ປີໃໝ່ສ້າງຜົນງານໃໝ່ ຮ່ວມໃຈແກ້ໄຂສິ່ງຫຍໍ້ທໍ້
ທິດກໍ່າ:
ເປັນອັນວ່າປີໃໝ່ 2020 ໄດ້ຍ່າງກ້າວເຂົ້າມາກາຍສີ່ຫາວັນແລ້ວ, ແຕ່ບັນຍາກາດການສະເຫລີມສະຫລອງຍັງສືບຕໍ່ຟົດຟື້ນໄປດ້ວຍຄວາມມ່ວນຊວນກິນ, ຊວນດື່ມ, ຊວນພົບປະສັງສັນຕາມສະພາບເງື່ອນໄຂ ແລະ ປັດໄຈທີ່ມີຂອງແຕ່ລະຄົນ, ກຸ່ມຄົນໃນສັງຄົມລາວເຮົາຢ່າງປະຕິເສດບໍ່ໄດ້. ຄາດວ່າງານສົ່ງທ້າຍປີເກົ່າ 2019 ຕ້ອນຮັບປີໃໝ່ 2020 ຍັງຈະແກ່ຍາວໄປອີກຫລາຍວັນ ຈົນກວ່າມັນຈະສິ້ນສຸດລົງຕາມວາລະ ແລະ ການເວລາ. ອັນທີ່ຍັງຄົງພົບເຫັນປາກົດການ ກໍຄືການຍົກຈອກ, ການໄປມາຫາສູ່ກັນ, ໄປພົບປະສັງສັນ, ພາກັນກິນປາດູດໜອງ, ກິນຕົ້ມເປັດ, ຕົ້ມໄກ່ ໂດຍສະເພາະແມ່ນຍາມວັນເສົາ, ວັນທິດ, ຜູ້ໃດມີສວນ, ມີດິນດອນຕອນຫຍ້າກວ້າງຂວາງ, ມີຄັງງົວ, ຄັງແບ້, ມີໜອງປາ, ລ້ຽງເປັດ, ລ້ຽງໄກ່ຫລາຍກໍເຊື້ອເຊີນໝູ່ຄູ່ຮັກແພງຍາດຕິພີ່ນ້ອງໄປຮ່ວມຊຸມແຊວສ້າງສັນກັນດ້ວຍຄວາມຈິງໃຈ, ດ້ວຍຄວາມຮັກຄວາມສາມັກຄີຢ່າງອົບອຸ່ນມ່ວນຊື່ນ. ນີ້ຄືຊີວິດຈິງແຫ່ງຄວາມສຸກຂອງປະຊາຊົນລາວບັນດາເຜົ່າເຮົາໃນຍາມບ້ານເມືອງມີຄວາມສະຫງົບສຸກຮົ່ມເຢັນ ບໍ່ມີເສິກເສືອເໜືອໃຕ້ເໝືອນດັ່ງປາງກ່ອນໃນຍຸກສົງຄາມເຢັນ.
