ເອັສຊີຈີ ມອບທຶນການສຶກສາໃຫ້ນ້ອງນັກຮຽນ ແຂວງຄຳມ່ວນຈຳນວນ 140 ທຶນ
ບໍລິສັດ ເອັສຊີຈີ ສືບຕໍ່ມອບທຶນການສຶກສາໃຫ້ນ້ອງນັກຮຽນໃນລະດັບຊັ້ນມັດ ທະຍົມຕອນປາຍ ແຕ່ ມ5 ຫາ ມ7 ໃນໂຄງການ “SCG Sharing The Dream” ເຊິ່ງເປັນປີທີ 8 ຕິດຕໍ່ກັນ. ສຳລັບສົກປີ 2019-2020 ນີ້ ແມ່ນຈະມອບຈໍານວນ 300 ທຶນ, ໃນນັ້ນ ຢູ່ນະຄອນຫຼວງວຽງຈັນ 160 ທຶນ, ແຂວງຄໍາມ່ວນ 140 ທຶນ ແລະ ຍັງຈະສືບຕໍ່ມອບໃນລະດັບປະລິນຍາຕີ ເປັນປີທີ 2 ຫຼັງຈາກທີ່ໄດ້ມອບໄປແລ້ວຈຳນວນ 10 ທຶນໃນປີຜ່ານມາ ໂດຍຄັດເລືອກຈາກນ້ອງທີ່ເຄີຍໄດ້ຮັບທຶນໃນໄລຍະຜ່ານມາ ທີ່ມີຄວາມມຸ່ງໝັ້ນໃນການໄຝ່ຫາຄວາມຮູ້ ແລະ ໃຊ້ຄວາມຮູ້ທີ່ມີເປັນສິ່ງຊຸກຍູ້ສົ່ງເສີມຄວາມສຳເລັດໃນອະນາຄົດ.
ເອັສຊີຈີ ແມ່ນກຸ່ມບໍລິສັດຊັ້ນນຳທີ່ມຸ່ງສ້າງຄວາມຍືນຍົງໃນອາຊຽນ ໄດ້ສານຕໍ່ໂຄງການ SCG Sharing The Dream ເປັນປີທີ 8 ໃນ ສປປ ລາວ ເຊິ່ງ ເປັນ ກິດຈະກຳເພື່ອສັງຄົມຂອງ SCG ທີ່ສົ່ງເສີມການພັດທະນາສັກກະຍາພາບເຍົາວະຊົນຂອງບັນດາປະເທດໃນອາຊຽນ, ທີ່ SCG ໄດ້ເຂົ້າມາດຳເດີນກິດຈະການ, ເພື່ອສົ່ງເສີມໂອກາດທາງການສຶກສາໃຫ້ເຍົາວະຊົນທີ່ເປັນຄົນເກັ່ງ ແລະ ດີ, ມີຄວາມກະຕືລືລົ້ນທີ່ຈະສຶກສາຕໍ່, ແຕ່ຂາດເຂີນທຶນການສຶກສາ ໄດ້ມີໂອກາດພັດທະນາຕົນເອງເພື່ອເປັນຄົນທີ່ດີຂອງຊາດ.
