“ຍີ່ຫໍ້ລາວ” ຈະກ້າວໜ້າໄດ້ແນວໃດ?

ໂດຍ: ມຶກບໍ່ແຫ້ງ

ຄວາມຮຽກຮ້ອງຕ້ອງການໃນການສົ່ງເສີມຜະລິດພາຍໃນໄດ້ກາຍເປັນບູລິມະສິດອັນເລັ່ງດ່ວນຂອງລັດຖະບານ, ພວກເຮົາຄິດວ່າຈະເຮັດແນວໃດໃຫ້ຍີ່ຫໍ້ ສິນຄ້າລາວກ້າວໄກໄດ້ຮັບຄວາມນິຍົມ?

ເມື່ອພວກເຮົາຍ່າງເຂົ້າໄປຮ້ານສັບພະສິນຄ້າພວກເຮົາເຄີຍສັງເກດເບິ່ງບໍ່ວ່າສິນຄ້າເປັນເຄື່ອງບໍລິໂພກຫຼືອຸປະໂພກກໍດີມີຫຍັງແດ່ ທີ່ເປັນຍີ່ຫໍ້ທີ່ຜະລິດ ໃນປະເທດເຮົາ, ຖ້າເຮົາຮູ້ວ່າ “ຂອງລາວ” ດ້ວຍຄວາມເຊື່ອທີ່ຮັບຮູ້ຈາກ ຫາງສຽງຈາກສັງຄົມຜ່ານມາປັດໄຈໃດແດ່ທີ່ພວກເຮົາອາດເລືອກສິນຄ້າຍີ່ຫໍ້ຂອງຄົນລາວ?

ໃນອາດີດກໍຄືປັດຈຸບັນປະເທດພວກເຮົາໄດ້ນຳເຂົ້າສິນຄ້າປະເພດບໍລິໂພກແລະອຸປະໂພກຈາກຕ່າງປະເທດຢ່າງໜ້ອຍ 70% ຂອງສິນຄ້າທີ່ຈຳ ໜ່າຍໃນຮ້ານສັບພະສິນຄ້າທົ່ວໄປ. ພວກເຮົານໍາເຂົ້າເລີ່ມແຕ່ພືດຜັກຈົນໄປ ເຖິງເຄື່ອງກົນຈັກຕ່າງໆ ເຊິ່ງໝາຍຄວາມວ່າພວກເຮົາໄດ້ນຳໃຊ້ເງິນຈຳ ນວນຫຼວງຫຼາຍເພື່ອນຳເຂົ້າສິນຄ້າຈາກຕ່າງປະເທດອັນເຮັດໃຫ້ເສດຖະກິດ ມີການປ່ຽນແປງເລື້ອຍໆ.

ເພາະສະນັ້ນ, ການສົ່ງເສີມການຜະລິດພາຍໃນແລະການສົ່ງເສີມສິນ ຄ້າຍີ່ຫໍ້ລາວໃຫ້ເປັນທີ່ນິຍົມຊົມຊອບຈຶ່ງມີຄວາມຈຳເປັນແຕ່ພວກເຮົາຈະປະ ສົບຜົນສຳເລັດໄດ້ແນວໃດ?

“ຖ້າປາສະຈາກຈຸດສຸມສະເພາະ ແລະ ການປະສານງານທີ່ດີ, ພວກເຮົາບໍ່ສາມາດປະສົບຜົນສຳເລັດໃນການສົ່ງເສີມສິນຄ້າຍີ່ຫໍ້ລາວ ແລະ ການຂະຫຍາຍຕະຫຼາດໄດ້” ທ່ານ ອຸເດດ ສຸວັນນະວົງ ປະທານສະພາອຸດສາຫະກຳ ແລະ ການຄ້າແຫ່ງຊາດໄດ້ກ່າວໃນກອງປະຊຸມວຽກງານການ ຕ່າງປະເທດຄັ້ງທີ 14 ເມື່ອບໍ່ດົນຜ່ານມານີ້.