ແນວໃດກໍຕາມ, ເມື່ອມາເບິ່ງພາລະກິດໃນການສ້າງສາພັດທະນາປະເທດຊາດ ພາຍໃຕ້ການນຳພາຂອງພັກ ແລະ ລັດຖະບານເຮົາ ເຫັນວ່າຍັງຕ້ອງບຸກໜ້າບືນຕົວໄປເລື້ອຍໆ. ເປົ້າໝາຍໃນອະນາຄົດຕໍ່ໜ້າກໍແມ່ນນຳພາປະເທດຊາດໃຫ້ຫລຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາໃນປີ 2024. ຈາກນັ້ນໄປຮອດ 2025 ຫາ 2030 ແມ່ນໃຫ້ປະຊາຊົນເຮົາມີລາຍຮັບປານກາງສູງຕາມວິໄສທັດທີ່ໄດ້ຄາດກະໄວ້ໃນມະຕິຄັ້ງທີ 9 ແລະ 10 ຂອງພັກ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ 7 ແລະ ຄັ້ງທີ 8 ແຫ່ງລັດ. ແຕ່ວ່າຈະໄດ້ຕາມຄວາມມຸ້ງມາດປາຖະໜາ ຫລື ບໍ່ນັ້ນ ມັນກໍຂຶ້ນກັບຄົນລາວທັງໝົດພາຍໃນຊາດເປັນຜູ້ຕັດສິນຊີ້ຂາດ. ສະເພາະໃນແຜນພັດທະນາເສດຖະກິດ-ສັງຄົມປີ 2020 ທີ່ສະພາໄດ້ຮັບຮອງໄປແລ້ວ ລັດຖະບານໄດ້ກຳນົດເອົາ 10 ໜ້າວຽກທີ່ຈະຕ້ອງຮີບຮ້ອນແກ້ໄຂໃຫ້ມີຜົນສຳເລັດເປັນຮູບປະທຳຍິ່ງຂຶ້ນເຊັ່ນ: ສູ້ຊົນໃຫ້ບັນລຸຕົວເລກຄາດໝາຍດ້ານເສດຖະກິດ, ຊຸກຍູ້ການຜະລິດໃຫ້ແຂງແຮງເພື່ອສ້າງລາຍຮັບໃຫ້ຍືນຍົງ, ປັບປຸງສະມັດຕະພາບການຜະລິດໃຫ້ສູງ, ປັບປຸງຂົງເຂດວິສາຫະກິດ, ແກ້ໄຂບັນຫາສະພາບແວດລ້ອມ, ປັບປຸງ ແລະ ສົ່ງເສີມການທ່ອງທ່ຽວ, ສູ້ຊົນເກັບລາຍຮັບໃຫ້ບັນລຸຕາມເປົ້າໝາຍ, ພະຍາຍາມປັບປຸງລະບົບເງິນຕາໃຫ້ມີສະຖຽນລະພາບ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ຕ້ານປາກົດການຫຍໍ້ທໍ້ຕ່າງໆໃນສັງຄົມໃຫ້ນັບມື້ຫລຸດໜ້ອຍຖອຍລົງ.
ນອກຈາກນັ້ນ, ກໍຍັງມີບັນຫາອື່ນໆທີ່ປິ່ນອ້ອມໃນຫລາຍຂົງເຂດ. ອັນໂຕທີ່ຈະມາກົດໜ່ວງຖ່ວງດຶງຄວາມຈະເລີນຂອງຊາດອີກອັນໜຶ່ງກໍໄດ້ແກ່ໄພພິບັດຈາກທຳມະຊາດ ເປັນຕົ້ນລົມພາຍຸ, ແຜ່ນດິນໄຫວ, ໄພນ້ຳຖ້ວມແຫ້ງແລ້ງ ແລະ ເກີດໂລກລະບາດຕາມມາເໝືອນດັ່ງປີ 2019. ຕໍ່ບັນຫາທີ່ໄດ້ຍົກມານີ້ ລ້ວນແລ້ວແຕ່ເປັນໄພຄຸກຄາມໂດຍບັງເອີນ ແລະ ແກ້ໄຂໄດ້ຍາກ. ອັນສາເຫດກໍຍ້ອນວ່າສະພາບການປ່ຽນແປງຂອງດິນຟ້າອາກາດມັນນັບມື້ຮຸນແຮງ ແລະ ອັນຕະລາຍຂຶ້ນເລື້ອຍໆ, ແຕ່ກໍເຫັນວ່າມັນເປັນການເຕືອນໃຫ້ພວກເຮົາໄດ້ຮັບຮູ້ ແລະ ມີສະຕິກຽມພ້ອມໃນການຮັບມືຕໍ່ເຫດຮ້າຍທີ່ອາດຈະເກີດຂຶ້ນໃນທຸກເມື່ອເໝືອນດັ່ງເຄີຍເປັນ ແລະ ເຄີຍເຫັນມາໃນປີກ່ອນ. ດີແທ້ເພື່ອເປັນການຫລີກລ້ຽງໄພພິບັດຕ່າງໆທີ່ອາດຈະເກີດຂຶ້ນນັ້ນ ຄວນມີການກຽມພ້ອມໃນທຸກກໍລະນີ ບໍ່ຄວນໃຫ້ມີເຫດການມາເຖິງແລ້ວຈຶ່ງຄ່ອຍຫາວິທີແກ້ ເພາະການມາທຳລາຍເຜົາຜານຂອງທຳມະຊາດ ແລະ ສິ່ງແວດລ້ອມຕ່າງໆນັ້ນ ມັນກໍໄດ້ບອກໃຫ້ເຮົາຮູ້ລ່ວງໜ້າໄດ້ຢ່າງຊັດເຈນ.
