ທັບນັກກິລາວໍວີນາມລາວຄວ້າ 19 ຫຼຽນ ລາຍການຊີງແຊ້ມໂລກ ທີ່ກຳປູເຈຍ

ການແຂ່ງຂັນກີລາວໍວີນາມ ລາຍການຊິງແຊ້ມໂລກຄັ້ງທີ່ 6 ລະຫວ່າງວັນທີ 16-22 ທັນວານີ້ີ ທີ່ນະຄອນຫຼວງພະນົມເປັນ ປະເທດກຳປູເຈຍ ທັບນັກກິລາ ວໍວິນາມລາວ ຈຳນວນ 11 ຄົນ, ຍິງ 3 ຄົນ ສ້າງຜົນງານໄດ້ຢ່າງປະທັບໃຈ ຫຼັງຈາກຄວ້າ   1 ຫຼຽນຄຳ, 2 ຫຼຽນເງິນ ແລະ 16 ຫຼຽນທອງແດງ ໃນການແຂ່ງຂັນກິລາວໍວິນາມຄັ້ງນີ້  

ອີງຕາມການລາຍງານຂອງທ່ານ ວຽງສຸກ ຮັງເງິນ ຄະນະນຳ ແລະ ທັງເປັນຄູຝຶກນັກກິລາວໍວີນາມທີມຊາດລາວ ໄດ້ແຈ້ງໃຫ້ຮູ້ວ່າ: ໄດ້ສົ່ງຄະນະນຳ, ຄູຝຶກ ແລະ ນັກກິລາວໍວີນາມທີມຊາດລາວ ຈຳນວນ 11 ຄົນ, ຍິງ 3 ຄົນ ເຂົ້າຮ່ວມການແຂ່ງຂັນກິລາ ວໍວິນາມ ລາຍການຊິງແຊ໋ມໂລກ ຄັ້ງທີ 6 ປະຈຳປີ 2019 ຈັດຂຶ້ນທີ່ນະຄອນຫຼວງພະນົມເປັນ ປະເທດກຳປູເຈຍ ລະຫວ່າງ 16-22 ທັນວາ ຜ່ານມາໂດຍມີ 24 ປະເທດ ໃນທົ່ວໂລກ ເຂົ້າຮ່ວມແຂ່ງຂັນ

ສຳຫຼັບຜົນງານຂອງທັບນັກກິລາ ວໍວີນາມລາວ ສາມາດຍາດໄດ້ 1 ຫຼຽນຄໍາ,   2 ຫຼຽນເງິນ ແລະ 16 ຫຼຽນທອງ (ບໍ່ໄດ້ຫຼຽນພຽງ 3 ລາຍການ) ພ້ອມນີ້ຜົນງານ    1 ຫຼຽນຄໍາ ໄດ້ຈາກທ້າວ ໄພລັດ ທໍາມະວົງສາ ເຈົ້າຂອງ 2 ຫຼຽນຄຳຊີເກມ        ປີ 2011,2013 ແລະ ຫຼຽນຄໍາຊິງແຊ້ມອາຊີ 2018 ທີ່ມຽນມາ ລົງແຂ່ງຂັນປະເພດຟ້ອນດ່ຽວຊາຍປະກອບອຸປະກອນ, ສຳລັບ 2 ຫຼຽນເງິນ ໄດ້ຈາກ ນາງ ມາລາ ຈັນທະລັກສາ ລຸ້ນຕໍ່ສູ້ 48 ກິໂລກຣາມ ເຈົ້າຫຼຽນທອງ ໃນຊີເກມ 2019 ຈາກກິລາຄິກບ໊ອກຊິ້ງ ແລະ ຫຼຽນຄໍາໂວວີນາມ ລາຍການຊີງແຊ້ມອາຊີ 2018,ທ້າວ ໄຊຊະນະ ຮວ່າງລໍຄຳ ລຸ້ນຕໍ່ສູ້ 60 ກິໂລກຣາມ ປະເພດຕໍ່ສູ້ ພ້ອມກັນນັ້ນ ກໍ່ໄດ້ອີກ 16 ຫຼຽນທອງແດງ ທັງປະເພດຕໍ່ສູ້ ແລະ ປະເພດຟ້ອນ.

ທ່ານ ວຽງສຸກ ຮັງເງິນ ຍັງກ່າວຕື່ມວ່າ: ຈະບໍ່ຂໍແກ້ຕົວໃດໆສຳລັບຈຸດອ່ອນພື້ນຖານ ຂອງນັກກິລາລາວເຮົາ  ມີອາການເມື່ອຍຫຼາຍ ແລະ ຂາດກຳລັງ, ຂອບໃຈທຸກໆຢ່າງ ທຸກກຳລັງໃຈ ກຳລັງຊັບ ທີ່ສະໜັບສະໜູນພວກໂດຍດີ ຕະຫຼອດມາ, ພວກເຮົາຮັບປະກັນວ່າ ພວກເຮົາຈະກ້າວໄປຂ້າງໜ້າ ແລະ ສ້າງຜົນງານໃຫ້ອອກມາໄດ້ດີໃນງານຕໍ່ໆໄປ, ຝາກຕິດຕາມ ເຊຍພວກເຮົາແລ້ວຈະບໍ່ຜິດຫວັງ ເພາະຫົວໃຈພວກເຮົາໃຫຍ່ກວ່າຕັບແນ່ນອນ, ຈຸດພິເສດທີ່ສຳຄັນທີ່ສຸດ ແມ່ນພວກເຮົາຈະສືບຕໍ່ພັດທະນານັກກິລາຈຳນວນດັ່ງກ່າວນີ້ ສ້າງໃຫ້ເຂົາເຈົ້າເຂັ້ມແຂງ ເພື່ອກຽມຄວາມພ້ອມຮັກສາຟອມການເລ່ນ ແລະຝືກຊ້ອມເພື່ອເຂົ້າຮ່ວມງານກິລາ ຊີເກມ ຄັ້ງທີ 31 ທີ່ນະຄອນຫຼວງຮ່າໂນ້ຍ ສສ ຫວຽດນາມ ໃນປີ 2021.