13 ວິທີຊ່ວຍລ້ຽງລູກໃຫ້ສະຫລາດ (II)
ສະບາຍດີ ເພື່ອນຜູ້ອ່ານ, ມື້ນີ້ພວກເຮົາສືບຕໍ່ມາຮູ້ຈັກ 13 ວິທີລ້ຽງລູກໃຫ້ສະຫລາດຕໍ່ຈາກວານນີ້ຄື:
4. ຜູ້ເປັນແມ່ຕ້ອງພະຍາຍາມເຮັດແນວໃດໃຫ້ລູກເຫັນວຽກທີ່ແມ່ກຳລັງເຮັດ ແລະ ຕ້ອງເຮັດຢ່າງຊ້າໆ:
ດັ່ງເວລາແມ່ຖູແຂ້ວ, ປ່ຽນເຄື່ອງນຸ່ງ, ມ້ຽນມັດສິ່ງຂອງ ແລະ ອະນາໄມເຮືອນຊານ… ຈົ່ງປ່ອຍໃຫ້ເດັກຕິດຕາມ, ຖ້າເປັນໄປໄດ້ກໍຄວນໃຫ້ເດັກລອງເຮັດເບິ່ງ ເຖິງວ່າສິ່ງນັ້ນຈະເຮັດໃຫ້ຜູ້ເປັນແມ່ເສຍເວລານຳ, ແຕ່ແນ່ນອນວ່າການຮຽນຮູ້ຂອງເດັກຈະງ່າຍດາຍ ແລະ ໄວກວ່າ.
5. ຄວນຫລີກເວັ້ນການນຳໃຊ້ໂທລະພາບ ຫລື ໄວແພດ (Ipad) ໃຫ້ເດັກເບິ່ງຢ່າງຕາມໃຈ, ເຖິງວ່າລາຍການນັ້ນຈະເຮັດສຳເລັດສະເພາະເດັກກໍຕາມ:
ໃນຊີວິດປະຈຳວັນ, ມີພໍ່ແມ່ບາງຄົນຍ້ອນອິດເມື່ອຍໃນວຽກງານແລ້ວເອົາ Ipad ຫລື ເປີດໂທລະພາບຢັດໃຫ້ລູກເບິ່ງຢ່າງບໍ່ສົນໃຈ ເພື່ອຕົນເອງໄດ້ພັກຜ່ອນ, ຖ້າເຮັດແນວນີ້ກໍຈະບໍ່ດີ ເດັກເບິ່ງໂທລະພາບຫລາຍຈະພາໃຫ້ເຂົາຮູ້ປາກຮູ້ເວົ້າຊ້າ ແລະ ບໍ່ຢາກສົນໃຈຕໍ່ສະພາບອ້ອມຕົວຂອງເດັກ.
6. ສອນລູກຮູ້ວິທີເລືອກ ແລະ ໃຫ້ສິດເດັກ:
ຕົວຢ່າງງ່າຍໆວ່າ: ແມ່ອາດຈັບເອົາເຄື່ອງຫລິ້ນໃດໜຶ່ງສອງອັນທີ່ມີສີສັນແຕກຕ່າງ ແລະ ໃນຂະນະນັ້ນກໍຍົກໃຫ້ເດັກເຫັນ ແລະ ຖາມວ່າ: ລູກມັກສີຫຍັງ ? ເຫລືອງ ຫລື ຂຽວ, ເມື່ອເດັກຈັບເອົາສິ່ງຂອງດັ່ງກ່າວແລ້ວ ຜູ້ເປັນແມ່ຈັບເອົາຄືນເຮັດໄປເຮັດມາຫລາຍເທື່ອ ແລະ ເຮັດເປັນເວລາດົນ ຈະຊ່ວຍໃຫ້ເດັກຈື່ຈຳສີ ກໍຄືລັກສະນະ ແລະ ຊື່ເອີ້ນຂອງເຄື່ອງຫລິ້ນດັ່ງກ່າວໄດ້ໄວ.
