ຄຳເວົ້າເປັນພຽງທິດສະດີໝາກຜົນຄືພຶດຕິກຳຕົວຈິງ
ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໄດ້ສຳເລັດໄປຫລາຍວັນແລ້ວ, ແຕ່ກິ່ນອາຍຂອງກອງປະຊຸມດັ່ງກ່າວຍັງຝັງຢູ່ໃນຄວາມຊົງຈຳຂອງຄົນຈຳນວນບໍ່ໜ້ອຍ ໂດຍສະເພາະແມ່ນຜູ້ທີ່ມັກສົນໃຈ, ມັກຟັງ, ມັກຕິດຕາມຂ່າວຄາວ, ສະພາບຄວາມເປັນມາ ແລະ ເປັນໄປຂອງເຫດການບ້ານເມືອງ. ສ່ວນຫລາຍໃຜກໍອອກປາກວ່າ: ກອງປະຊຸມສະພາຄັ້ງນີ້ກາຍເປັນມິຕິໃໝ່, ມີບັນຍາກາດ ແລະ ມີປະຊາທິປະໄຕໂປ່ງໃສຂຶ້ນຫລາຍ. ນີ້ແມ່ນສຽງໂຈເຈໂສເຫລ້ຊີງກັນເວົ້າໃນສະພາກາເຟ. ສະເພາະ ທິດກໍ່າ ເອງ ໃນຖານະເປັນຄົນຂອງສື່ ກໍໄດ້ເອົາໃຈໃສ່ຕິດຕາມຕັ້ງແຕ່ຕົ້ນຈົນຈົບ ເຫັນຫລາຍອັນຫລາຍບັນຫາທີ່ຢາກຍິບຍົກເອົາມາວິເຄາະເຈາະເລິກສູ່ກັນອ່ານ ເພື່ອເຈຍລະໄນໃຫ້ໄດ້ປະໂຫຍດ.
ຕ້ອງຍອມຮັບວ່າ: ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໄດ້ຮັບຜົນສຳເລັດເປັນຢ່າງດີ ແລະ ເປັນທີ່ພໍໃຈໄປຕາມວາລະໄດ້ກຳນົດໄວ້. ພິເສດ ນອກຈາກມີການຮັບຮອງເອົາບັນດາກົດໝາຍສະບັບປັບປຸງຫລາຍສະບັບແລ້ວ ຍັງໄດ້ຮັບຮອງເອົາກົດໝາຍໃໝ່ ເຊິ່ງລວມເຖິງ 8 ສະບັບ ແລະ ຮັບຮອງເອົາມະຕິຕ່າງໆຂອງສະພາໄດ້ເຖິງ 11 ສະບັບ ນັບທັງໄດ້ສະຫລຸບຕີລາຄາວຽກງານຂອງລັດຖະບານໃນໜຶ່ງປີຜ່ານມາ ແລະ ວາງແຜນພັດທະນາເສດຖະກິດ-ສັງຄົມ ສຳລັບປີ 2020 ທີ່ຈະຕ້ອງໄດ້ບຸກທະລຸສູ້ຊົນໃຫ້ມີໝາກມີຜົນຕາມແຜນທີ່ໄດ້ຄາດກະເອົາໄວ້. ໃນໜຶ່ງປີຜ່ານມາ ຕ້ອງຍອມຮັບວ່າປະເທດຊາດຂອງພວກເຮົາໄດ້ປະສົບບັນຫາ ແລະ ມີສິ່ງທ້າທາຍຫລາຍດ້ານ ເປັນຕົ້ນຖືກໄພນ້ຳຖ້ວມ 2 ແຂວງພາກກາງ ແລະ 4 ແຂວງພາກໃຕ້, ບັນຫາເສດຖະກິດບໍ່ບັນລຸຕາມເປົ້າ. ໃນແຜນຄາດຄະເນໃນປີ 2019 ຕ້ອງໃຫ້ໄດ້ 6,5% ຂຶ້ນໄປ ແຕ່ກໍໄດ້ພຽງ 6,4% ຍ້ອນມີຫລາຍອັນມາກະທົບ, ການເກັບລາຍຮັບກໍບໍ່ບັນລຸຕາມເປົ້າ, ເກີດປາກົດການສໍ້ລາດບັງຫລວງໃນຖັນແຖວພະນັກງານລັດຢ່າງແຜ່ລາມກວ້າງຂວາງ, ຜົນກວດກາລັດເຫັນຕົວເລກເສຍຫາຍຢ່າງຫລວງຫລາຍ, ບັນຫາຢາເສບຕິດ, ບັນຫາເງິນກີບອ່ອນຄ່າຢ່າງໜ້າວິຕົກ, ການຂາດດຸນການຄ້າ, ການຜະລິດຂະໜາດນ້ອຍ ແລະ ຂະໜາດກາງບໍ່ທັນເຂັ້ມແຂງ ແລະ ບັນຫາປາກົດການຫຍໍ້ທໍ້ອື່ນໆ. ກ່າວເຖິງສະພາບພາຍນອກ ເສດຖະກິດຂອງໂລກມີການຜັນຜວນ, ເກີດສົງຄາມການຄ້າລະຫວ່າງຈີນກັບສະຫະລັດອາເມລິກາ ຈົນເຮັດໃຫ້ປະເທດຊາດຂອງພວກເຮົາມີຜົນກະທົບບໍ່ໜ້ອຍ.
