ອັດຕະປືຫັນລ້ຽງສັດແບບທໍາມະຊາດໄປສູ່ແບບວິິທະຍາສາດ
ທ່ານ ບຸນເສີດ ເສດທິລາດ ຫົວໜ້າພະແນກກະສິກໍາ ແລະ ປ່າໄມ້ ແຂວງອັດຕະປື ໄດ້ໃຫ້ຮູ້ວ່າ: ໃນມະຕິ X ຂອງອົງຄະນະພັກແຂວງ ໄດ້ກຳນົດແນວທາງຍຸດທະສາດ, ບາດກ້າວເດີນ ແລະ ແກ້ໄຂຄວາມທຸກຍາກຂອງປະຊາຊົນໃຫ້ມີການພັດທະນາ ໂດຍສອດຄ່ອງກັບເງື່ອນໄຂສະພາວະຄວາມເປັນຈິງຍິ່ງຂຶ້ນ, ໃນນັ້ນ ຂົງເຂດວຽກງານກະສິກຳ-ປ່າໄມ້ ໂດຍສະເພາະໃນສົກປີ 2019 ຜ່ານມາ ແຂວງອັດຕະປືໄດ້ຈັດສັນອາຊີບໃຫ້ເປັນຂະບວນການຜະລິດ ໂດຍສະເພາະຫັນການລ້ຽງສັດດ້ວຍຮູບແບບຈາກທຳມະຊາດໃຫ້ກາຍມາເປັນຮູບແບບນໍາໃຊ້ເຕັກນິິກວິທະຍາສາດທີ່ທັນສະໄໝ ເປັນຕົ້ນແມ່ນການລ້ຽງແບບຟາມ ເຊິ່ງທົ່ວແຂວງອັດຕະປືມີຄວາຍ 29.420 ກວ່າໂຕ, ງົວ 35.190 ກວ່າໂຕ, ໝູ 28.320 ກວ່າໂຕ, ແບ້ 7.950 ກວ່າໂຕ, ສັດປີກ 255.660 ໂຕ ມີຟາມລ້ຽງສັດແບບຄອບຄົວທັງໝົດ 41 ແຫ່ງ ລວມມີສັດລ້ຽງທັງໝົດ 37.700 ໂຕ ໃນນີ້ຄວາຍ 86 ໂຕ, ງົວ 2.569 ໂຕ, ໝູ 365 ໂຕ, ຟາມບາງແຫ່ງສາມາດຜະລິດລູກໝູໄດ້ 6.000 ໂຕຕໍ່ປີ, ມີແບ້-ແກະ 1.000 ໂຕ, ສັດປີກ 13.715 ໂຕ, ສະໜອງໄຂ່ໄດ້ 303 ແຕະຕໍ່ວັນ, ປາມີ 2,9 ລ້ານໂຕ ຜົນຜະລິດໄດ້ 106 ໂຕນ, ເດັ່ນກວ່າໝູ່ແມ່ນການລ້ຽງປາທີ່ນຳໃຊ້ເຕັກນິກຊີວະພາບ ສະເລ່ຍໄດ້ 40 ໂຕນຕໍ່ປີ, ໄດ້ມີການສົ່ງເສີມການປູກຫຍ້າເປັນອາຫານສັດທັງໝົດ 65 ເຮັກຕາ ສາມາດຜະລິດອາຫານສັດໄດ້ 40-50 ໂຕນ ຕໍ່ເດືອນ.
ທ່ານ ບຸນເສີດ ກ່າວຕື່ມວ່າ: ໃນຜ່ານມາ ພະແນກກະສິກຳ ແລະ ປ່າໄມ້ແຂວງໄດ້ເອົາໃຈໃສ່ຊຸກຍູ້ຊາວກະສິກອນ, ພາກສ່ວນທຸລະກິດຂະໜາດນ້ອຍ ໃຫ້ຫັນການລ້ຽງສັດແບບທໍາມະຊາດກ້າວໄປສູ່ການລ້ຽງສັດແບບ ນໍາໃຊ້ເຕັກນິິກວິທະຍາສາດທີ່ທັນສະໄໝ ເພື່ອຫັນການຜະລິດໃຫ້ໄດ້ຫຼາຍກາຍ ເປັນສິນຄ້າສົ່ງອອກພາຍໃນ ແລະ ຕ່າງປະເທດໃຫ້ເປັນຂະບວນຟົດຟື້ນ.
