ມື້ພັກຍາວ ຄົນລາວຫລັ່ງອອກປະເທດ

ໂດຍ: ມຶກບໍ່ແຫ້ງ

ການລັ່ງອອກນອກປະເທດຂອງຄົນລາວໃນມື້ພັກຍາວນັ້ນ ໄດ້ກາຍ ເປັນສິ່ງທີ່ສະທ້ອນໃຫ້ເຫັນສະພາບເສດຖະກິດ  ແລະສິ່ງບໍລິການຕ່າງໆ ພາຍໃນປະເທດຍັງບໍ່ສາມາດຕອບສະໜອງໄດ້ກັບຄວາມຕ້ອງການ.

ກາຍເປັນສິ່ງທີ່ສັງຄົມສົນໃຈຫຼາຍເມື່ອວ່າ ຍາມພັກຍາວເທື່ອໃດ ຫຼື ແມ່ນແຕ່ມື້ທຳມະດາ ແລະ ທ້າຍອາທິດການຫຼັ່ງໄຫຼອອກນອກປະເທດ ໂດຍສະເພາະປະເທດໄທແມ່ນເປັນຈຳນວນຫຼາຍແທ້, ມື້ໜຶ່ງໂດຍສະເລ່ຍ ປະມານ 1.000 ກວ່າຄົນ.

ຈຸດປະສົງຕົ້ນຕໍ ຂອງການຫຼັ່ງອອກນອກປະເທດນັ້ນ ກໍມີຫຼາກ ຫຼາຍແຕກຕ່າງກັນ ແຕ່ສ່ວນໃຫຍ່ ແມ່ນ ອອກໄປ ຈັບຈ່າຍຊື້ຂອງ ບໍລິໂພກ ແລະ ອຸປະໂພກ ຕາມຮ້າງຊັບພະສິນຄ້າທີ່ໃຫຍ່ ແລະ ຫຼາກຫຼາຍຂອງໄທ ທີ່ເວົ້າກັນວ່າ ລາຄາເຄື່ອງຂອງຖືກ ແລະຄຸນນະພາບດີກວ່າຢູ່ລາວ.

ນອກນັ້ນ, ຄົນຈຳນວນຫຼວງຫຼາຍກໍໄປໄທເພື່ອການທ່ອງທ່ຽວ ເພາະ ເຫັນວ່າ ມີບ່ອນທ່ຽວທີ່ຫຼາກຫຼາຍ, ລາຄາທີ່ພັກ, ອາຫານທີ່ສົມເຫດສົມຜົນ ແລະ ການບໍລິການທີ່ມີຄຸນນະພາບ, ສະຖານທີ່ທ່ອງທ່ຽວ ໄດ້ຮັບການບົວ ລະບັດຮັກສາ ໂດຍສະເພາະຫ້ອງນໍ້າ ແລະ ສິ່ງອຳນວຍຄວາມສະດວກ ອື່ນໆ ເຊິ່ງສາມາດດຶງດູດຄົນລາວໄດ້ດີ ໂດຍສະເພາະຜູ້ທີ່ຈັດວ່າ ມີລາຍຮັບ ປານກາງຫາສູງ.

ນອກນັ້ນ, ຄົນລາວຍັງອອກນອກປະເທດເພື່ອໃຊ້ບໍລິການທາງດ້ານ ສຸຂະພາບ, ການຊອກວຽກເຮັດງານທຳຕື່ມອີກ ເຊິ່ງເປັນສິ່ງຮັບຮູ້ກັນດີ ຂອງສັງຄົມໃນວົງກວ້າງແຕ່ບັນຫາດັ່ງກ່າວ ໄດ້ສ້າງຄວາມກັງວົນໃຫ້ແກ່ ເສດຖະກິດ ພາຍໃນປະເທດບໍ່ໜ້ອຍ.

