ລັດຫ້າມທຸກຂະແໜງການ ແລະ ທ້ອງຖິ່ນຮັບເອົາພະນັກງານທີ່ບໍ່ຜ່ານການສອບເສັງ
ໃນກອງປະຊຸມລັດຖະບານເປີດກວ້າງ ຄັ້ງທີ II ຂອງປີ 2019 ເມື່ອບໍ່ດົນມານີ້, ລັດຖະບານໄດ້ສັ່ງໃຫ້ບັນດາຂະແໜງການ ແລະ ທ້ອງຖິ່ນຫ້າມຮັບເອົາຜູ້ທີ່ບໍ່ໄດ້ສອບເສັງເຂົ້າເປັນລັດຖະກອນເດັດຂາດ ລວມເຖິງພະນັກງານອາສາສະໝັກ ແລະ ພະນັກງານຕາມສັນຍາ, ພ້ອມເນັ້ນໃຫ້ທຸກພາກສ່ວນດຳເນີນການສອບເສັງໃຫ້ມີຄວາມໂປ່ງໃສ, ສະເໝີພາບ ແລະ ຍຸຕິທຳ ບົນພື້ນຖານຄວາມຮູ້ຄວາມສາມາດ ແລະ ສອດຄ່ອງກັບມາດຖານຕຳແໜ່ງງານວ່າງ.
ກະຊວງພາຍໃນ ໃຫ້ຮູ້ວ່າ: ປີ 2020 ລັດຖະບານໄດ້ອະນຸມັດຕົວເລກລັດຖະກອນໃໝ່ຈຳນວນ 2.000 ຄົນ ຕາມມະຕິຂອງສະພາແຫ່ງຊາດໄດ້ຮັບຮອງ ໂດຍຈະຈັດສັນໃຫ້ຂົງເຂດສຶກສາ, ສາທາລະນະສຸກ ແລະ ທ້ອງຖິ່ນເປັນສ່ວນໃຫຍ່ ເຊິ່ງກະຊວງພາຍໃນຈະແບ່ງຕົວເລກລັດຖະກອນໃໝ່ນີ້ໃຫ້ຖືກຕ້ອງຕາມລະບຽບກົດໝາຍ ເພື່ອຮັບປະກັນການປະຕິບັດພາລະບົດບາດເປັນເສນາທິການໃຫ້ລັດຖະບານໃນວຽກງານນີ້ມີປະສິດທິຜົນສູງ.
ກະຊວງດັ່ງກ່າວໃຫ້ຮູ້ວ່າ: ມາຮອດປັດຈຸບັນ ພະນັກງານ-ລັດຖະກອນທົ່ວປະເທດມີທັງໝົດ 182.160 ກວ່າຄົນ (ຍິງ 84.730 ກວ່າຄົນ) ໃນນີ້ຢູ່ຂັ້ນສູນກາງມີ 26.380 ກວ່າຄົນ, ຂັ້ນແຂວງ 37.620 ຄົນ ແລະ ຂັ້ນເມືອງມີ 118.160 ກວ່າຄົນ, ໃນນັ້ນ ພະນັກງານ-ລັດຖະກອນຄູກວມ 42% ຂອງພະນັກງານ-ລັດຖະກອນທັງໝົດ ແລະ ມາຮອດປັດຈຸບັນ ກະຊວງພາຍໃນໄດ້ແຈກຢາຍບັດພະນັກງານ-ລັດຖະກອນຢູ່ຂັ້ນສູນກາງໄດ້ 39 ພາກສ່ວນ ແລະ ຢູ່ທ້ອງຖິ່ນ 1 ພາກສ່ວນ ລວມມີຈຳນວນ 10.495 ຄົນ.
