ຕັດສິນປະຫານຊີວິດ ອະດີດປະທານາທິບໍດີປາກິດສະຖານ
ສານພິເສດອິດສະລາມາບັດຕັດສິນປະຫານຊີວິດອະດີດປະທານາທິບໍດີ ເປີເວດ ມູຊາຣາຟ ແຫ່ງປາກິດສະຖານ ຕາມຄວາມຜິດໃນຂໍ້ຫາ ທໍລະຍົດຕໍ່ປະເທດຊາດ ເປັນການຕັດສິນລັບຫລັງ ເພາະອະດີດຜູ້ນຳປາກິດສະຖານລີ້ໄພຕົນເອງຢູ່ຕ່າງປະເທດ.
ວິທະຍຸປາກິດສະຖານ ລາຍງານໃນວັນທີ 17 ທັນວານີ້ວ່າ: ສານພິເສດອິດສະລາມາບັດ ໄດ້ຕັດສິນລົງໂທດປະຫານຊີວິດ ພົນເອກ ເປີເວດ ມູຊາຣາຟ ອະດີດປະທານາທິບໍດີແຫ່ງປາກິດສະຖານ ຕາມຄວາມຜິດໃນຂໍ້ຫາ ທໍລະຍົດຕໍ່ປະເທດຊາດ ດ້ວຍການສັ່ງຍົກເລີກກົດໝາຍລັດຖະທຳມະນູນ ແລະ ປະກາດສະຖານະການສຸກເສີນ ໃນປີ 2007 ເຊິ່ງຜົນຈາກການກະທຳດັ່ງກ່າວນຳມາສູ່ການຊຸມນຸມປະທ້ວງຕໍ່ຕ້ານ ພົນເອກ ມູຊາຣາຟ ແລະ ເຮັດໃຫ້ທ່ານຕັດສິນໃຈລາອອກຈາກຕຳແໜ່ງ ເພາະຕ້ອງຜະເຊີນກັບການຖືກຖອດຖອນອອກຈາກຕຳແໜ່ງຕາມຄວາມຜິດໃນຂໍ້ຫາຮ້າຍແຮງ.
ຖືເປັນການຕັດສິນຄະດີທີ່ບໍ່ຄ່ອຍເກີດຂຶ້ນ ເພາະປົກກະຕິກອງທັບມັກຈະໄດ້ຮັບການຄຸ້ມຄອງຈາກການຖືກດຳເນີນຄະດີ ແລະ ຍັງເປັນການຕັດສິນລັບຫລັງ ເພາະ ພົນເອກ ມູຊາຣາຟ ໄດ້ລີ້ໄພຕົນເອງໄປຢູ່ຕ່າງປະເທດ ຫລັງຄຳສັ່ງຫ້າມເດີນທາງອອກນອກປະເທດຖືກຍົກເລີກ ໃນປີ 2016 ເຮັດໃຫ້ທ່ານຂໍເດີນທາງໄປປິ່ນປົວຢູ່ຕ່າງປະເທດ ເຊິ່ງປັດຈຸບັນອະດີດຜູ້ນຳປາກິດສະຖານ ອາຍຸ 76 ປີ ອາໄສຢູ່ລະຫວ່າງດູໄບ ໃນສະຫະລັດ ອາຣັບ ເອມິເຣດ ກັບ ນະຄອນຫລວງລອນດອນ ຂອງອັງກິດ.
