ເບິ່ງຕື່ມເລື່ອງປິດຖະໜົນຫລວງ ເພື່ອວຽກສ່ວນບຸກຄົນ
ສະບາຍດີ ເພື່ອນຜູ້ອ່ານທີ່ຮັກແພງ, ມື້ນີ້ ທ່ຽງທຳ ຂໍແລກປ່ຽນຕື່ມກ່ຽວກັບປາກົດການປິດຖະໜົນໃນຕົວເມືອງ ເພື່ອເຮັດກິດຈະກຳໃດໜຶ່ງຂອງສ່ວນບຸກຄົນ ເຊິ່ງປາກົດການດັ່ງກ່າວໃນປັດຈຸບັນມັກເກີດຂຶ້ນຫລາຍໃນຕົວເມືອງໃຫຍ່ຕ່າງໆ ໂດຍສະເພາະກໍແມ່ນຂອບເຂດຕົວເມືອງຫລວງເຮົາ ຈະແມ່ນປິດເພື່ອງານລ້ຽງສ້າງສັນໃດໜຶ່ງໃນໂອກາດເປີດກິດຈະກຳໃໝ່ ຫລື ການສະເຫລີມສະຫລອງຜົນສຳເລັດຂອງພາກທຸລະກິດ ຫລື ກໍແມ່ນງານດອງ, ງານຊາປະນາກິດສົບຕ່າງໆ, ແຕ່ຖ້າປິດຖະໜົນເບື້ອງໃດໜຶ່ງໄວ້ເພື່ອການສັນຈອນໄປມາແດ່ຂອງສັງຄົມກໍບໍ່ເຖິງຂັ້ນຮ້າຍແຮງ, ແຕ່ຄຽງຄູ່ກັນນັ້ນ ບາງບ່ອນປິດໝົດເສັ້ນທາງເລີຍ ເຊິ່ງເຫັນວ່າບໍ່ສົມຄວນ ແລະ ປິດເປັນເວລາຍາວນັບມື້-ສອງມື້ ອັນໄດ້ສ້າງຄວາມສັບສົນ, ລຳຄານໃຫ້ແກ່ການສັນຈອນໄປມາຂອງຜູ້ມີບ້ານເຮືອນຢູ່ເຂດໃກ້ຄຽງ ຫລື ການດຳເນີນທຸລະກິດຄ້າຂາຍຕ່າງໆຂອງຜູ້ອື່ນຢູ່ບໍລິເວນນີ້, ບາງບ່ອນກໍຈ້າງເອົາ ປກສ ບ້ານມາເວນຍາມໃຫ້ອີກ ຢ່າງບໍ່ເໝາະສົມ ແທນທີ່ເບື້ອງອຳນາດການປົກຄອງຈະຕ້ອງໄດ້ຢັບຢັ້ງການປິດເສັ້ນທາງແບບດັ່ງກ່າວ, ຖ້າປິດກໍຄວນຈົ່ງເບື້ອງໃຫ້ຜູ້ທຽວທາງແດ່.
ອັນນີ້ເບື້ອງ ປກສ ບ້ານ ໄດ້ໃຊ້ຮອດເຫລັກຂັ້ນກາງທາງມາປິດລ້ອມໄວ້ ເບິ່ງບໍ່ເປັນການເໝາະສົມ ຄືດັ່ງເປັນການສະແດງອຳນາດບາດໃຫຍ່ຂອງໃຜຜູ້ໜຶ່ງທີ່ທ້າທາຍກັບລະບຽບກົດໝາຍ. ດັ່ງຮູບພາບທີ່ເຟສໜັງສືພິມ ລາວພັດທະນາ ພວກເຮົາ ໄດ້ເອົາລົງໃນຄືນວັນທີ 14 – ວັນທີ 15 ທັນວາຜ່ານມານີ້ ຢູ່ເສັ້ນທາງຫລວງ ຕະຫລາດແລງ ອັນເປັນສິ່ງກີດຂວາງການສັນຈອນໄປມາຂອງຊຸມຊົນໃນບໍລິເວນນັ້ນນັບເປັນໄລຍະເວລາຍາວ ເບິ່ງຄືບໍ່ເໝາະສົມ ແລະ ຕໍ່ບັນຫານີ້ກໍມີມວນຊົນສົ່ງຂໍ້ຄິດເຫັນຕ່າງໆນາໆເຂົ້າມານັບເປັນຈຳນວນຫລາຍ ໂດຍສ່ວນໃຫຍ່ເປັນການຕຳໜິຕໍ່ເຫດການດັ່ງກ່າວ. ດັ່ງນັ້ນ ເບື້ອງອຳນາດການປົກຄອງຄວນເບິ່ງຄືນໃຫ້ເໝາະສົມ.
