ລາວ-ໄທ ສືບຕໍ່ຮັດແໜ້ນສາຍພົວພັນຮ່ວມມືທາງດ້ານທຸລະກິດ

ໃນວັນທີ 17 ທັນວາ ນີ້, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານນາງ ຈິລາພອນ ຂາວສະຫວັດ ປະທານເຈົ້າໜ້າທີ່ຜູ້ບໍລິຫານ ແລະ ອໍານວຍການໃຫຍ່ ບໍລິສັດ ປຕທ ນ້ຳມັນ ແລະ ການຄ້າປລີກ ຈຳກັດ (ມະຫາຊົນ) ແຫ່ງປະເທດໄທ ພ້ອມດ້ວຍຄະນະ, ເນື່ອງໃນໂອກາດຢ້ຽມຢາມ ແລະ ເຮັດວຽກຢູ່ລາວ.

ໃນກາດດັ່ງກ່າວ, ທ່ານນາງ ເຂັມມະນີ ພົນເສນາ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ຄະນະດັ່ງກ່າວ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ລາວຄັ້ງນີ້, ຊຶ່ງເປັນການຊຸກຍູ້້ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ-ໄທ ເວົ້າສະເພາະແມ່ນການສົ່ງເສີມການລົງທຶນ ແລະ ຂະຫຍາຍທຸລະກິດຂອງບໍລິສັດໄທຢູ່ລາວ. ພ້ອມນີ້, ສອງຝ່າຍໄດ້ປຶກສາຫາລືກ່ຽວກັບສະພາບການດດຳເນີນທຸລະກິດນ້ຳມັນເຊື້ອໄຟຂອງບໍລິສັດ ປຕທ ຢູ່່ລາວໃຫ້ເຕີບໃຫຍ່ເຂັ້ມແຂງ ປະກອບສ່ວນສໍາຄັນເຂົ້າໃນການພັດທະນາເສດຖະກິດຂອງສອງປະເທດ ລາວ-ໄທ ໄດ້ນັບມື້ຂະຫຍາຍຕົວ.