ເກີດການລະບາດຂອງພະຍາດປາກເປື່ອຍລົງເລັບໃນຫລາຍ 5 ບ້ານຂອງເມືອງ ຮ້ຽມ
ພະແນກກະສິກຳ ແລະ ປ່າໄມ້ ແຂວງຫົວພັນ ໃຫ້ຮູ້ວ່າ: ນັບແຕ່ເດືອນ ຕຸລາ ມາຮອດເດືອນ ພະຈິກ 2019ນີ້, ໄດ້ເກີດການລະບາດຂອງພະຍາດປາກເປື່ອຍລົງເລັບ ງົວ-ຄວາຍ ຢູ່ 5 ບ້ານພາຍໃນເມືອງ ຮ້ຽມ, ແຂວງ ຫົວພັນ ຄື: ບ້ານແທນຮີ້ງ, ນ້ຳສາດ, ທາດຮ້ຽມ, ສໍາພັນທອງ ແລະ ບ້ານເມືອງ ຮ້ຽມ ເຮັດໃຫ້ງົວຕິດເຊື້ອພະຍາດ 179 ໂຕ ແລະ ຄວາຍ 6 ໂຕ, ໃນນີ້ ຫລາຍກ່ວາໝູ່ແມ່ນບ້ານທາດຮ້ຽມ, ມີງົວຕິດເຊື້ອພະຍາດ 76 ໂຕ ແລະ ຄວາຍ 6 ໂຕ.
ຕໍ່ສະພາບການທີ່ເກີດຂຶ້ນວິຊາການກ່ຽວຂ້ອງຈາກກົມລ້ຽງສັດ ແລະ ການປະມົງ, ໄດ້ລົງໄປສົມທົບກັບພາກສ່ວນກ່ຽວຂ້ອງຂອງແຂວງ ເພື່ອເຄື່ອນໄຫວປິ່ນປົວສັດລ້ຽງຂອງປະຊາຊົນທີ່ຕິດເຊື້ອພະຍາດດ້ວຍການສັກຢາ ແລະ ໃຊ້ວິທີປິ່ນປົວແບບພື້ນບ້ານຕາມທີ່ ເຄີຍປະຕິບັດສືບທອດກັນມາເຫັນວ່າໄດ້ຮັບຜົນດີສົມຄວນ. ນອກນີ້ ຍັງໄດ້ ຫ້າມບໍ່ໃຫ້ປະຊາຊົນເຄື່ອນຍ້າຍສັດລ້ຽງຈາກເຂດທີ່ຕິດເຊື້ອພະຍາດອອກໄປບ່ອນອື່ນຢ່າງເດັດຂາດເພື່ອຮັບປະກັນບໍ່ໃຫ້ພະຍາດນີ້ລະບາດໄປບ່ອນອື່ນ.
ພະແນກດັ່ງກ່າວໃຫ້ຮູ້ຕື່ມວ່າ: ນອກຈາກ ເຄື່ອນໄຫວສັກຢາປ້ອງກັນພະຍາດປາກເປື່ອຍລົງເລັບຢູ່ ບັນດາ ບ້ານທີ່ເກີດການລະບາດ ແລ້ວວິຊາການ ກ່ຽວຂ້ອງ ໄດ້ສືບຕໍ່ສັກຢາປ້ອງກັນພະຍາດຢູ່ ຫລາຍບ້ານພາຍໃນເມືອງ ຮ້ຽມ, ເມືອງ ຫົວເມືອງ ແລະ ເມືອງ ເພື່ອປ້ອງກັນບໍ່ໃຫ້ພະຍາດປາກເປື່ອຍລົງເລັບເກີດຂຶ້ນອີກ ເພາະພະຍາດຊະນິດນີ້ເຄີຍລະບາດຢູ່ຫລາຍເມືອງຂອງແຂວງ ຫົວພັນ ມາແລ້ວໃນປີ 2017 ຜ່ານມາ./.
