ຄະນະແພດທະຫານກອງທັບ ລາວ- ຫວຽດນາມ ເປີດກິດຈະກໍາກວດ ແລະ ປິ່ນປົວສຸຂະພາບບໍ່ເສຍຄ່າຢູ່ແຂວງຜົ້ງສາລີ
ເນື່ອງໃນໂອກາດທີ່ສອງຊາດ ລາວ-ຫວຽດນາມ ຮ່ວມສະເຫລີມສະ ຫລອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ, ວັນສ້າງຕັ້ງກອງ ທັບປະຊາຊົນຫວຽດນາມ ຄົບຮອບ 75 ປີ ແລະ ວັນມູນເຊື້ອອາສາສະຫມັກ ຫວຽດນາມຊ່ວຍເຫລືອລາວ ຄົບຮອບ 70 ປີ ໃນວັນທີ 23 ທັນວານີ້ ທີ່ ແຂວງຜົ້ງສາລີ, ຄະນະແພດທະຫານກອງທັບປະຊາຊົນລາວ ແລະ ກອງ ທັບປະຊາຊົນຫວຽດນາມ ໄດ້ເປີດກິດຈະກຳກວດ ແລະ ປິ່ນປົວສຸຂະພາບໃຫ້ນາຍ ແລະ ພົນທະຫານ, ພະນັກງານລັດຖະກອນ ແລະ ປະຊາຊົນ ໂດຍບໍ່ເສຍຄ່າຢູ່ 3 ເມືອງ ຂອງແຂວງຜົ້ງສາລີ, ໂດຍການເຂົ້າຮ່ວມຂອງ ທ່ານ ທອງສີ ເສົາສຸລິພົມ ຮອງເຈົ້າແຂວງຜົ້ງສາລີ, ທ່ານ ພົນຕີ ວົງຄຳ ພົມມະກອນ ຫົວໜ້າກົມໃຫຍ່ພະລາທິການກອງທັບປະຊາຊົນລາວ, ທ່ານ ພົນຈັດຕະວາ ຫງວຽນ ວັນ ເກື່ອງ ຮອງຫົວໜ້າການເມືອງ ກົມໃຫຍ່ພະລາທິການກອງທັບປະຊາຊົນຫວຽດ ນາມ.
ທ່ານ ພັນເອກ ນາງ ວັນເພັງ ພວງສາວະດີ ຮອງຫົວໜ້າກົມເສນາຮັກ ກົມໃຫຍ່ພະລາທິການກອງທັບປະຊາຊົນລາວ ກ່າວວ່າ: ການຈັດກິດຈະກໍາ ການບໍລິການດ້ານການແພດຄັ້ງນີ້ ເປັນການເພີ່ມທະວີການຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງ ກອງທັບປະຊາຊົນລາວ ແລະ ກອງທັບປະຊາຊົນ ຫວຽດນາມ, ເວົ້າສະເພາະສອງກົມເສນາຮັກກອງທັບ ລາວ-ຫວຽດ ນາມ, ທັງເປັນການແລກປ່ຽນຖອດຖອນບົດຮຽນທາງດ້ານການແພດໃຫ້ມີຄວາມ ຊຳນິຊໍານານ ແລະ ຮັບປະກັນການປິ່ນປົວໃຫ້ວ່ອງໄວທັນການ ແລະ ມີປະ ສິດທິພາບ ເຊິ່ງກິດຈະກໍາໃນປີນີ້, ສອງຄະນະແພດກອງທັບ ລາວ-ຫວຽດ ນາມ ໄດ້ພ້ອມກັນສືບຕໍ່ໃຫ້ການບໍລິການດ້ານການແພດຢູ່ສາມເມືອງຂອງແຂວງ ຜົ້ງສາລີຄື: ເມືອງຂວາ, ເມືອງສໍາພັນ ແລະ ເມືອງໃຫມ່ ໂດຍໄດ້ເລັ່ງໃສ່ການກວດ ແລະ ປິ່ນປົວພະຍາດໃຫ້ແກ່ນາຍ ແລະ ພົນທະຫານ, ພະນັກງານລັດ ຖະກອນ, ປະຊາຊົນຜູ້ທີ່ເຈັບປ່ວຍໂດຍບໍ່ເສຍຄ່າ ເຊິ່ງປະກອບມີ: ພະແນກສຸກເສີນ, ພະແນກລະບົບທາງເດີນຫາຍໃຈ, ພະແນກຜ່າຕັດ, ພະແນກເດັກ, ພະແນກຊ່ອງປາກ, ພະແນກພັກຟື້ນ, ພະແນກກະດູກ, ພະແນກຫົວໃຈ, ພະແນກລະບົບທາງເດີນອາຫານ, ພະແນກຫູ, ຕາ, ດັງ, ຄໍ, ພະແນກຍິງ-ປະ ສູດ ແລະ ອື່ນໆ ເຊິ່ງມີປະຊາຊົນຢ່າງຫລວງຫລາຍເຂົ້າຮັບການກວດປິ່ນປົວພະຍາດ.
ໃນໂອກາດລົງເຄື່ອນໄຫວບໍລິການດ້ານການແພດຄັ້ງນີ້ ຍັງໄດ້ນຳເອົາອຸປະກອນການແພດ, ເຄື່ອງຮັບໃຊ້ຫ້ອງການ ແລະ ເຄື່ອງຊ່ວຍເຫລືອອື່ນໆຈຳນວນໜຶ່ງ ມາມອບໃຫ້ແຕ່ລະຈຸດທີ່ລົງເຄື່ອນໄຫວ ເພື່ອຊຸກຍູ້ສົ່ງເສີມໃຫ້ແພດໝໍຢູ່ເຂດດັ່ງກ່າວມີຄວາມຊຳນິຊຳນານໃນການນຳໃຊ້ເຄື່ອງມືການແພດ ໃຫ້ມີປະສິດທິພາບສູງ. ກິດຈະກຳດັ່ງກ່າວຈະດຳເນີນໄປຮອດວັນທີ 27 ທັນວາ 2019 ຈຶ່ງຈະສໍາເລັດລົງ.
