ປີນີ້ມີຝົນຕົກໜ້ອຍຢູ່ບັນດາປະເທດອ່າງແມ່ນ້ຳຂອງ
ຜູ້ຊ່ຽວຊານດ້ານຊັບພະຍາກອນນ້ຳ ກອງເລຂາຄະນະກຳມາທິການແມ່ນ້ຳຂອງສາກົນ (MRCS) ໃຫ້ຮູ້ວ່າ: ປີ 2019 ນີ້ ເປັນປີທີ່ມີປະລິມານນ້ຳຝົນຕົກໜ້ອຍທີ່ສຸດໃນຮອບຫລາຍປີຢູ່ບັນດາປະເທດອ່າງແມ່ນ້ຳຂອງ, ຕາມການຕິດຕາມສະຖິຕິປະລິມານນ້ຳຝົນໃນ 6 ເດືອນຕົ້ນປີນີ້ເຫັນວ່າປະລິມານນ້ຳຝົນທີ່ຕົກໃນອ່າງຮັບນ້ຳອູ ແຂວງຫລວງພະບາງ ໄດ້ຫລຸດລົງເຖິງ 41% ແລະ ສືບຕໍ່ຫລຸດລົງມາຢູ່ລະດັບ 29% ໃນຊ່ວງເດືອນກໍລະກົດຫາເດືອນກັນຍາ. ຂະນະດຽວກັນ ເຂດອ່າງຮັບນ້ຳງື່ມຈຸດແທກປະລິມານນ້ຳຝົນປາກກະຍຸງມີພຽງແຕ່ 1.086,3 ມິນລີແມັດ (ປີ 2014 ມີລະດັບ 1.937,5 ປີ 2015 ລະດັບ 2.109,8, ປີ 2016 ລະດັບ 1.564,6, ປີ 2017 ລະດັບ 1.376 ແລະ ປີ 2018 ລະດັບ 1.652,4 ມິນລີແມັດ). ຕົວເລກດັ່ງກ່າວສະແດງໃຫ້ເຫັນວ່າ ປະລິມານນ້ຳຝົນໃນອ່າງດັ່ງກ່າວແມ່ນໜ້ອຍຜິດປົກກະຕິ.
ຜູ້ຊ່ຽວຊານ ໃຫ້ຮູ້ວ່າ: ມາຮອດປັດຈຸບັນ ໂດຍສະເພາະເມື່ອມີສະພາວະອຸນຫະພູມສູງ ສົມທົບກັບປາກົດການແອລນີໂນ-ແອລນີນໂຢ (Elnino phenome none) ທີ່ມີກຳລັງແຮງຂຶ້ນ ຫລື ລົມມໍລະສຸມຕາເວັນອອກສຽງໃຕ້ທີ່ມີກຳລັງອ່ອນ ແມ່ນມັກຈະເກີດສະພາບແຫ້ງແລ້ງຢ່າງຮ້າຍແຮງ. ດັ່ງຕົວເລກຂອງກົມອຸຕຸນິຍົມ ແລະ ອຸທົກກະສາດຂອງລາວໄດ້ຕິດຕາມເຫັນວ່າ ປີ 2019 ໃນບໍລິເວນອ່າງແມ່ນ້ຳຂອງຕອນເທິງ (ແມ່ນ້ຳລ້ານຊ້າງ) ປະລິມານນ້ຳຝົນໃນຊ່ວງເດືອນເມສາ, ພຶດສະພາ, ມິຖຸນາ ແລະ ສິງຫາ ໄດ້ຫລຸດລົງ 43% ອັນໄດ້ເຮັດໃຫ້ລະດັບນ້ຳຂອງອ່າງເກັບນ້ຳຢູຈາດີຕູ້ (Yuzhadu Reservoir) ທີ່ນອນໃນສາຍນ້ຳຫລັກຂອງແມ່ນ້ຳລ້ານຊ້າງມີລະດັບພຽງແຕ່ 27 ກວ່າແມັດ ເຊິ່ງເຫັນວ່າຢູ່ໃນລະດັບຕໍ່າທີ່ສຸດ ແລະ ບັນຫາທີ່ພາໃຫ້ຝົນຕົກໃນປະລິມານໜ້ອຍນີ້ແມ່ນເກີດຈາກສະພາວະໂລກຮ້ອນທີ່ສົ່ງຜົນກະທົບຕໍ່ຄວາມສົມດູນຂອງສະພາບອາກາດມີການປ່ຽນແປງ ແລະ ປະເທດໃດຫາກບໍ່ມີການບໍລິຫານຈັດການນ້ຳທີ່ດີກໍຈະໄດ້ຮັບຜົນກະທົບໜັກຕໍ່ການຜະລິດກະສິກຳ ແລະ ການດຳລົງຊີວິດຂອງປະຊາຊົນ ກໍຄືກະທົບຕໍ່ການພັດທະນາຂອງປະເທດນັ້ນໆ.
