10 ເຫດການຄາດຕະກໍາທີ່ສະເທືອນໃຈສັງຄົມໃນປີ 2019

    ໃນໜຶ່ງປີຜ່ານມາ, ສະພາບປະກົດການຫຍໍ້ທໍ້ຕ່າງໆໃນສັງຄົມ ໄດ້ເກີດຂຶ້ນຫລາຍລວມທັງການກໍ່ອາຊະຍາກໍາ ແລະ ການຄາດຕະກໍາ, ດັ່ງຂະນະດຽວກັນ ໜັງສືພິມລາວພັດທະນາ ໄດ້ສັງລວມ 10 ເຫດການຄາດຕະກຳທີ່ສ້າງຄວາມສະເທືອນໃຫ້ແກ່ສັງຄົມໃນປີຜ່ານມາຄື:

(1). ໃນວັນທີ 14 ສິງຫາ, ໄດ້ເກີດເຫດຄົນຮ້າຍໃຊ້ອາວຸດປືນຍິງທ້າວ ສຸກສະໄຫວ (ຕຸ້ຍ) ອາຍຸ 44 ປີ ຢູ່ບ້ານ ຊຽງຫວາງ ເມືອງ ໜອງບົກ ຈຸດເກີດເຫດແມ່ນ ຢູ່ສົ້ນຂົວບ້ານ ທ່າງາມ ເມືອງ ທ່າແຂກແຂວງຄຳມ່ວນ ເຮັດໃຫ້ຜູ້ກ່ຽວເສຍຊີວິດຄາທີ່ຢູ່ໃນລົດໃຫຍ່, ພາຍຫລັງເກີດເຫດເຈົ້າໜ້າທີ່ໄດ້ຕິດຕາມ ແລະ ສາມາດຈັບຄົນຮ້າຍທີ່ກໍ່ເຫດມາດຳເນີນຄະດີໄດ້ 2 ຄົນຄື: ທ້າວ ຄຳເພັດ ອາຍຸ 38 ປີ ຢູ່ບ້ານ ນາແກ ແລະ ທ້າວ ຄຳບົດ ອາຍຸ 41 ປີ ຢູ່ບ້ານ ໂນນອຸດົມ ນະຄອນໄກສອນພົມວິຫານ ແຂວງ ສະຫວັນນະເຂດ.

(2). ໃນວັນທີ 21 ພະຈິກ, ໄດ້ເກີດເຫດ ທ້າວ ສຸກສົມບັດ ອາຍຸ 35 ປີ ຢູ່ບ້ານ ຄອນໄຫຼ ນະຄອນຫລວງປາກ ແຂວງ ຈຳປາສັກ ກໍ່ເຫດຄາດຕະກຳ ໂດຍໃຊ້ຈົກທຸບຫົວຄົນຂ້າງເຮືອນຈົນມີຜູ້ເສຍຊີວິດຄາທີ່ 3 ຄົນ, ສາເຫດຍ້ອນຄຽດແຄ້ນວ່ານໍ້າສາຍຄາຈາກເຮືອນຜູ້ຕາຍຕົດໃສ່ດິນຂອງຕົນ.

(3). ໃນວັນທີ 29 ກໍລະກົດ ໄດ້ເກີດເຫດ ທ້າວ ຊາຍ ອາຍຸ 44 ປີ ໃຊ້ປືນ AK ຍິງແຟນສາວຊື່ນາງ ນໍ້າຝົນ ອາຍຸ 23 ປີ ຢູ່ບ້ານ ຊຽງດາ ເມືອງ ໄຊເສດຖາ ຈົນເສຍຊີວິດຄາທີ່ ກ່ອນທີ່ຜູ້ກ່ຽວຈະຍິງຕົນເອງເສຍຊີວິດນຳກັນ ສາເຫດຍ້ອນ ຄວາມຫຶງຫວງ,

(4). ວັນທີ 2 ກຸມພາ, ໄດ້ເກີດເຫດເສບຢາບ້າ ແລ້ວຂາດສະຕິໂມໂຫຜິດຖຽງກັບເມຍຢ່າງຮຸນແຮງກ່ອນຈະໃຊ້ມີດໄລ່ແທງ ແລະ ປາດຄໍເມຍຂອງຕົນເຫດຈົນເສຍຊີວິດ, ເຫດການດັ່ງກ່າວເກີດຂຶ້ນ ຢູ່ບ້ານ ໂພນໄຊ ເມືອງ ພຽງ ແຂວງ ໄຊຍະບູລີ, ຜູ້ຕ້ອງຫາຊື່ທ້າວ ນ້ອຍຖາ ອາຍຸ 50 ປີ.