ທ່ານ ວໍຣະການ ພົງສິຣິກຸນ ຜູ້ອຳນວຍການໃຫຍ່ບໍລິສັດຄຳມ່ວນຊີມັງ
ຈຳກັດ ເຊິ່ງຕັ້ງຢູ່ບ້ານໂພວາ ເມືອງມະຫາໄຊ ແຂວງຄຳມ່ວນ ທີ່ເປັນເຄືອຂ່າຍຂອງບໍລິສັດ SCG
ກ່າວວ່າ: SCG
ເຊື່ອວ່າປະເທດຊາດຈະເຂັ້ມແຂງໄດ້ກໍຕ້ອງເລີ່ມຈາກຄົນທີ່ມີຄຸນນະພາບ
ເຊິ່ງບໍ່ໄດ້ໝາຍເຖິງແຕ່ຄົນເກັ່ງ
ຫຼື ຄົນທີ່ມີຄວາມສາມາດຢ່າງດຽວ ແຕ່ຕ້ອງເປັນຄົນດີນຳ. ສະນັ້ນ SCG
ຈຶ່ງຊຸກຍູ້ໂຄງການຕ່າງໆທີ່ຊ່ວຍພັດທະນາບຸກຄະລາກອນຂອງປະເທດຜ່ານການສົ່ງເສີມດ້ານການສຶກສາ
ເຊິ່ງເປັນທີ່ມາຂອງໂຄງການ
SCG Sharing The Dream ໃນພາກພື້ນອາຊຽນເຊັ່ນ: ສປປ
ລາວ,
ໄທ,
ຫວຽດນາມ,
ອິນໂດເນເຊຍ,
ຟີລິບປິນ,
ກຳປູເຈຍ ແລະ
ມຽນມາ ໂດຍປັດຈຸບັນໂຄງການໄດ້ມອບທຶນການສຶກສາໃຫ້ນັກຮຽນປີລະ 6.000
ທຶນໃນທົ່ວພາກພື້ນອາຊຽນ ເພື່ອຮ່ວມພັດທະນາບັນດາປະເທດທີ່ SCG
ເຂົ້າໄປດຳເນີນທຸລະກິດ.
ໂຄງການ SCG Sharing The Dream ໄດ້ຈັດຕັ້ງປະຕິບັດຢູ່ ສປປ ລາວ ເປັນປີທີ 8 ແລ້ວໂດຍໄດ້ຮັບການຮ່ວມມືຈາກ ສະມາຄົມຮ່ວມນ້ຳໃຈກັບເດັກນ້ອຍລາວ, ຮັບສະໝັກນັກຮຽນຊັ້ນມັດທະຍົມສຶກສາປີທີ 5-7 ຈາກໂຮງຮຽນຕ່າງໆໃນເຂດເປົ້າໝາຍນະຄອນຫຼວງວຽງຈັນ ແລະ ແຂວງຄຳມ່ວນ ເພື່ອຄັດເລືອກເຍົາວະຊົນຄົນດີ, ມີຄວາມກະຕັນຍູ ແລະ ມຸ່ງໝັ້ນສ້າງຝັນດ້ານການສຶກສາ ໂດຍມີຄະນະກຳມະການຄັດເລືອກຈາກຂະແໜງສຶກສາທິການ ແລະ ພະນັກງານຂອງ SCG. ສຳລັບທຶນທີ່ຈະໄດ້ຮັບໃນລະດັບມັດທະຍົມສຶກສາແມ່ນ 1.700.000 ກີບຕໍ່ທຶນ, ພ້ອມອຸປະກອນການຮຽນອີກຈຳນວນໜຶ່ງ ແລະ ລັບດັບມະປະລິນຍາຕີ ແມ່ນທຶນລະ 5.100.000 ກີບ. ນອກຈາກການສະໜັບສະໜູນດ້ານການເງິນແລ້ວ ຍັງມີກິດຈະກຳເພື່ອພັດທະນາສັກກະຍາພາບ ແລະ ເສີມສ້າງຄຸນນະທຳ ຕະຫຼອດໄລຍະຂອງໂຄງການຕື່ມອີກ.
ພິທີມອບ-ຮັບທຶນການສຶກສາດັ່ງກ່າວຈັດຂຶ້ນໃນວັນທີ 12 ທັນວານີ້ ທີ່ສະໂມສອນຫຼັກ 4 ແຂວງຄຳມ່ວນ ໂດຍມີທ່ານ ວໍຣະການ ພົງສິຣິກຸນ ຜູ້ອຳນວຍການໃຫຍ່ບໍລິສັດ ຄຳມ່ວນຊີມັງ ຈຳກັດ, ແລະ ທ່ານ ວົງເພັດ ຈິດປັນຍາ ຫົວໜ້າຫ້ອງວ່າການແຂວງຄຳມ່ວນ, ພ້ອມດ້ວຍ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີທ່ານ ກົງສູນໃຫຍ່ຣາຊະອານາຈັກໄທ ປະຈຳແຂວງສະຫວັນນະເຂດ, ເຂົ້າຮ່ວມນຳດ້ວຍ./.
