ຄະນະຊີ້ນໍາໂຄງການກໍ່ສ້າງທາງລົດໄຟລາວ – ຈີນມອບເງິນຊົດເຊີຍໃຫ້ແກ່ຜູ້ທີ່ໄດ້ຮັບຜົນກະທົບໃນງວດທີ 6

ຕອນເຊົ້າຂອງວັນທີ 4 ທັນວາ 2019 ຢູ່ທີ່ບ້ານ ນາເຕີຍ ເມືອງຫຼວງນໍ້າທາ ແຂວງຫຼວງນໍ້າທາ ຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ຊ່ວງຜ່ານແຂວງຫຼວງນໍ້າທາ ໄດ້ຈັດພິທີເບິກຈ່າຍຄ່າຊົດເຊີຍສິ່ງກິດຂວາງໃຫ້ແກ່ ຜູ້ທີ່ໄດ້ຮັບຜົນກະທົບ ຈາກໂຄງການກໍ່ສ້າງທາງລົດໄຟລາວ-ຈີນ, ແຕ່ງວດ 1 – ງວດ 6 ມີ 4 ບ້ານຄື: ບ້ານບໍ່ເຕ່ນ, ບໍ່ປຽດ, ຕີນຕົກ ແລະ ບ້ານນາເຕີຍ ມີ 208 ຄອບຄົວ ເທົ່າກັບ 66,4%  ລວມເປັນເງິນທັງໜົດ 118 ຕື້ 6 ຮ້ອຍ 23 ລ້ານ 2 ແສນກວ່າກີບ, ມາໃນວັນທີ 4 ທັນວາ 2019 ທາງໂຄງການແມ່ນໄດ້ມອບເງິນຊົດເຊີຍໃນງວດທີ 6 , ເປັນງວດສຸດທ້າຍທີ່ນອນຢູ່ໃນຈໍານວນ 321  ຄອບຄົວ, ໃນມູນຄ່າລວມທັງໜົດ 178 ຕື້ 554 ລ້ານ 7 ແສນກວ່າກີບ.

ໃນຕໍ່ໜ້າທາງໂຄງການຈະໄດ້ສືບຕໍ່ເບິກຈ່າຍຄ່າຊົດເຊີຍໃຫ້ແກ່ຜູ້ທີ່ຖຶກຜົນກະທົບຂອງໂຄງການກໍ່ສ້າງທາງລົດໄຟລາວ-ຈີນ ງວດທີ 7 ໃນຂັ້ນຕໍ່ໄປໃນຈໍານວນ 11 ຄອບຄົວ, ຢູ່ບ້ານບໍ່ເຕ່ນ ແລະ ບ້ານນາເຕີຍ ລວມມູນຄ່າ 13 ຕື້ 292 ລ້ານ 3 ແສນກວ່າກີບ, ພ້ອມນີ້ທາງໂຄງການຍັງໄດ້ສໍາຫຼວດຄາດຄະເນສະຖານນີນາເຕີຍ ຖ້າຫາກມີຄວາມຕ້ອງການເນື້ອທີ່ດິນເພີ່ມຂື້ນຈາກເນື້ອທີ່ເດີມ 80 ເຮັກຕາ, ມາເປັນ 128 ເຮັກຕາ ຈະມີຜູ້ຖຶກຜົນກະທົບເພີ່ມຂື້ນຈາກ 321 ຄອບຄົວ, ມາເປັນ 436 ຄອບຄົວ, ລວມມູນຄ່າຊົດເຊີຍແມ່ນ 254 ຕື້ 687 ລ້ານ 1 ແສນກວ່າກີບ.

ໃນພິທີມອບເງິນຊົດເຊີຍໃຫ້ແກ່ຜູ້ທີ່ໄດ້ຮັບຜົນກະທົບໃນຄັ້ງນີ້ ໃຫ້ກຽດເຂົ້າ ຮ່ວມໂດຍ ທ່ານ ຄໍາໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ,  ທ່ານ ຫຼີຢີ່ຈີນ ຮອງອໍານວຍການບໍລິສັດທາງລົດໄຟລາວ-ຈີນເລກ 5 ສາຂາ 2, ມີສະມາຊິກສະພາປະຊາຊົນແຂວງ, ປະທານກວດກາພັກ – ລັດແຂວງ, ຫົວໜ້າຄະນະກໍາມະການໄກ່ເກ່ຍ ຄະນະເບີກຈ່າຍຜົນ ກະທົບສິ່ງກີດຂວາງເສັ້ນທາງລົດໄຟລາວ-ຈີນ,  ຜູ້ຕ່າງໜ້າບໍລິສັດທາງລົດໄຟ ລາວ – ຈີນເລກ 5, ຕະຫຼອດຮອດປະຊາຊົນຜູ້ທີ່ຖຶກຜົນກະທົບພາຍໃນ 4 ບ້ານເຂົ້າຮ່ວມ. ໃນໂອກາດນີ້ ທ່ານຄໍາໄຫຼ ສີປະເສີດ ຮອງເຈົ້າແຂວງໆຫຼວງນໍ້າທາ ກໍ່ໄດ້ໃຫ້ກຽດມອບເງິນຊົດເຊີຍໃຫ້ຜູ້ທີ່ຖືກຜົນກະທົບ.