4 ປີ ອົງການກາແດງຫລວງພະບາງປະສົບຜົນສຳເລັດຫຼາຍດ້ານ
ຮອງຫົວໜ້າ ອົງການກາແດງຫລວງພະບາງໄດ້ລາຍງານການຈັດຕັ້ງ ແລະ ການເຄື່ອນໄຫວວຽກງານຂອງໃນການຊ່ວຍເຫຼືອປະຊາຊົນ ຜູ້ທຸກຍາກຂາດເຂີນນັບ ໃນໄລຍະ 4 ປີຜ່ານມາເຫັນວ່າ ມີຜົນສຳເລັດຫຼາຍດ້ານຄື: ອົງການກາແດງ ຫລວງພະບາງໄດ້ອອກແຮງສູ້ຊົນປະຕິບັດໜ້າທີ່ ຊ່ວຍເຫຼືອປະຊາຊົນຜູ້ທຸກຍາກຂາດເຂີນໃນເຂດຫ່າງໄກສອກຫຼິກ, ຕາມ 7 ຫຼັກການພື້ນຖານມະນຸດສະທໍາ ແລະ ເປັນວຽກບູລິມະສິດຂອງອົງການກາແດງ, ນັບແຕ່ປີ 2016 ມາຮອດປັດຈຸບັນ ກາແດງຫລວງພະບາງສາມາດຂົນຂວາຍເພື່ອການ ຊ່ວຍເຫຼືອປະຊາຊົນ ໄດ້ທັງໝົດ 5166ຄອບຄົວ, ຕົກເປັນ ມູນຄ່າ 2 ຕື້ກວ່າກີບ, ແຈກຢາຍງົວໃຫ້ຄອບຄົວທຸກຍາກ ໃນ 5 ບ້ານ ທີ່ຂຶ້ນກັບ ເມືອງໂພນທອງ ຈຳນວນ 183 ໂຕ ໃນ 140 ຄອບຄົວ, ປຸກລະດົມຈັດຫາເລືອດ ແລະ ສະໜອງເລືອດທີ່ປອດໄພ ໄດ້ 13.900 ກວ່າຖົງ, ມີຜູ້ບໍລິຈາກ 13.976 ຄົນ, ສົ່ງເສີມສຸຂະພາບຂັ້ນພື້ນຖານໃຫ້ປະຊາຊົນ- ສ້າງນ້ໍາລິນໄດ້ທັງໝົດ 14 ບ້ານ ໃນ 8 ເມືອງ ມີປະຊາຊົນໄດ້ຊົມໃຊ້ 1.388 ຄອບຄົວ, ສ້າງວິດຖ່າຍ ໃນ 20 ບ້ານ ຂອງ 10 ຕົວເມືອງສຳເລັດ 1.443 ຄອບຄົວ, ອົບຮົມປະຖົມພະຍາບານ ແລະ ຊ່ວຍຊິວິດປະຊາຊົນ 638 ຄົນ , ຊ່ວຍເຫຼືອຜູ້ໄດ້ຮັບບາດເຈັບ 2.178 ຄົນ, ພ້ອມນີ້ໜ່ວຍກູໄພສຸກເສີນໄດ້ເຄື່ອນໄຫວຮັບໃຊ້ປະຊາຊົນທີ່ປະສົບໄພແລະອຸປະຕິເຫດຕາມໜົນໄດ້ 666 ກໍລະນີ້ ແລະ ມີພາກສ່ວນຕ່າງໆ ໃຫ້ການຊ່ວຍເຫລືອໜ່ວຍງານດັ່ງກ່າວຕົກເປັນເງິນ 241 ລ້ານກວ່າ ກີບແລະ ປຸກລະດົມຊອກຫາແຫລ່ງ ລາຍຮັບໄດ້ 4 ແສນ ໂດລາ ທີ່ມາຈາກການຜະລິດນ້ຳດື່ມ,ນວດແຜນບູຮານ ແລະ ເຮືອນໃຫ້ເຊົ່າ,ຮ່ວມ ແລກປ່ຽນບົດຮຽນກັບອາສາສະໝັກ ສ ເກົາຫລີ ໄດ້ເປັນປົກກະຕິ. ນອກນັ້ນຍັງມີກາແດງ 4 ປະເທດໃຫ້ການຊ່ວຍເຫຼືອ ຄື: ກາແດງ ສະວິດກາແດງ ສເກົາຫຼີ,ກາແດງ ແຂວງຫູນານ ສປ ຈີນແລະ ກາແດງ ແຂວງດຽນບຽນ ສສ ຫວຽດນາມໂດຍດີຕະຫລອດມາ./.