(5). ໃນວັນທີ 28 ເມສາ ໄດ້ເກີດເຫດຄົນຮ້າຍໃຊ້ປືນ ຍິງນັກທຸລະກິດຊື່ ທ້າວ ຈຶກ ອາຍຸ 50 ປີ ຢູ່ບ້ານ ໂພນສະອາດ ເມືອງ ທ່າແຂກ ແຂວງ ຄຳມ່ວນ, ເຮັດໃຫ້ຜູ້ກ່ຽວເສຍຊີວິດຄາທີ່ ສາເຫດຍ້ອນຂັດແຍ່ງທາງດ້ານທຸລະກິດ,

(6). ໃນວັນທີ 19 ມິຖຸນາ ໄດ້ເກີດເຫດຊາຍອາຍຸ 29 ປີ ກໍ່ເຫດຄາດຕະກຳໂດຍໃຊ້ມີແທງໃສ່ຮ່າງກາຍແຟນສາວ ອາຍຸ 28 ປີ, ທີ່ເຮັດວຽກຢູ່ໂຮງແຮມແຫ່ງໜຶ່ງເຂດບ້ານ ຈຽງໄຈ ເມືອງ ສິງ ແຂວງ ຫລວງນໍ້າທາ ຈົນເສຍຊີວິດຄາທີ່, ສາເຫດຍ້ອນຄວາມຫຶງຫວງ,

(7). ໃນວັນທີ 22 ມີນາ, ໄດ້ເກີດທ້າວ ສີລຳພັນ ອາຍຸ 34 ປີ ຢູ່ບ້ານ ນາແກ່ ເມືອງ ໂພນທອງ ແຂວງ ຈຳປາສັກ, ກໍ່ເຫດໃຊ້ຈົກທຸບຕີງ່ອນເມຍຕົນເອງຈົນເສຍຊີວິດຄາທີ່ຢູ່ເຮືອນ ຍ້ອນຜິດຖຽງກັນ ແລະ ສົງໃສວ່າເມຍຫລີ້ນຊູ້.

(8). ວັນທີ 28 ພະຈິກ ເຈົ້າໜ້າທີ່ ປກສ ເມືອງ ຫາດຊາຍຟອງ ນະຄອນຫລວງວຽງຈັນ, ໄດ້ຮັບແຈ້ງວ່າ: ໄດ້ພົບສົບຜູ້ເສຍຊີວິດໄຫລມາຕາມແມ່ນ້ໍາຂອງ ແລະ ໄປຄ້າງຢູ່ແຄມຝັ່ງເຂດບ້ານ ຖິ່ນຕົມ, ຜ່ານການກວດສອບພົບວ່າເປັນເພດຊາຍ ອາຍຸປະມານ 30-40 ປີ, ສະພາບສົບຖືກມັດມື-ຕີນໄຂວຫລັງ ມີບາດແຜຕາມລຳຕົວ, ຊຶ່ງເຈົ້າໜ້າທີ່ຄາດວ່າ ອາດຈະຖືກຄາດຕະກຳ ຈາກບັນດາບ້ານທີ່ຢູ່ໄປທາງເຫນືອຕາມລຳແມ່ນໍ້າຂອງ.

(9). ໃນວັນທີ 13 ກັນຍາ ໄດ້ເກີດເຫດ ຜົວເສບຢາບ້າ ແລ້ວກໍ່ເຫດໃຊ້ປືນແກັບຍິງເມຍຕົນເອງຈົນເສຍຊີວິດຄາທີ່ຢູ່ບ້ານ ສົມສະຫວັນ ເມືອງ ໄຊທານີ ນະຄອນຫລວງວຽງຈັນ ສາເຫດຍ້ອນຜິດຖຽງກັບເມຍຢ່າງຮຸນແຮງ ແລະ ບໍ່ພໍໃຈທີ່ເມຍຈະຈັບຕົວເອງໄປບຳບັດຢາເສບຕິດ ຈຶ່ງກໍ່ເຫດຄາດຕະກຳ,

ແລະ (10). ໃນວັນທີ 19 ສິງຫາ ໄດ້ເກີດເຫດລູກລ້ຽງອາຍຸ 25 ປີ ກໍ່ເຫດຄາດຕະກຳໃຊ້ພ້າຟັນທີ່ຫົວແມ່ລ້ຽງອາຍຸ 71 ປີ ຢູ່ ແຂວງ ຈຳປາສັກ ກ່ອນຈະເອົາຕົວຫລົບໜີ ແລະ ຖືກເຈົ້າໜ້າທີ່ຈັບຕົວມາດຳເນີນຄະດີໄດ້ ສາເຫດແມ່ນເມົາຢາເສບຕິດ.