ຈະປິດບາງເສັ້ນທາງໃນເຊົ້າວັນທີ 8 ທັນວານີ້ ເພື່ອງານແຂ່ງຂັນແລ່ນວຽງຈັນມາຣາທອນນານາຊາດ

ເຈົ້າໜ້າທີ່ແຈ້ງວ່າ: ຈະປິດເສັ້ນທາງ ບາງເສັ້ນໃນນະຄອນຫລວງວຽງຈັນແຕ່ເວລາ 3 ໂມງ ໄປຈົນຮອດ 9 ໂມງ ເຊົ້າຂອງວັນອາທິດທີ 8 ທັນວານີ້ ເພື່ອອໍານວຍຄວາມສະດວກ ໃຫ້ແກ່ງານແຂ່ງຂັນວຽງຈັນມາຣາທອນ ນານາຊາດ.

ທ່ານພັນໂທ ເພັງສະຫວັນ ທໍາມາບູນ ຫົວຫນ້າພະແນກຈະລາຈອນ  ປກສ  ນະຄອນຫຼວງວຽງຈັນ ໄດ້ໃຫ້ຮູ້ວ່າ: ເນື່ອງຈາກມີງານແຂ່ງຂັນດັ່ງກ່າວ ຄາດວ່າຈະມີນັກກິລາປະມານ 4000 ກວ່າຄົນ ຈາກ 10 ປະເທດ ເຂົ້າຮ່ວມສະນັ້ນ ເຈົ້າຫນ້າທີ່ຈະລາຈອນຈະໄດ້ຈັດກໍາລັງ. ຈໍານວນ 160 ຄົນໄປປະຈໍາຢູ່ຈຸດຕ່າງ ຕາມສາຍທາງ ທີ່ນໍາໃຊ້ແຂ່ງຂັນຄື: ເລີ່ມແຕ່ຈຸດປ່ອຍຕົວນັກກິລາຢູ່ເດີ່ນທາດຫຼວງ ແລ້ວແລ່ນໄປທາປະຕູໂຊເຂົ້າສູ່ຖະຫນົນ

ລ້ານຊ້າງ, ຖະຫນົນສາມແສນໄທ, ຖະຫນົນເຈົ້າອະນຸວົງໄປຮອດໄຟແດງຕະຫຼາດສີໂຄ ແລ້ວໂຄ້ງກັບຄືນ ມາຮອດສາມແຍກປາກປາສັກ ລ້ຽວໄປເສັ້ນທາງແຄມຂອງລົງໄປ ຮອດໂຮງຮຽນການຊ່າງລາວເຢຍລະມັນ ລ້ຽວຂວາໄປຕາມຖະຫນົນທ່າເດື່ອແລ້ວ ໂຄ້ງ ໄປຕາມຖະຫນົນກໍາແພງເມືອງຈົນຮອດໄຟແດງ ໂພນປ່າເປົ້າ ລ້ຽວຂຶ້ນໄປໂຮງຫມໍ 103 ລ້ຽວຊາຍໄປຕາມຖະຫນົນລາວໂທ ແລ້ວໂຄ້ງກັບໄປໄຟແດງ ໂຮງຮຽນການຊ່າງລາວ ເຢຍລະມັນ ອອກໄປຖະຫນົນແຄມຂອງ ຂຶ້ນໄປຮອດໂຮງຮຽນການຊ່າງປາກປາສັກ ຜ່ານ ໄປໂຟແດງວັດອິນແປງແລ້ວລ້ຽວລົງໄປຕາມຖະຫນົນເສດຖາທິດລາດໄປຫາຫໍຄໍາ ແລ້ວລ້ຽວຊ້າຍໄປຕາມຖະຫນົນລ້ານຊ້າງ ນຸ່ງຫນ້າສູ່ເສັ້ນໂຊ ຢູ່ເດີ່ນທາດຫຼວງໂດຍຈະໃຊ້ ເວລາທັງຫມົດ 6 ຊົ່ວໂມງເຄິ່ງ ສະນັ້ນ ຈິ່ງແຈ້ງມາຍັງຜູ້ຂັບຂີ່ຈົ່ງໃຫ້ຄວາມຮ່ວມມີ ແລະຫຼີກລ່ຽງການນໍາໃຊ້ຖະຫນົນ ດັ່ງກ່າວ ເພື່ອຫຼີກລ່ຽງການເກີດອຸປະຕິເຫດ