ລາວເຜີຍແຜ່ນະໂຍບາຍ ແລະ ຍຸດທະສາດດ້ານນ້ຳ-ສຸຂາພິບານ

ເມື່ອທ້າຍອາທິດຜ່ານມານີ້, ກະຊວງສາທາລະນະສຸກ ໄດ້ຈັດກອງປະຊຸມເຜີຍນະໂຍບາຍ ແລະ ຍຸດທະສາດດ້ານນ້ຳ, ສຸຂາພິບານ ແລະ ອະນາໄມ ໃຫ້ຂະແໜງກ່ຽວຂ້ອງໃນແຕ່ລະທ້ອງຖິ່ນ ເພື່ອນຳໄປຈັດຕັ້ງຜັນຂະຫຍາຍໃນທ້ອງຖິ່ນຂອງຕົນໃຫ້ມີປະສິດທິຜົນ.

      ກອງປະຊຸມດັ່ງກ່າວ, ໂດຍການເປັນປະທານຮ່ວມຂອງ ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ທ່ານ ອອກຕີວຽນ ວິໂວນ ຜູ້ຕາງໜ້າອົງການອຸຍນີເຊັບ ປະຈຳລາວ, ມີພະນັກງານຂະແໜງສາທາລະນະສຸກ 18 ແຂວງ ທົ່ວປະເທດ, ຄູ່ຮ່ວມພັດທະນາ ແລະ ພາກສ່ວນທີ່ກ່ຽວ ຂ້ອງຕ່າງໆເຂົ້າຮ່ວມ.

      ໂອກາດນີ້, ທ່ານ ດຣ. ພູທອນ ເມືອງປາກ ໄດ້ມີຄໍາເຫັນວ່າ: ກອງປະຊຸມຄັ້ງນີ້, ເພື່ອໃຫ້ທຸກຄົນຮັບຮູ້ ແລະ ເຂົ້າໃຈ ເປັນເອກະພາບກັນ ໃນການນໍາເອົາວຽກງານດ້ານນໍ້າ, ສຸຂາພິບານ ແລະ ອະນາໄມ ໄປຈັດຕັ້ງປະຕິບັດໃຫ້ຖືກຕ້ອງຕາມແຜນນະໂຍບາຍ ແລະ ແຜນຍຸດທະສາດແຫ່ງຊາດ. ວຽກງານດັ່ງກ່າວແມ່ນເປັນບຸລິມະສິດຂອງລັດຖະບານ, ເວົ້າສະເພາະຂອງຂະແໜງການສາທາລະນະສຸກ. ຊຶ່ງມີຄວາມຈຳເປັນຕ້ອງໄດ້ມີນະໂຍບາຍ ແລະ ມີຍຸດທະສາດ ເພື່ອຄວາມສະດວກໃນການຈັດຕັ້ງປະຕິບັດວຽກງານ, ໂດຍໄດ້ຮັບການສະໜັບສະໜູນທາງດ້ານງົບປະມານ ແລະ ຊ່ຽວຊານໃນການນຳພາຂຽນນະໂຍບາຍ ແລະ ຍຸດທະສາດ ຈາກອົງການອຸຍນີເຊັບ ແລະ ປັດຈຸບັນ ເອກະສານດັ່ງກ່າວແມ່ນຢູ່ໃນຂັ້ນຕອນທີ່ອົງການອຸຍນີເຊັບກະກຽມການຈັດພິມ ເພື່ອແນໃສ່ ສະໜັບສະໜູນໃຫ້ປະຊາຊົນລາວ ໄດ້ຊົມໃຊ້ນ້ຳ, ສຸຂະພິບານທີ່ດີ ແລະ ປອດໄພ.