ທຫລ ຈະນໍາໃຊ້ຫລາຍມາດຕະການເພື່ອຮັກສາສະຖຽນລະພາບເງິນຕາແຫ່ງຊາດ

  ຜູ້ວ່າການທະນາຄານແຫ່ງ ສປປ ລາວ ໃຫ້ຮູ້ວ່າ: ໃນປີ 2020 ນີ້, ຄາດວ່າເສດຖະກິດໂລກຈະສືບຕໍ່ຂະຫຍາຍຕົວໃນລະດັບ 3,5%, ຂະນະດຽວກັນບັນຫາ ຄວາມຂັດແຍ່ງທາງການຄ້າຂອງບັນດາປະເທດມະຫາອໍານາດໃນໂລກ ແລະ ພາກພື້ນອາຊີຕາເວັນອອກຍັງຈະສືບຕໍ່ແກ່ຍາວ ແລະ ຈະສົ່ງຜົນກະທົບຕໍ່ຕະຫລາດເງິນຕາໃນສາກົນ ແລະ ການຂະຫຍາຍຕົວຂອງເສດຖະກິດໃນພາກພື້ນ ແລະ ອາດຈະເປັນສິ່ງທ້າທາຍບໍ່ໜ້ອຍຕໍ່ການຮັກສາສະຖຽນລະພາບເງິນຕາ ຂອງປະເທດເຮົາ.

ດັ່ງນັ້ນ ທະນາຄານແຫ່ງ ສປປ ລາວ ຈະໄດ້ນໍາໃຊ້ຫລາຍມາດຕະການເພື່ອຄຸ້ມຄອງມະຫາພາກເງິນຕາ ຄື: ຄວບຄຸມອັດຕາເງິນເຟີ້ໃຫ້ຢູ່ລະດັບຕໍ່າກວ່າອັດຕາການຂະຫຍາຍຕົວຂອງເສດຖະກິດ, ຮັກສາອັດຕາແລກປ່ຽນໃຫ້ມີຄວາມສະຫງົບ ແລະ ເໜັງຕິງຢູ່ໃນກອບ 5% ທຽບກັບເງິນຕາສະກຸນຫລັກ, ໂດຍ ທຫລ ຈະນໍາໃຊ້ເຄື່ອງມືນະໂຍບາຍເງິນຕາປິ່ນອ້ອມ ເປັນຕົ້ນ: ອັດຕາດອກເບ້ຍພື້ນຖານຂອງ ທຫລ, ອັດຕາສ່ວນເງິນແຮຝາກບັງຄັບ ແລະ ຕະຫລາດເປີດຢ່າງເປັນປົກກະຕິ.

ພ້ອມນັ້ນ, ກໍຈະປັບປຸງບັນດາລະບຽບການຕ່າງໆ ທີ່ຕິດພັນກັບການພັດທະນາຂອງຂະແໜງການເງິນເພື່ອໃຫ້ແທດເໝາະກັບສະພາບເສດຖະກິດໃນແຕ່ລະໄລຍະ, ສືບຕໍ່ນໍາໃຊ້ເຄື່ອງມືອັດຕາແລກປ່ຽນເປັນເຄື່ອງມືຫລັກໃນການຮັກສາສະຖຽນລະພາບລາຄາ, ໂດຍສືບຕໍ່ກໍານົດອັດຕາແລກປ່ຽນອ້າງອີງປະຈໍາວັນ, ສືບຕໍ່ກໍານົດສ່ວນຕ່າງການຊື້-ຂາຍເງິນຕາຕ່າງປະເທດ ແລະ ເຂົ້າດັດສົມເງິນຕາຕ່າງປະເທດເມື່ອເຫັນວ່າຈໍາເປັນ, ສົມທົບກັບຂະແໜງການກ່ຽວຂ້ອງໃນການສົ່ງເສີມການຜະລິດພາຍໃນໃຫ້ເຂັ້ມແຂງ ເພື່ອຫລຸດຜ່ອນການນໍາໃຊ້ເງິນຕາຕ່າງປະເທດ ເພື່ອນໍາເຂົ້າສີນຄ້າຈາກຕ່າງປະເທດ, ພ້ອມນັ້ນ ກໍສົ່ງເສີມການສົ່ງອອກເພື່ອມີແຫລ່ງທຶນເງິນຕາເຂົ້າປະເທດ, ສືບຕໍ່ເອົາໃຈໃສ່ຄຸ້ມຄອງ ແລະ ຕິດຕາມການເຄື່ອນໄຫວບັນດາທະນາຄານທຸລະກິດຢ່າງເຂັ້ມງວດ ເພື່ອຮັບປະກັນຄວາມໝັ້ນຄົງຂອງບັນດາທະນາຄານທຸລະກິດຕາມລະບຽບກົດໝາຍ, ຊຸກຍູ້ໃຫ້ທະນາຄານທຸລະກິດເປັນເຈົ້າການພັດທະນາຜະລິດຕະພັນສິນເຊື່ອໃຫ້ມີຄວາມຫລາກຫລາຍ ແລະ ສອດຄ່ອງກັບເປົ້າໝາຍການພັດທະນາເສດຖະກິດ-ສັງຄົມ.