ທ່ານຍັງກ່າວຕື່ມວ່າກະຊວງການຕ່າງປະເທດເປັນພາກສ່ວນສຳຄັນ ໃນການໂຄສະນາວ່າປະເທດເຮົາມີທ່າແຮງເລື່ອງການທ່ອງທ່ຽວ, ມີສິນ ຄ້າຫຼາກຫລາຍທີ່ເອື້ອອຳນວຍແກ່ ການຄ້າແລະການລົງທຶນ.

ນອກນັ້ນ, ທ່ານອຸເດດ ຍັງຍົກໃຫ້ເຫັນບົດບາດຂອງວຽກງານການ ທ່ອງທ່ຽວຄຽງຄູ່ກັບການໂຄສະນາ ແລະ ສົ່ງເສີມສິນຄ້າຍີ່ຫໍ້ລາວເຊິ່ງມີຕົວ ຢ່າງຂອງບັນດາປະເທດທີ່ປະສົບຜົນສຳເລັດໃນດ້ານນີ້ມາແລ້ວ.

ການສົ່ງເສີມສິນຄ້າຜ່ານການທ່ອງທ່ຽວແມ່ນແນວຄວາມຄິດທີ່ແທດ ເໝາະກັບຄວາມເປັນຈິງຢູ່ບ່ອນວ່າເມື່ອຄິດໃສ່ເຮົາບໍ່ວ່າໄປທ່ຽວໄສກໍຕ້ອງ ຄິດຢູ່ສະເໝີວ່າທ້ອງຖິ່ນຫຼືບ່ອນທີ່ເຮົາໄປນັ້ນມີສິນຄ້າຫຍັງແດ່ ທີ່ເປັນຕາຊື້ ນັບແຕ່ ເຄື່ອງທີ່ລະນຶກຈົນຮອດເຄື່ອງຕ້ອນຂອງຝາກອື່ນໆ.

ຖ້າບໍ່ເຫັນສິນຄ້າໃນສະຖານທີ່ທ່ອງທ່ຽວພວກເຮົາກໍຈະໄປເລາະເບິ່ງ ຕະຫຼາດ, ຮ້ານຄ້າຂອງທ້ອງຖິ່ນນັ້ນ, ຖ້າພວກເຮົາເຫັນສິນຄ້າທີ່ຜະລິດພາຍໃນປະເທດຫຼືໃນທ້ອງຖິ່ນກໍຈະສາມາດດຶງດູດຄວາມສົນໃຈໄດ້ຫຼາຍກວ່າສິນຄ້ານຳເຂົ້າອື່ນໆ ເພາະນັ້ນ ໝາຍເຖິງຄວາມເປັນເອກະລັກສະເພາະຂອງປະເທດ, ຂອງທ້ອງຖິ່ນ.

ແລ້ວລາວເຮົາມີສິນຄ້າທີ່ເປັນເອກະລັກຫຼືເປັນຮອດສັນຍາລັກແລ້ວ ຫຼື ບໍ່? ຖ້າມີຄົນຕ່າງປະເທດມາຢ້ຽມຢາມຕ້ອງຮູ້ໂລດວ່າສິນຄ້າທີ່ເຂົາເຈົ້າ ຄວນຊື້ກັບໄປປະເທດຫຼືອາດນຳໄປເຖິງການເປີດຕະຫຼາດຢູ່ຕ່າງປະເທດນັ້ນມີຫຍັງ?

ໃນປັດຈຸບັນສະພາອຸດສາຫະກຳແລະການຄ້າເພິ່ນໄດ້ສຸມໃສ່ສິນ ຄ້າ ສາມປະເພດຄືກາເຟ, ຊາແລະເຄື່ອງຫັດຖະກຳແຜ່ນແພ (ໄໝ) ແລ້ວພວກ ເຮົາຄິດວ່າຍັງມີສິນຄ້າໃດອີກແດ່ທີ່ເຫັນວ່າຈະກາຍເປັນສິນຄ້າຍີ່ຫໍ້ລາວທີ່ຈະໄດ້ຮັບຄວາມນິຍົມ ແລະ ສ້າງລາຍໄດ້ໃຫ້ປະເທດ?