ຕຳຫລວດແຂວງຫົວພັນມ້າງເຄືອຂ່າຍຄ້າຢາເສບຕິດລາຍໃຫຍ່ ພ້ອມຂອງກາງເຮໂຣອິນ 43 ແທ່ງ
ແຫລ່ງຂ່າວທ້ອງຖິ່ນລາຍງານວ່າ: ເມື່ອບໍ່ດົນມານີ້, ເຈົ້າໜ້າທີ່ ປກສ ແຂວງຫົວພັນ ສາມາດມ້າງເຄືອຂ່າຍຄ້າຂາຍຢາເສບຕິດລາຍໃຫຍ່ຢູ່ເຮືອນພັກແຫ່ງໜຶ່ງໃນເຂດເທສະບານເມືອງຊຳເໜືອ ໄດ້ຈັບຕົວຜູ້ຕ້ອງຫາຄື: ທ້າວ ຢົວເລົາ ອາຍຸ 25 ປີ ຢູ່ບ້ານຈຽງຕອງ ເມືອງປາກທາ, ທ້າວ ຢາຊົງ ອາຍຸ 29 ປີ ບ້ານພຽງຍະ ເມືອງຮຸນ ແຂວງອຸດົມໄຊ, ທ້າວ ວາຊົງຢາ ອາຍຸ 32 ປີ, ທ້າວ ຢືເພັງທໍ່ ອາຍຸ 36 ປີ ຢູ່ບ້ານ ແລະ ເມືອງຊຳເໜືອ ພ້ອມຂອງກາງຢາເສບຕິດປະເພດເຮໂຣອິນ ຈຳນວນ 43 ແທ່ງ ຈຶ່ງໄດ້ຢຶດໄວ້ເປັນຫລັກຖານ ເພື່ອດຳເນີນຄະດີຕາມລະບຽບກົດໝາຍ.
ເຈົ້າໜ້າທີ່ໃຫ້ຮູ້ວ່າ: ພວກກ່ຽວແມ່ນເປົ້າໝາຍຕິດຕາມຂອງເຈົ້າໜ້າທີ່ມາດົນແລ້ວ ຈົນສາມາດຈັບຕົວພ້ອມຂອງກາງດັ່ງກ່າວ, ພ້ອມນີ້ຈະເລັ່ງສືບສວນຂະຫຍາຍຜົນຫາຜູ້ຮ່ວມຂະບວນການ ເພື່ອຈັບຕົວມາດຳເນີນຄະດີຕາມລະບຽບກົດໝາຍ.
