ປີຜ່ານມາ ມີຄົນເສຍຊີວິດຈາກເຮືອບິນຕົກຫລຸດລົງກວ່າເຄິ່ງ
ບໍລິສັດທີ່ປຶກສາການບິນເປີດເຜີຍວ່າ: ປີ 2019 ຜ່ານມາ, ມີຜູ້ເສຍຊີວິດຈາກອຸປະຕິເຫດເຮືອບິນການຄ້າຂະໜາດໃຫຍ່ຫລຸດລົງກວ່າ 50% ຈາກປີກ່ອນໜ້ານັ້ນ.
To70 ບໍລິສັດທີ່ປຶກສາການບິນຂອງໂຮນລັງ ເປີດເຜີຍວ່າ: ປີຜ່ານມາ ເກີດອຸປະຕິເຫດເຮືອບິນການຄ້າຂະໜາດໃຫຍ່ທັງໝົດ 86 ຄັ້ງ ເປັນອຸປະຕິເຫດທີ່ມີຜູ້ເສຍຊີວິດ 8 ຄັ້ງ ມີຜູ້ເສຍຊີວິດ 257 ຄົນ ທຽບໃສ່ປີ 2018 ເກີດອຸປະຕິເຫດ 160 ຄັ້ງ ເປັນອຸປະຕິເຫດທີ່ມີຜູ້ເສຍຊີວິດ 13 ຄັ້ງ ມີຜູ້ເສຍຊີວິດ 534 ຄົນ. ສະເລ່ຍແລ້ວປີ 2019 ເກີດອຸປະຕິເຫດທີ່ມີຜູ້ເສຍຊີວິດ 1 ຄັ້ງຕໍ່ຖ້ຽວບິນທຸກ 5,58 ລ້ານຖ້ຽວ, ຜູ້ເສຍຊີວິດຄວບຄຸມທັງຜູ້ໂດຍສານ, ພະນັກງານຕ້ອນຮັບໃນເຮືອບິນ ແລະ ຜູ້ເຄາະຮ້າຍຢູ່ພື້ນດິນ.
To70 ລະບຸວ່າ: ປີຜ່ານມາ ອຸດສາຫະກຳການບິນທຸ້ມເທປ້ອງກັນໄພໃນອະນາຄົດເຊັ່ນ: ໂດຣນຫລາຍເປັນພິເສດ, ແຕ່ເຫດເຮືອບິນ ໂບອິ້ງ 737 MAX ຕົກຢູ່ອິນໂດເນເຊຍໃນປີ 2018 ແລະ ຢູ່ເອທິໂອປີໃນປີ 2019 ມີຜູ້ເສຍຊີວິດລວມກັນ 346 ຄົນ ເນັ້ນເຕືອນວ່າ: ອຸດສາຫະກຳການບິນຍັງຕ້ອງໃຫ້ຄວາມສົນໃຈກັບສິ່ງພື້ນຖານທີ່ເຮັດໃຫ້ການບິນພົນລະເຮືອນປອດໄພນັ້ນຄື: ເຮືອບິນທີ່ອອກແບບ ແລະ ຜະລິດຢ່າງດີ, ພະນັກງານຜ່ານການອົບຮົມຢ່າງດີ ແລະ ມີຂໍ້ມູນຄົບຖ້ວນ.
ເຄືອຂ່າຍຄວາມປອດໄພການບິນລະບຸວ່າ: ໄລຍະສອງທົດສະວັດຜ່ານມາ ຈຳນວນຜູ້ເສຍຊີວິດຈາກການບິນທົ່ວໂລກຫລຸດລົງຫລາຍ ທັງທີ່ມີການບິນເພີ່ມຂຶ້ນ. ປີ 2017 ເປັນປີທີ່ການບິນທົ່ວໂລກປອດໄພຫລາຍທີ່ສຸດ ເກີດອຸປະຕິເຫດທີ່ມີຜູ້ເສຍຊີວິດພຽງ 2 ຄັ້ງ ມີຜູ້ເສຍຊີວິດ 13 ຄົນ ເປັນເຮືອບິນແບບໃບພັດບິນລະດັບພາກພື້ນ ແລະ ບໍ່ມີເຮືອບິນການຄ້າເກີດອຸປະຕິເຫດຮ້າຍແຮງ.