ແນວໃດກໍຕາມ, ຜ່ານກອງປະຊຸມສະພາຄັ້ງນີ້ ພວກເຮົາສາມາດເຫັນໄດ້ຫລາຍບັນຫາໃນຫລາຍຂົງເຂດທີ່ຈະຕ້ອງບຸກທະລຸແກ້ໄຂໃຫ້ໄດ້ຕາມແຜນພັດທະນາເສດຖະກິດ-ສັງຄົມ ໃນປີ 2020 ວາງອອກ. ອັນທີ່ພິເສດສຸດໃນວາລະກອງປະຊຸມ ມີຜູ້ແທນຫລາຍທ່ານ, ຫລາຍສະຫາຍໄດ້ປະກອບຄຳເຫັນຊັກຖາມແບບຈົງແຈ້ງສ້າງສັນຈິງໃຈ ແລະ ມີປະຊາທິປະໄຕຢ່າງເຕັມສ່ວນ ອັນເປັນການຍົກໃຫ້ເຫັນບັນດາຈຸດອ່ອນ, ຄົງຄ້າງຊ່ອງໂວ່ທີ່ຈະຕ້ອງໄດ້ສູ້ຊົນແກ້ໄຂໃຫ້ເປັນຮູບປະທຳໃນຕໍ່ໜ້າ. ພິເສດອີກອັນໜຶ່ງ ໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຄັ້ງນີ້ ຍັງມີການປະເມີນຜົນບຸກຄະລາກອນຜູ້ດຳລົງຕຳແໜ່ງອັນເປັນປະຫວັດການ, ມາດຕະການຄັ້ງທຳອິດທີ່ພິເສດໃຫ້ເຫັນເຖິງຄຸນທາດການເມືອງ, ຄວາມສັດຊື່ບໍລິສຸດ ແລະ ຄວາມຮັບຜິດຊອບໃນໜ້າທີ່ການງານຂອງພະນັກງານການນຳທີ່ຈະຕ້ອງໄດ້ເປັນແບບຢ່າງນຳໜ້າ ໃຫ້ສົມກັບວ່າຕົນເອງເປັນຫົວຈັກຫລັກແຫລ່ງໃນການຄຸ້ມຄອງລັດ, ຄຸ້ມຄອງສັງຄົມ ແລະ ທັງສະແດງໃຫ້ເຫັນເຖິງການນຳພາແນວຄິດ ທັງມີຄວາມຮັບຜິດຊອບຢ່າງໂປ່ງໃສຕໍ່ພາລະກິດທີ່ຕົນຮັບຜິດຊອບ.
