ຜູ້ຊ່ຽວຊານດ້ານນ້ຳແນະນຳ ສປປ ລາວ ຄວນສ້າງອ່າງເກັບນ້ຳໃຫ້ຫລາຍ ເພື່ອຮັບມືໄພນ້ຳຖ້ວມ ແລະ ແຫ້ງແລ້ງ
ຄະນະວິຊາການອາວຸໂສດ້ານຊັບພະຍາກອນນ້ຳ ກອງເລຂາຄະນະກຳມາທິການແມ່ນ້ຳຂອງສາກົນ (MRCS) ໄດ້ແນະນຳບັນດາປະເທດລຸ່ມແມ່ນ້ຳຂອງຄວນມີແຜນສ້າງອ່າງເກັບນ້ຳທີ່ດີ ເພື່ອຮັບມືກັບໄພນ້ຳຖ້ວມ ແລະ ໄພແຫ້ງແລ້ງໃນອະນາຄົດທີ່ໄດ້ຮັບຜົນກະທົບຈາກສະພາບໂລກຮ້ອນ ໂດຍສະເພາະ ສປປ ລາວເຮົາ. ຜູ້ຊ່ຽວຊານໄດ້ແນະນຳໃຫ້ມີການສຶກສາ ແລະ ດຳເນີນການກໍ່ສ້າງອ່າງເກັບນ້ຳຢູ່ທ້ອງຖິ່ນຕ່າງໆ ພ້ອມທັງສ້າງຍຸດທະສາດ ແລະ ແຜນດຳເນີນງານໃນການບໍລິຫານຈັດການນ້ຳຢູ່ແຕ່ລະອ່າງຮັບນ້ຳ ແລະ ປັບປຸງລະບົບຊົນລະປະທານ ໂດຍສະເພາະຢູ່ບັນດາເຂື່ອນໄຟຟ້າຢ່າງເປັນລະບົບ, ທົບທວນ ແລະ ປັບປຸງກົງຈັກການຈັດຕັ້ງບຸກຄະລາກອນໃຫ້ມີຄວາມເຂັ້ມແຂງ ໂດຍການຜັນຂະຫຍາຍກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳຢ່າງເປັນຮູບປະທຳ, ສືບຕໍ່ເພີ່ມທະວີການຮ່ວມມືກັບພາກພື້ນ ແລະ ສາກົນ ໂດຍຖືເອົາໄພແຫ້ງແລ້ງ ແລະ ໄພນ້ຳຖ້ວມເປັນສະໜາມຮົບໜຶ່ງ ເພື່ອປ້ອງກັນຜົນກະທົບຕໍ່ການດຳລົງຊີວິດຂອງປະຊາຊົນ ກໍຄືການພັດທະນາເສດຖະກິດ-ສັງຄົມຂອງຊາດໃຫ້ໄປຕາມທິດຍືນຍົງ.
ຜູ້ຊ່ຽວຊານດັ່ງກ່າວໃຫ້ຮູ້ວ່າ: ການຮັບມືກັບໄພນ້ຳຖ້ວມ ແລະ ໄພແຫ້ງແລ້ງທີ່ດີນັ້ນ ແມ່ນການສ້າງມາດຕະການປ້ອງກັນ ແລະ ການປົກປັກຮັກສາທີ່ດີ ກໍຄືການສ້າງອ່າງເກັບນ້ຳໃຫ້ພຽງພໍ ເພື່ອສາມາດປ້ອງກັນນ້ຳຖ້ວມທີ່ເກີດຂຶ້ນຊົ່ວຄາວ ທັງສາມາດເກັບຮັກສານ້ຳເພື່ອໃຊ້ໃນກໍລະນີເກີດໄພແລ້ງ. ປັດຈຸບັນ ຢູ່ ສປປ ລາວ ການສ້າງອ່າງເກັບນ້ຳຊ່ວງ ແລະ ອ່າງເກັບນ້ຳຫຸມ ກໍແມ່ນຕົວແບບທີ່ດີ. ສະນັ້ນ ຢູ່ທຸກເມືອງ ແລະ ທ້ອງຖິ່ນຕ່າງໆ ຄວນສ້າງອ່າງເກັບນ້ຳຂະໜາດໃຫຍ່ໄວ້ ໄປຄຽງຄູ່ກັບການປົກປັກຮັກສາປ່າໄມ້ ເຊິ່ງວິທີນີ້ແມ່ນບັນດາປະເທດຕ່າງໆທີ່ພັດທະນາໃນໂລກເຊັ່ນ: ສະຫະລັດອາເມລິກາ, ສປ ຈີນ, ນອກແວ, ສະວິດ ແລະ ບັນດາປະເທດໃນເອີຣົບ ໄດ້ນຳໃຊ້ຢ່າງມີປະສິດທິຜົນມາແລ້ວ.