7. ປະໃຫ້ຜູ້ອື່ນໆອຸ້ມໄດ້:
ບໍ່ຄວນຫຶງຫວງລູກຕົນເອງຫລາຍເກີນໄປ ຂໍພຽງແຕ່ວ່າຜູ້ຢູ່ໃກ້ຄຽງເຮົານັ້ນເປັນຄົນສະອາດ, ບໍ່ມີພະຍາດຕິດແປດ, ເປັນຄົນມີຄວາມເຊື່ອໝັ້ນ ແລະ ຮູ້ອຸ້ມເດັກນ້ອຍໄດ້ດີ, ຜູ້ເປັນແມ່ກໍບໍ່ຄວນປະຕິເສດ ຄວນໃຫ້ເຂົາອຸ້ມເດັກໄດ້ຕາມໃຈ ເພາະເດັກຈະບໍ່ມີຈິດສຳນຶກວ່າຜູ້ອຸ້ມເຂົານັ້ນແມ່ນໃຜ, ຕຸ້ຍ ຫລື ຈ່ອຍ, ງາມ ຫລື ຂີ້ຮ້າຍ, ມ່ວນ ຫລື ງ່ວມເຫງົາ, ຖ້າເຮົາປ່ອຍໃຫ້ຜູ້ອື່ນອຸ້ມກໍຈະຊ່ວຍໃຫ້ເດັກສາມາດຊອກຮູ້ຈຸດພິເສດທີ່ແຕກຕ່າງຂອງແຕ່ລະຄົນໄດ້ດ້ວຍຕົນເອງ ແລະ ອີກສິ່ງໜຶ່ງກໍຈະຊ່ວຍໃຫ້ເດັກລຶ້ງກັບສະພາບຂອງຫລາຍຄົນໃນສັງຄົມໄດ້.
8. ໃຫ້ເດັກແຍງແວ່ນ ຈະຊ່ວຍກະຕຸ້ນຄວາມອາດສາມາດຮັບຮູ້ຂອງເດັກ:
ອະນຸຍາດໃຫ້ເດັກແຍງແວ່ນ ເດັກຈະໄດ້ເຫັນ ແລະ ສາມາດຊອກຮູ້ຕົນໂຕ ແລະ ຮ່າງກາຍຕົນເອງໄດ້ ແນ່ນອນວ່າໃນເບື້ອງຕົ້ນເດັກຈະບໍ່ສາມາດຮັບຮູ້ໄດ້ວ່າຄົນໃນແວ່ນນັ້ນແມ່ນຕົນເອງ, ແຕ່ຫລາຍເທື່ອຫລາຍທີ ມັນສະໝອງຂອງເດັກຈະໂອໂຕກໍ່ໃຫ້ເກີດຈິດສຳນຶກຮູ້ວ່າຜູ້ຢູ່ໃນແວ່ນນັ້ນແມ່ນໂຕເອງ, ເມື່ອເດັກຮັບຮູ້ໄດ້ແນວນັ້ນແລ້ວ ເຮົາທົດລອງເອົາສີທາເລັບແຕ້ມໃສ່ດັງຂອງເດັກ ແລ້ວສືບຕໍ່ໃຫ້ເດັກແຍງແວ່ນ, ຖ້າເຫັນວ່າເດັກເອົາມືລູບໃສ່ຮູບໃນແວ່ນນັ້ນແລ້ວກໍໝາຍວ່າເດັກຮັບຮູ້ໄດ້ວ່າພາຍໃນແວ່ນແມ່ນພາບຂອງຕົນ ແລ້ວຜູ້ເປັນແມ່ກໍຄວນສືບຕໍ່ເຮັດໄປເລື້ອຍໆ ກໍຈະຊ່ວຍໃຫ້ເດັກພັດທະນາຄວາມຮັບຮູ້ຂອງຕົນດີຂຶ້ນເລື້ອຍໆ.
9. ສອນລູກຮຽນຕື່ມ 1-2 ພາສາຕ່າງກັນ:
ຢ່າຄິດວ່າເດັກຍັງບໍ່ທັນສາມາດເວົ້າພາສາແມ່ຂອງຕົນໄດ້ຈະໄປສອນພາສາຝຣັ່ງ, ອັງກິດໄດ້ແນວໃດ, ແຕ່ຕົວຈິງ ຕາມຫລັກວິທະຍາສາດແລ້ວ ເດັກອາຍຸ 3-5 ປີແມ່ນໄລຍະທີ່ເໝາະສົມ ເພື່ອໃຫ້ເດັກຮຽນຕື່ມ 2-3 ພາສາອື່ນໄດ້ ແລະ ສິ່ງນີ້ກໍຈະບໍ່ເຮັດໃຫ້ເດັກຫລົງກັນລະຫວ່າງພາສາດັ່ງກ່າວດັ່ງຫລາຍຄົນຄິດ.
