ກອງປະຊຸມໂລກຮ້ອນສິ້ນສຸດລົງໂດຍຕົກລົງກັນບໍ່ໄດ້ກ່ຽວກັບກົນໄກຕະຫລາດ
ໃນວັນທີ 15 ທັນວານີ້ຕາມເວລາທ້ອງຖິ່ນ, ກອງປະຊຸມການປ່ຽນແປງດິນຟ້າອາກາດຂອງສະຫະປະຊາຊາດ ຄັ້ງທີ 25 ຫລື COP 25 ທີ່ຈັດຂຶ້ນຢູ່ນະຄອນຫລວງມາດຣິດ ປະເທດແອັສປາຍ ໄດ້ສິ້ນສຸດລົງ.
ເມື່ອສັງເກດເບິ່ງປະຫວັດສາດຂອງກອງປະຊຸມການປ່ຽນແປງດິນຟ້າອາກາດ ສປຊ, COP 25 ໄດ້ສ້າງສະຖິຕິ 2 ຢ່າງຄື: ເວລາກະກຽມສັ້ນທີ່ສຸດ ແລະ ເວລາເຈລະຈາຍາວທີ່ສຸດ, ແຕ່ບໍ່ແມ່ນກອງປະຊຸມທີ່ມີຜົນສຳເລັດຫລາຍທີ່ສຸດ. ກ່ຽວກັບບັນຫາກົນໄກຕະຫລາດທີ່ຢູ່ໃນມາດຕາ 6 ຂອງສັນຍາປາຣີສໄດ້ຮັບຄວາມສົນໃຈຢ່າງຫລວງຫລາຍນັ້ນ, ຝ່າຍຕ່າງໆບໍ່ສາມາດຕົກລົງຢ່າງເປັນເອກະພາບກັນໄດ້ ແລະ ຕົກລົງຈະສືບຕໍ່ພິຈາລະນາກ່ຽວກັບບັນຫານີ້ໃນປີ 2020.
ທ່ານ ນາງ ເຈັນນີເຟີ ໂມເກນ ຜູ້ອຳນວຍການໃຫຍ່ອົງການສັນຕິພາບສີຂຽວ ເຫັນວ່າ: ປີ 2019 ແມ່ນປີໜຶ່ງທີ່ທົ່ວໂລກໄດ້ຮັບຜົນກະທົບຈາກການປ່ຽນແປງຂອງດິນຟ້າອາກາດແບບບໍ່ເຄີຍມີມາກ່ອນ. ສຳລັບກອງປະຊຸມຄັ້ງນີ້ບໍ່ໄດ້ຮັບຜົນສຳເລັດເທົ່າທີ່ຄວນເມື່ອທຽບໃສ່ຜົນກະທົບທີ່ຮ້າຍແຮງຈາກການປ່ຽນແປງດິນຟ້າອາກາດ. ເຖິງຈະເປັນແນວນີ້ກໍຕາມ ມະຕິສຸດທ້າຍຂອງກອງປະຊຸມຄັ້ງນີ້ໄດ້ມີສຽງຕອບຮັບຕໍ່ຄວາມຮຽກຮ້ອງໃຫ້ເພີ່ມທະວີການເຄື່ອນໄຫວເພື່ອຮັບມືກັບການປ່ຽນແປງຂອງດິນຟ້າອາກາດຄື: ບັນດາປະເທດຕ້ອງສຸມຄວາມພະຍາຍາມຫລາຍກວ່າເກົ່າໃນປີ 2020 ແລະ ເພີ່ມທະວີການປະຕິບັດງານຂອງຕົນຫລາຍກວ່າເກົ່າໃນການຮັບມືກັບການປ່ຽນແປງຂອງດິນຟ້າອາກາດ.
