ນະຄອນຫລວງຈະເຂັ້ມງວດກວດກາ ເພື່ອບໍ່ໃຫ້ມີປາກົດການສວຍໂອກາດຂຶ້ນລາຄາສິນຄ້າໄລຍະສະຫລອງປີໃໝ່ 2020
ເມື່ອບໍ່ດົນມານີ້, ພະແນກອຸດສາຫະກໍາ ແລະ ການຄ້າ ນະຄອນຫລວງວຽງຈັນ ໄດ້ອອກແຈ້ງການໃຫ້ຫ້ອງການອຸດສາຫະກຳ ແລະ ການຄ້າ 9 ເມືອງ ແລະ ຜູ້ປະກອບການຈັດສັນຕະຫລາດແຫ່ງຕ່າງໆ ໃຫ້ເພີ່ມທະວີຄວາມເອົາໃຈໃສ່ການຕິດຕາມກວດກາລາຄາສິນຄ້າອຸປະໂພກ-ບໍລິໂພກໃນຊ່ວງໄລຍະສະເຫລີມສະຫລອງສົ່ງທ້າຍປີເກົ່າ 2019 ແລະ ຕ້ອນຮັບປີໃໝ່ 2020 ເພື່ອປ້ອງກັນບໍ່ໃຫ້ມີສະພາບສວຍໂອກາດຂຶ້ນລາຄາສິນຄ້າຂອງຊາວຄ້າຂາຍໃນໄລຍະດັ່ງກ່າວ ແລະ ຖ້າພົບເຫັນຜູ້ລະເມີດໃຫ້ມີມາດຕະການສຶກສາອົບຮົມ, ປັບໄໝ ຫລື ຍຶດສິນຄ້າຕາມກໍລະນີໜັກເບົາ, ພ້ອມທັງຮຽກຮ້ອງໃຫ້ຜູ້ປະກອບການ, ຊາວຄ້າຂາຍນຳເອົາສິນຄ້າຂອງຕົນອອກມາຈຳໜ່າຍໃນລາຄາທີ່ລັດກຳນົດໃຫ້ ໂດຍສະເພາະສິນຄ້າປະເພດຄວບຄຸມລາຄາເຊັ່ນ: ເຂົ້າ, ຊີ້ນ, ປາ ແລະ ສິນຄ້າອຸປະໂພກ-ບໍລິໂພກອື່ນໆ ເພື່ອໃຫ້ການສະໜອງສິນຄ້າມີພຽງພໍ ປະກອບສ່ວນເຮັດໃຫ້ການສະຫລອງສົ່ງທ້າຍປີເກົ່າ ແລະ ຕ້ອນຮັບປີໃໝ່ມີບັນຍາກາດເບີກບານມ່ວນຊື່ນ.
ແຈ້ງການດັ່ງກ່າວຍັງໄດ້ກຳນົດລາຄາຂາຍຍ່ອຍປະເພດຊີ້ນໝູປະເພດ 1 (ຊີ້ນກ້ອນ ແລະ ດູກຂ້າງ) ສູງສຸດບໍ່ໃຫ້ເກີນ 36.000 ກີບ, ຊີ້ນໝູປະເພດ 2 (ສາມຊັ້ນ-ຊີ້ນຕິດມັນ) ບໍ່ໃຫ້ເກີນ 34.000 ກີບຕໍ່ກິໂລ, ຊີ້ນງົວ-ຄວາຍບໍ່ໃຫ້ເກີນ 75.000 ກີບຕໍ່ກິໂລ ແລະ ປາກະຊັງບໍ່ໃຫ້ເກີນ 20.000 ກີບຕໍ່ກິໂລ.
