ເຕະບານຊີງແຊ້ມສະໂມສອນອາຊຽນກັບມາຈັດອີກໃນຮອບ 15 ປີ
ສະຫະພັນບານເຕະອາຊຽນ (AFF) ປະກາດກົດລະບຽບການແຂ່ງຂັນເຕະບານ ຊີງແຊ້ມສະໂມສອນອາຊຽນ (ASEAN Club Championship) ປະຈຳປີ 2020 ເຊິ່ງເປັນຄັ້ງທີ 3 ຂອງການແຂ່ງຂັນຕໍ່ຈາກປີ 2005 ເປັນການກັບມາຈັດແຂ່ງຂັນອີກຄັ້ງໃນຮອບ 15 ປີ ຫລັງຈາກມີມະຕິເປັນເອກະສັນອະນຸມັດຈັດການແຂ່ງຂັນໃນລະຫວ່າງກອງປະຊຸມສຸດຍອດອາຊຽນ ຄັ້ງທີ 35 ທີ່ບາງກອກ ປະເທດໄທ ໂດຍໄດ້ຮັບການສະໜັບສະໜູນຈາກສະຫະພັນບານເຕະນາໆຊາດ ຫລື FIFA.
ໂດຍຈະຈັດຂຶ້ນໃນລະຫວ່າງເດືອນພຶດສະພາຫາເດືອນພະຈິກ 2020 ເຊິ່ງແຊ້ມຄັ້ງນີ້ຈະໄດ້ສິດເຂົ້າຮ່ວມລາຍການຊີງແຊ້ມສະໂມສອນໂລກ ໃນປີ 2021 ທີ່ປະເທດຈີນ.
ການແຂ່ງຂັນຄັ້ງນີ້ ໃນຮອບສຸດທ້າຍຈະມີທັງໝົດ 12 ທີມ ເຊິ່ງທີມເຂົ້າຮ່ວມຕ້ອງຜ່ານມາດຖານຂອງສະຫະພັນບານເຕະອາຊີ (AFC) ຄືເປັນສະໂມສອນທີ່ມີ ຄລັບ ໄລເຊັນຊິງ (Club Licensing) ເຊິ່ງສະໂມສອນຈາກ ສປປ ລາວ ໄດ້ສິດພຽງຮອບເພລອັອຟ ເພື່ອລຸ້ນໄປຫລິ້ນໃນຮອບສຸດທ້າຍ,ສ່ວນອິນໂດເນເຊຍ, ມາເລເຊຍ, ຫວຽດນາມ ແລະ ໄທ ໄດ້ສິດໃນຮອບສຸດທ້າຍເຖິງ 2 ສະໂມສອນ ເພາະມີອັນດັບລີກໃນອາຊຽນຕິດ 1 ໃນ 3.
ສ່ວນມຽນມາ ແລະ ສິງກະໂປ ໄດ້ສິດໄປຮອບສຸດທ້າຍປະເທດລະ 1 ທີມ, ຂະນະທີ່ຕົວແທນຈາກ ບຣູໄນ, ຟີລິບປິນ, ສປປ ລາວ, ກຳປູເຈຍ ແລະ ຕີມໍ ເລັສເຕ ຕ້ອງໄປຫລິ້ນຮອບເພລອັອຟ ເພື່ອຄັດເອົາ 2 ທີມດີທີ່ສຸດໄປຫລິ້ນ ກັບອີກ 10 ທີມທີ່ໄດ້ສິດລໍຖ້າໃນຮອບສຸດທ້າຍ.
ໂດຍໃນຮອບສຸດທ້າຍ ທັງ 12 ທີມຈະຖືກແບ່ງເປັນ 2 ກຸ່ມ, ກຸ່ມລະ 6 ທີມ ໂດຍແຕ່ລະທີມຈະຫລິ້ນໃນບ້ານ ແລະ ນອກບ້ານ ລວມກັນທີມລະ 5 ນັດ ແລະ ຄັດເອົາທີມອັນດັບ 1 ແລະ 2 ຂອງກຸ່ມໄປຫລິ້ນໃນຮອບຮອງຊະນະເລີດ ເຊິ່ງຮອບຮອງຊະນະເລີດແຂ່ງນັດດຽວ, ທີມອັນດັບທີ 1 ຂອງກຸ່ມຈະໄດ້ສິດຫລິ້ນໃນບ້ານ, ຂະນະທີ່ ນັດຊີງຊະນະເລີດຈະແຂ່ງ 2 ນັດແບບໄປກັບໃນບ້ານ ແລະ ນອກບ້ານ. ການຈັບສະຫລາກຈະມີຂຶ້ນໃນເດືອນມີນາ 2020.
ສຳລັບກົດລະບຽບໃຊ້ນັກເຕະລົງສະໜາມເໝືອນກັບ ເອເອັຟຊີ ແຊມປ້ຽນລີກ ແຕ່ລະທີມສາມາດສົ່ງນັກເຕະນອກທະວີບໄດ້ 3 ຄົນ ບວກນັກເຕະອາຊີ 1 ຄົນ. ແຕ່ລະທີມໃຫ້ລົງທະບຽນນັກເຕະ 25-30 ຄົນ.
ສຳລັບຄ່າປີ້ຍົນ ແລະ ຄ່າໂຮງແຮມໃນເກມນອກບ້ານ ທາງຜູ້ສະໜັບສະໜູນການແຂ່ງຂັນຈະເປັນຜູ້ອອກຄ່າໃຊ້ຈ່າຍໃຫ້ທັງໝົດ. ສ່ວນລາງວັນທີມຊະນະເລີດຈະໄດ້ຮັບເງິນລາງວັນ 3 ແສນໂດລາສະຫະລັດ ແລະ ລວມກັບເງິນສະໜັບສະໜູນໃນຮອບຕ່າງໆອີກ 1 ແສນໂດລາ.
