ຜູ້ປະກອບການລ້ຽງປາກະຊັງຢູ່ນະຄອນປາກເຊ ດີໃຈທີ່ຈະໄດ້ຮັບທຶນສະໜັບສະໜູນຈາກທະນາຄານ
ທະນາຄານ ເປັນທີ່ເພິ່ງຂອງລູກຄ້າ ຫຼື ຜູ້ປະກອບການຫຼາກຫຼາຍສາຂາອາຊີບໃນການຜະລິດ, ການດຳເນີນທຸລະກິດ, ການລົງທຶນ ກໍ່ຄືການນຳໃຊ້ເຂົ້າໃນການພັດທະນາ ແລະ ແກ້ໄຂຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ໂດຍການຝາກ-ກູ້ ທີ່ມີຈຸດປະສົງນຳໃຊ້ເຂົ້າຖືກເປົ້າໝາຍ ແລະ ຊຳລະຕົ້ນທຶນ+ດອກເບ້ຍ ຕາມກຳນົດເວລາທີ່ກຳນົດໄວ້.
ດັ່ງທ່ານ ຄຳພູນ ແສງປະທີບ ຊາວບ້ານໂນນສະຫວ່າງ ນະຄອນປາກເຊ ແຂວງຈຳປາສັກ ເປັນລູກຄ້າຜູ້ໜຶ່ງ ຂອງທະນາຄານພັດທະນາລາວ ສາຂາປາກເຊ (ທພລ-ປຊ) ຊຶ່ງໃນປີ 2007 ໄດ້ຮັບການກູ້ຢືມທຶນຈາກທະນາຄານດັ່ງກ່າວ ມາລ້ຽງປາກະຊັງ ໂດຍເຮັດແຕ່ນ້ອຍຫາໃຫຍ່ ເບື້ອງຕົ້ນແມ່ນມີ 9 ກະຊັງ ແຕ່ມາເຖິງປະຈຸບັນມີ 100 ກວ່າກະຊັງທີ່ລ້ຽງຢູ່ນ້ຳຂອງ ເຂດບ້ານໂນນສະຫວ່າງ ແລະ ລ້ຽງປາອະນຸບານໃສ່ໜອງຢູ່ບ້ານຫຼັກ 40 ເມືອງປະທຸມພອນ ແຂວງຈຳປາສັກ ແລະ ມີຜູ້ຊ່ວຍວຽກ 10 ຄົນ. ຜ່ານການລ້ຽງປາ ຕາມນະໂຍບາຍຂອງລັດຖະບານ ກໍຄືຄວາມມັກຂອງຕົນ ຈຶ່ງ ມີຜົນຜະລິດ ແລະ ຜົນກຳໄລໃນແຕະລະປີ ນັບຫລາຍຮ້ອຍລ້ານກີບ.
ທ່ານ ຄຳພູນ ກ່າວ ວ່າ: ການດຳເນີນທຸລະກິດທີ່ດີແມ່ນຕ້ອງໄດ້ຮັບການສະໜັບສະໜູນແຫຼ່ງທຶນຈາກທະນາຄານດ້ວຍດອກເບ້ຍຜ່ອນຜັນ ແລະ ສິງນີ້ກໍຈະເປັນເງື່ອນໄຂຊ່ວຍຊຸກຍູ້ສົ່ງເສີມວິສາຫະກິດຂະໜາດກາງ ແລະ ຂະໜາດນ້ອຍ (SME) ໄດ້ຂະຫຍາຍຕົວ
ຕົກມາຮອດເດືອນກັນຍາ 2019 ຜ່ານມານີ້, ເຫດການບໍ່ຄາດຄິດກໍ່ເກີດຂຶ້ນ ຍ້ອນຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ເກີດນ້ຳນອງ-ນ້ຳຖ້ວມ ໃນບັນດາແຂວງພາກໃຕ້ ແລະ ພາກກາງ ລວມທັງສະຖານທີ່ລ້ຽງປາ ກະຊັງຂອງຕົນເປ້ເພເສຍຫາຍ 45 ກະຊັງ ຕົກເປັນມູນຄ່າ 180 ລ້ານກີບ; ປາອອກ, ປາຕາຍ ແລະ ໜອງປາອະນຸບານຖືກເສຍຫາຍລວມມູນຄ່າເສຍຫາຍທັງໝົດ ປະມານ 785 ລ້ານກີບ ແລະ ຕໍ່ສະພາບດັ່ງກ່າວ
ທ່ານ ຈັນສະຫວ່າງ ອໍລະແສງ ຮອງຫົວໜ້າ ທະນາຄານພັດທະນາລາວ ສາຂາ ປຊ ໄດ້ຢືນຢັນ ຈະສບືຕໍ່ສົ່ງເສີມເງິນກູ້ໃຫ້ ທ່ານ ຄຳພູນ ແສງປະທີບ ໄດ້ຮັບແຫຼ່ງທຶນຊ່ວຍເຫຼືອຈາກ SME ໂດຍຜ່ານ ທະນາຄານຂອງຕົນ ຊຶ່ງໃນຜ່ານມາໄດ້ເປັນລູກຄ້າຊັ້ນດີຄົນໜຶ່ງ