10. ຄວນປະປ່ອຍໃຫ້ເດັກສາມາດສຳຜັດກັບທຸກຢ່າງໄດ້:
ແຕ່ແນ່ນອນວ່າບາງອັນທີ່ມີຄວາມອັນຕະລາຍດັ່ງໄຟ, ນ້ຳຮ້ອນ ຫລື ຂອງແຫລມ, ມີດພ້າຕ່າງໆກໍຈະບໍ່ສາມາດໃຫ້ເດັກສຳຜັດໄດ້, ແຕ່ນອກຈາກນີ້ແລ້ວ ຜູ້ເປັນພໍ່ເປັນແມ່ກໍບໍ່ຄວນຕົກໃຈ ເມື່ອເຫັນລູກຕົນເອງເດ່ມືໄປຈັບເອົາຂີ່ດິນແຄມທາງ, ໄປຈັບເອົາແອບເຂົ້າ ຫລື ຕ່ອນຊີ້ນຕ່ອນປາ ຫລື ສິ່ງຂອງອື່ນໆ ເຮົາຄວນປ່ອຍໃຫ້ເດັກມີຄວາມສະບາຍໃຈໄດ້ສຳຜັດກັບສິ່ງຂອງເຫລົ່ານັ້ນ ເພື່ອຈະໄດ້ມີຄວາມຮູ້ສຶກກັບລະດັບ ແລະ ຮູບແບບຕ່າງໆຂອງມັນຢ່າງທຳມະຊາດ, ເຮົາພຽງຮັບປະກັນບໍ່ໃຫ້ເດັກເອົາສິ່ງຂອງເຫລົ່ານັ້ນປ່ອນເຂົ້າປາກຕົນເອງ.
11. ຕ້ອງຍິ້ມແຍ້ມແຈ່ມໃສຕໍ່ເດັກສະເໝີ:
ເຖິງວ່າຜູ້ເປັນພໍ່ເປັນແມ່ຈະຢູ່ໃນອາລົມທີ່ບໍ່ດີແນວໃດກໍບໍ່ຄວນໂຍນອາລົມນັ້ນລົງໃສ່ເດັກ ແລະ ກົງກັນຂ້າມ ຍາມໃດເຮົາກໍຕ້ອງມີຄວາມຍິ້ມແຍ້ມແຈ່ມໃສຕໍ່ເດັກສະເໝີ ເພາະເດັກສາມາດຮັບຮູ້ໄດ້ຢ່າງຈະແຈ້ງຕໍ່ອາລົມຈິດຂອງພໍ່ແມ່ ແລະ ຈອກນັ້ນເດັກກໍຈະໄດ້ຮັບຜົນສະທ້ອນຕາມມາ. ຖ້າແມ່ຢູ່ໃນອາລົມບໍ່ດີ, ໂສກເສົ້າ, ເສຍໃຈ ຫລື ໃຈຮ້າຍອື່ນໆ ເດັກກໍຈະມີອາລົມໂສກເສົ້າເຊັ່ນກັນ. ດັ່ງນັ້ນ ເຮັດແນວໃດກໍຕາມ ເຮົາຄວນສ້າງບັນຍາກາດອັນດີ, ມີຄວາມເບີກບານມ່ວນຊື່ນຕໍ່ເດັກສະເໝີ ແລະ ຈາກນັ້ນກໍຈະເຮັດໃຫ້ເດັກມີຄວາມສຸກ ແລະ ສະຫລາດດີຂຶ້ນ.
12. ຕ້ອງຮູ້ສ້າງບັນຍາກາດແບບຕະຫລົກ:
ເຊິ່ງເດັກສຸດທີ່ດີອົກດີໃຈເມື່ອເຫັນພໍ່ແມ່ຢອກເຂົາເຈົ້າດ້ວຍລັກສະນະທ່າທາງຕາຫລົກເຮຮາຕ່າງໆເຫລົ່ານັ້ນກໍຈະຊ່ວຍໃຫ້ເດັກເກີດອາລົມ ແລະ ຄວາມຮັບຮູ້ອັນດີຕໍ່ໂລກອ້ອມຕົວຂອງເຂົາເຈົ້າ.
13. ພະຍາຍາມໃຫ້ເດັກມີເງື່ອນໄຂດູດນົມແມ່ຍິ່ງດົນຍິ່ງດີ:
ຜູ້ຊ່ຽວຊານດ້ານການແພດເວົ້າວ່າ: ເມື່ອເດັກມີອາຍຸເຕັມອັດຕາ 1 ປີແລ້ວ ສາມາດຕັດບໍ່ໃຫ້ເດັກດູດນົມແມ່ກໍໄດ້, ແຕ່ຜ່ານຈາກການສຶກສາຄົ້ນຄວ້າໃນຫລາຍລະດັບລ້ວນແຕ່ສະຫລຸບໄດ້ວ່າ: ນົມແມ່ສາມາດຕອບສະໜອງທາດບຳລຸງທີ່ມີຜົນປະໂຫຍດຢ່າງຫລວງຫລາຍມາສູ່ເດັກ ແລະ ມີຄຸນຄ່າຢ່າງໃຫຍ່ຫລວງແກ່ການພັດທະນາມັນສະໝອງຂອງເດັກ.