ຕົວຢ່າງ ມື້ພັກວັນຊາດ ທີ 2​ ທັນວາບວກກັບ 2 ມື້ພັກ ທ້າຍອາທິດ ທີ່ຜ່ານມາໄດ້ມີການເຜີຍແຜ່ຮູບພາບຄວາມແອອັດຂອງຜູ້ຄົນຈາກລາວ ທີ່ກຳລັງພາກັນຂ້າມໄປປະເທດໄທດ້ວຍຈຸດປະສົງທີ່ຫຼາກຫຼາຍດັ່ງກ່າວ ແຕ່ ກົງກັນຂ້າມ ສ່ວນເບື້ອງເສັ້ນທາງຈາກໄທຫາລາວພັດເປົ່າແປນ.

ສິ່ງດັ່ງກ່າວແມ່ນເກີດຂຶ້ນໃນທ່າມກາງທີ່ລັດຖະບານເຮົາກຳລັງ ຊຸກຍູ້ສົ່ງເສີມການນຳໃຊ້ຜະລິດຕະພັນລາວ, ນຳໃຊ້ຂອງຄົນລາວຜະລິດ ເພື່ອສົ່ງເສີມເສດຖະກິດພາຍໃນ, ຫ່າງໄກເລື່ອງເງິນເຟີ້ທີ່ກຳລັງພົບພໍ້ ເຊິ່ງສ້າງຄວາມທ້າທາຍຫຼາຍປະການໃນການເຕີບໂຕທາງດ້ານ ເສດຖະກິດ.

ພ້ອມນັ້ນ, ໃນປີ 2019​ ແລະ 2018 ຜ່ານມາລັດຖະບານກໍສຸມໃສ່ ການສົ່ງເສີມ ແລະ ການພັດທະນາການທ່ອງທ່ຽວ ແລະ ປີນີ້ ທົ່ງໄຫຫີນ ຂອງລາວກໍຖືກຮັບຮອງເປັນມໍລະດົກໂລກ, ຄຽງຄູ່ກັບການສົ່ງເສີມ ການທ່ອງທ່ຽວທາງທຳມະຊາດຂອງລາວທີ່ຍັງອຸດົມສົມບູນແຕ່ເໜືອ ຮອດໃຕ້.

ແຕ່ເຖິງປານນັ້ນກໍຍັງບໍ່ສາມາດຢຸດຢັ້ງຄົນລາວຕໍ່ແຖວຍາວ ອອກນອກ ປະເທດ, ຄົນອອກນອກກໍສໍ່າຂົນເງິນອອກຈາກປະເທດເຊັ່ນກັນ, ຄິດເບິ່ງວ່າ ຖ້າຜູ້ຄົນເຫຼົ່ານັ້ນ ນຳໃຊ້ເງິນ ຫຼື ຈັບຈ່າຍຊື້ຂອງພາຍໃນປະເທດມັນສາມາດ ຊຸກຍູ້ການເຕີບໂຕຫຼາຍປານໃດ? ຜ່ານມາລັດຖະບານກໍພະຍາຍາມຈຳກັດ ການຫຼັ່ງອອກນອກປະເທດ ໂດຍການປັບເລື່ອງພາສີ ແລະ ມາດຕະການ ອື່ນໆແຕ່ກໍຍັງບໍ່ໄດ້ຜົນເທົ່າທີ່ຄວນ.

ຖ້າມີທາງເລືອກທີ່ດີກວ່າ ຄົງບໍ່ໃຜຢາກປະຕິເສດ ແຕ່ຄວາມມີສະຕິຊາດ ສົ່ງເສີມຄົນລາວ ກໍອາດເປັນປັດໄຈທີ່ພວກເຮົາ ຄວນຄິດຫງໍາ ຄຽງຄູ່ກັບ ການເພີ່ມທະວີການຕອບສະໜອງຄວາມຮຽກຮ້ອງຕ້ອງການພາຍໃນ ບໍ່ວ່າຈະເປັນສິນຄ້າ ແລະ ການບໍລິການໃຫ້ດີກວ່າເກົ່າ, ຖ້າມີຜັກຢູ່ຫຼັງ ບ້ານທີ່ດີມີຄວາມສະອາດແມ່ນໃຜຊິຢາກໄປຕະຫຼາດທັງເສຍເວລາ ແລະ ເສຍເງິນ.