ແນວໃດກໍດີ, ຜ່ານການຕິດຕາມນັບແຕ່ຕົ້ນຈົນຈົບ ການປະກອບຄຳເຫັນບັນຫາຕ່າງໆຕໍ່ບັນດາປາກົດການຫຍໍ້ທໍ້ທີ່ພົ້ນເດັ່ນໃນແຕ່ລະຂົງເຂດຕໍ່ລັດຖະບານນັ້ນ ສ່ວນຫລາຍມຸ້ງເປົ້າໄປໃນທາງຕັ້ງບັນຫາຊັກຖາມລັດຖະບານຫລາຍກວ່າການຊອກວິທີທາງອອກຊ່ວຍລັດຖະບານໃນຖານະເຮົາເອງເປັນ ສສຊ ເປັນຫຍັງຈຶ່ງວ່າແນວນັ້ນ ? ຍ້ອນວ່າ ສສຊ ມີອຳນາດທາງດ້ານນິຕິບັນຍັດ, ອຳນາດບໍລິຫານ ແລະ ຕຸລາການເໝືອນດັ່ງມີອາວຸດສາມບາດຄ້ອນຢູ່ໃນກຳມື ເພື່ອນຳໃຊ້ໃຫ້ມີຄວາມສັກສິດໃນການປະສານງານກວດກາກວດສອບກັບອົງການກ່ຽວຂ້ອງຢູ່ຂັ້ນສູນກາງ ແລະ ທ້ອງຖິ່ນ. ໃນຕົວຈິງຜ່ານມາ ຢູ່ໃນກົງຈັກບໍລິຫານຂອງພັກ-ລັດຖະບານກໍໄດ້ມີໜ່ວຍງານ, ຂະແໜງການທີ່ເປັນເສນາທິການຄົບຊຸດທີ່ເປັນເຄື່ອງມືຜະເດັດການກຳມະຊີບ. ຍົກຕົວຢ່າງອົງການກວດສອບຂອງພັກ-ລັດຖະບານແຕ່ລະຂັ້ນ, ກົມກວດກາພັກ, ກວດກາລັດ ນັບແຕ່ຂັ້ນສູນກາງລົງຮອດທ້ອງຖິ່ນ. ສ່ວນກົງຈັກຂອງສະພານັ້ນ ກໍນັບແຕ່ຂັ້ນສະພາແຫ່ງຊາດຈົນຮອດສະພາຂັ້ນແຂວງ, ກຳແພງນະຄອນ ແຕ່ເປັນຫຍັງໃນເມື່ອເກີດປາກົດການຫຍໍ້ທໍ້ຕ່າງໆຈຶ່ງບໍ່ຮ່ວມກັນແກ້, ບໍ່ພາກັນເຮັດແຕ່ລຸ່ມຂຶ້ນເທິງ ຫລື ແຕ່ເທິງລົງລຸ່ມ. ສະຫລຸບແລ້ວ ມັນກໍຄາຢູ່ບ່ອນວ່າ: ໄກ່ເຫັນຕີນງູ ງູເຫັນຕີນໄກ່, ບໍ່ຢາກແກ້, ບໍ່ກ້າແກ້ ເໝືອນດັ່ງທ່ານນາຍົກ ທອງລຸນ ສີສຸລິດ ວ່າ. ເທົ່າທີ່ ທິດກໍ່າ ໄດ້ຕິດຕາມຟັງການປະກອບຄຳເຫັນຂອງ ສສຊ ບາງທ່ານມີແຕ່ຕັ້ງບັນຫາຊັກຖາມລັດຖະບານ ຍັງບໍ່ທັນສ່ອງແສງເຖິງພຶດຕິກຳຕົວຈິງທີ່ໄດ້ມາຈາກຜົນງານຂອງ ສສຊ ເອງ ທີ່ໄດ້ນຳເອົາສິ່ງຍອດຍິ່ງຂໍ້ມູນຫລັກຖານອັນຊັດເຈນຈາກທ້ອງຖິ່ນໃນຊີວິດຈິງຂອງປະຊາຊົນໃນເຂດເລືອກຕັ້ງຂອງຕົນ ເພື່ອມາສະເໜີແກ້ໄຂ, ຄວາມຮຽກຮ້ອງຕ້ອງການຂອງປະຊາຊົນທີ່ຍັງທຸກຍາກລຳບາກ, ຄຳເວົ້າ ແລະ ກົດໝາຍເປັນພຽງທິດສະດີ ແລະ ນິຕິກຳ, ການປະຕິບັດຕົວຈິງຢ່າງເຂັ້ມງວດເດັດຂາດສັກສິດ ຄືຜົນໄດ້ຮັບຈາກພຶດຕິກຳ.