ແນວໃດກໍດີ, ປີ 2020 ກໍໄດ້ກ້າວມາເຖິງພວກເຮົາແລ້ວ ແຜນພັດທະນາເສດຖະກິດ-ສັງຄົມປະຈຳປີສະພາກໍໄດ້ຮັບຮອງຢ່າງເປັນທາງການແລ້ວ, ການກຳນົດໜ້າທີ່ສະເພາະອັນເປັນຈຸດເລັ່ງແກ້ໄຂຂອງລັດຖະບານກໍມີຢ່າງຮຽບຮ້ອຍແລ້ວ, ຂັ້ນຕໍ່ໄປກໍມີແຕ່ພ້ອມກັນເຮັດ ພ້ອມກັນທຳ ແລະ ພ້ອມກັນເປັນເຈົ້າການແກ້ໄຂ ເພາະສະໄໝນີ້ເວົ້າໜ້ອຍເຮັດໃຫ້ຫລາຍ. ທິດສະດີບຸນບ້ານເຮົາໃຫ້ຄ່ອຍຫລິ້ນຄ່ອຍກິນມັນໝົດຍຸກ, ໝົດສະໄໝໄປແລ້ວ. ຖ້າຖືຕຳລາເກົ່າ, ແນວຄິດຄອງເດີມອັນເກົ່າ, ສໍ້ລາດບັງຫລວງຄືເກົ່າ, ເຫັນແຕ່ຜົນປະໂຫຍດສະເພາະ ບໍ່ເຫັນຜົນປະໂຫຍດລວມຂອງຊາດ, ຂອງແຜ່ນດິນ ເຮົາຈະໄປບໍ່ທັນໝູ່. ສິ່ງທີ່ສະແດງອອກໃຫ້ເຫັນ ກໍຄືຜົນງານໄປແຂ່ງຂັນກິລາຊີເກມຄັ້ງທີ 30 ທີ່ປະເທດຟີລິບປິນເປັນເຈົ້າພາບ ເຮົາເຫັນໄດ້ຢ່າງຈະແຈ້ງຊັດເຈນຕໍ່ການເອົາໃຈໃສ່ພັດທະນາຄົນ, ການພັດທະນາຊາດໃນຍຸກ 4.0 ເຊິ່ງແຕ່ລະປະເທດກໍມີການແກ້ງແຍ່ງແຂ່ງຂັນກັນຢ່າງອັດຕະໂນມັດ ເພື່ອຄວາມຮັ່ງມີຂອງຊາດ, ຄວາມເປັນເຈົ້າ ແລະ ຄວາມຢູ່ລອດຂອງແຕ່ລະປະເທດໃນທຸກດ້ານ. ເພາະສະນັ້ນ ປີໃໝ່ 2020 ຕ້ອງໄດ້ສ້າງຜົນງານໃໝ່ຍິ່ງໃຫຍ່ກວ່າເກົ່າ. ໄປຄຽງຄູ່ກັນນັ້ນ ກໍຕ້ອງຮ່ວມໃຈກັນເດັດດ່ຽວແກ້ໄຂສິ່ງຫຍໍ້ທໍ້ກົດໜ່ວງຄວາມຈະເລີນຂອງຊາດໃຫ້ໄດ້ຢ່າງສິ້ນເຊີງ.
