ປີ 2020 ຄ່າກະແສໄຟຟ້າຈະມີການປ່ຽນແປງ
ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ວ່າ: ພາຍຫລັງລັດຖະບານໄດ້ມອບໝາຍໃຫ້ຂະແໜງພະລັງງານ ແລະ ບໍ່ແຮ່ສຶກສາລາຄາຄ່າກະແສໄຟຟ້າໃໝ່ນັບແຕ່ປີ 2017 ເປັນຕົ້ນມາ ໂດຍໄດ້ຮັບການສະໜັບສະໜູນຈາກທະນາຄານໂລກ ເພື່ອຄົ້ນຄວ້າວ່າລາຄາໃດມີຄວາມເໝາະສົມຕໍ່ຊີວິດການເປັນຢູ່ຂອງປະຊາຊົນໃນປັດຈຸບັນ ໂດຍສົມທຽບທາງດ້ານການເງິນທີ່ກູ້ຢືມມາພັດທະນາ.
ດັ່ງນັ້ນ ກະຊວງພະລັງງານ ແລະ ບໍ່ແຮ່ ໄດ້ເປັນເຈົ້າການໃນການສຶກສາຄ່າໄຟຟ້າຕື່ມ ໂດຍແຕ່ງຕັ້ງຄະນະລະດັບຊາດທີ່ມີຫລາຍຂະແໜງການກ່ຽວຂ້ອງເຂົ້າຮ່ວມເພື່ອຮັບຜິດຊອບວຽກງານນີ້ ຊຶ່ງຜ່ານມາແຜນປັບປຸງລາຄາຄ່າກະແສໄຟຟ້າໃນລາຄາດຽວ 700 ກີບ/ກິໂລວັດໂມງ ໄດ້ເອົາເຂົ້າຄົ້ນຄວ້າໃນກອງປະຊຸມນາຍົກ-ຮອງນາຍົກ ແລະ ກອງປະຊຸມລັດຖະບານເປີດກວ້າງ ຄັ້ງທີ I ມາແລ້ວໃນເດືອນມິຖຸນາ 2019 ແລະ ມາຮອດປັດຈຸບັນພວມຢູ່ໃນຂັ້ນຕອນສະຫລຸບສັງລວມການປັບປຸງໃໝ່ ເພື່ອສະເໜີຕໍ່ລັດຖະບານຄົ້ນຄວ້າພິຈາລະນາການປັບປຸງຄ່າກະແສໄຟຟ້າໃໝ່ອີກເທື່ອໜຶ່ງ ຊຶ່ງກະຊວງພະລັງງານ ແລະ ບໍ່ແຮ່ ຕ້ອງການທົດລອງນໍາໃຊ້ການເກັບຄ່າກະແສໄຟຟ້າໃໝ່ໃນລາຄາດຽວ ແຕ່ຕ້ອງພິຈາລະນາໃຫ້ເປັນລາຄາທີ່ເໝາະສົມ ແລະ ຍຸຕິທໍາທີ່ສຸດສໍາລັບຜູ້ທີ່ໃຊ້ໄຟຫລາຍ ແລະ ໃຊ້ໄຟໜ້ອຍ ເຊິ່ງຄາດວ່າຈະໄດ້ຮັບການຈັດຕັ້ງປະຕິບັດຢ່າງເປັນທາງການໃນຕົ້ນປີ 2020.
ປັດຈຸບັນ, ການຊົມໃຊ້ໄຟຟ້າປະເພດທີ່ຢູ່ອາໄສຢູ່ລາວມີ 6 ຂັ້ນ ຊຶ່ງແຕ່ລະຂັ້ນມີລາຄາທີ່ແຕກຕ່າງກັນ ເລີ່ມຈາກລາຄາຕ່ຳສຸດ 348-999 ກີບ/ກິໂລວັດໂມງ.
