່ລະບຽບກົດໝາຍໃຫ້ໂທແຈ້ງສາຍດ່ວນ 1519 ເພາະວ່າປັດຈຸບັນ ພັກ ແລະ ລັດຖະບານເຮົາພະຍາຍາມແກ້ໄຂບັນຫາການສໍ້ລາດບັງຫລວງ, ການລະເມີດລະບຽບກົດໝາຍຂອງເຈົ້າໜ້າທີ່ພະນັກງານໃນກົງຈັກລັດຢ່າງເຂັ້ມງວດ, ພ້ອມໃຫ້ປະຕິບັດໜ້າທີ່ຢ່າງໂປ່ງໃສ, ຍຸຕິທຳ ແລະ ສາມາດກວດສອບໄດ້. ແຕ່ຖ້າຫາກພົບເຫັນການສໍ້ລາດບັງຫລວງ, ການລະເມີດລະບຽບກົດໝາຍ ໂດຍສະເພາະພະນັກງານລັດຖະກອນໃນຂະແໜງການເງິນ ທັງຢູ່ສູນກາງ ແລະ ທ້ອງຖິ່ນຈະຖືກລົງວິໄນຢ່າງເຂັ້ມງວດ ເຊິ່ງໄລຍະຜ່ານມາ ໄດ້ມີພະນັກງານບາງຄົນຖືກກ່າວເຕືອນ ແລະ ປະຕິບັດວິໄນເຖິງຂັ້ນໄລ່ອອກຈາກລັດຖະກອນໄປແລ້ວ. ຄຳປະກາດນີ້ໄດ້ມີຂຶ້ນໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ 2 ປະຈຳປີ 2019 ທີ່ຜ່ານມານີ້ເອງ.
ເມື່ອຕັ້ງໂຈດກັນວ່າ: ບັນຫາການສໍ້ລາດບັງຫລວງທີ່ໄດ້ແຜ່ລາມມາຮອດທຸກວັນນີ້ ມັນເກີດຂຶ້ນຍ້ອນຫຍັງ ແລະ ແມ່ນໃຜເປັນຜູ້ພາເຮັດພາໄປ ໂດຍພື້ນຖານແລ້ວມັນກໍເກີດຂຶ້ນຍ້ອນຄວາມທຸກຄວາມຈົນ, ເກີດຈາກຄວາມທຸກຍາກປາກໝອງ ແລະ ດ້ອຍພັດທະນາແກ່ຍາວມາແຕ່ຫລາຍເຊັ່ນຄົນ ບໍ່ຈັກວ່າເປັນຫົວເມືອງຂຶ້ນ, ບໍ່ຈັກວ່າຖືກສົງຄາມທຳລາຍ ສົມທົບກັບເສດຖະກິດຂຶ້ນກັບທຳມະຊາດ, ຖືກຄອບງຳຈາກເສດຖະກິດຂອງຊາດອື່ນເປັນຫລາຍສະຕະວັດ ກໍເລີຍຕົກຢູ່ໃນສະພາບທຸກຍາກຂາດເຂີນ ຈົນກາຍເປັນຊ້ຳເຮື້ອມາຮອດທຸກວັນນີ້. ສ່ວນວ່າຜູ້ທີ່ພາເຮັດພາໄປໃນການສໍ້ລາດບັງຫລວງນັ້ນກໍແມ່ນກະໂຕຜູ້ເປັນນາຍບາງຄົນ, ຜູ້ເປັນສະມາຊິກພັກບາງສະຫາຍພາໝູ່ເຮັດ ອັນສາເຫດກໍຍ້ອນຖືວ່າຕົນມີອຳນາດ, ເປັນສະມາຊິກພັກ, ເປັນອົງຄະນະພັກ ທັງມີຕຳແໜ່ງໜ້າທີ່ຕັດສິນຊີ້ຂາດ, ເປັນນາຍຕ້ອງການເຮັດອັນໃດກໍເຮັດໄດ້. ໜັກໜ່ວງກວ່າໝູ່ກໍແມ່ນພະນັກງານຂັ້ນເມືອງ, ຂັ້ນພະແນກການຂອງແຂວງ ລາມຂຶ້ນໄປຮອດຂັ້ນກະຊວງທະບວງກົມຕ່າງໆ.
ຂໍເວົ້າຄວາມຈິງວ່າ: ຖ້າບໍ່ມີລັດຖະບານຊຸດທີ 8 ເຂົ້າມາບໍລິຫານບ້ານເມືອງ ສະພາບການສໍ້ລາດບັງຫລວງຍິ່ງຈະໜັກໜ້າ, ໄມ້ໃນປ່າກໍຈະກ້ຽງ, ດິນກໍຈະໝົດ, ຄັງເງິນຂອງລັດກໍຈະບໍ່ພຽງພໍ, ເງິນເດືອນກໍຍິ່ງຈະຊັກຊ້າ ຍ້ອນເກີດບັນຫາການເກັບລາຍຮັບບໍ່ໄດ້ຕາມເປົ້າ ແລະ ໄພສັງຄົມອື່ນໆຕາມມາ, ພະນັກງານລັດພາກັນເສຍທາດຂາດຄຸນ, ຖືເບົາຕໍ່ຄວາມຮັບຜິດຊອບໃນໜ້າທີ່, ເຮັດວຽກອັນໃດທີ່ບໍ່ມີຜົນປະໂຫຍດແກ່ຕົນເອງ ແລະ ພວກພ້ອງກໍບໍ່ຢາກເຮັດ. ຈາກນັ້ນຈຶ່ງເກີດມີການຊື້ຈ້າງ, ມີເງິນກ້ອງໂຕະ, ມີເງິນຄ່າລາຍເຊັນເກີດຂຶ້ນຢ່າງແຜ່ລາມ ແລະ ກວ້າງຂວາງໃນຂົງເຂດການບໍລິຫານລັດຈົນແກ່ຍາວມາຮອດທຸກວັນນີ້.
ເຖິງຢ່າງໃດກໍດີ, ການປາບປາມພະນັກງານລັດສໍ້ລາດບັງຫລວງນັ້ນບໍ່ແມ່ນເລື່ອງງ່າຍ ແລະ ກໍບໍ່ຖືວ່າເປັນເລື່ອງຍາກ ຖ້າທຽບໃສ່ສະໜາມຮົບຕໍ່ສູ້ໃນສະໄໝສົງຄາມ ຂໍແຕ່ວ່າເຮົາຕັດສິນໃຈປະຕິບັດຕົວບົດກົດໝາຍໃຫ້ມີຜົນສັກສິດ. ພະນັກງານລັດຜູ້ໃດສໍ້ລາດບັງຫລວງກໍໃຫ້ປາບປາມຕາມຂະບວນການຂອງກົດໝາຍກໍເປັນອັນວ່າມີຜົນສັກສິດແລ້ວ. ຂໍແຕ່ວ່າເຮົາພ້ອມກັນເຮັດ ພ້ອມກັນເຢີກ. ທຸກສິ່ງທຸກຢ່າງກໍເພື່ອຄວາມຈະເລີນຮັ່ງມີ ເພື່ອຄວາມສີວິໄລຂອງບ້ານເມືອງນັ້ນແລ !.
