ຫລວງພະບາງ ຖືການທ່ອງທ່ຽວເປັນທ່າແຮງພັດທະນາ
ທ່ານ ສາຍສະໝອນ ຄົມທະວົງ ຮອງເລຂາພັກແຂວງ ຫົວໜ້າຄະນະສະມາຊິກສະ ພາແຫ່ງຊາດ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 6 ປະທານສະພາປະຊາຊົນແຂວງຫຼວງພະບາງ ໄດ້ໃຫ້ສໍາພາດຕໍ່ສື່ມວນຊົນໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ວ່າ: ການພັດທະນາເສດຖະກິດ-ສັງຄົມຂອງແຂວງຫລວງພະບາງຫຕະລອດໄລຍະ 40 ກວ່າປີຜ່ານມານັ້ນ, ເຫັນວ່າມີການພັດທະນາຢ່າງຮອບດ້ານ, ໜັກແໜ້ນ ແລະ ຍືນຍົງ.
ໃນນີ້ມີຫລາຍດ້ານປະສົບຜົນສໍາເລັດເປັນຕົ້ນ: ແຂວງສືບຕໍ່ມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ ແກ້ໄຂໄດ້ສິ່ງຫຍໍ້ທໍ້ຕ່າງໆ, ການພັດທະນາເສດຖະກິດ-ສັງຄົມສືບຕໍ່ຂະຫຍາຍຕົວດ້ວຍຈັງຫວະທີ່ໜັກແໜ້ນ, ຊຶ່ງສະແດງອອກຊີວິດການເປັນຢູ່ຂອງປະຊາຊົນນັບມື້ດີຂຶ້ນ ແລະ ທ່າແຮງມູນເຊື້ອຂອງຫລວງພະບາງທີ່ພົ້ນເດັ່ນແມ່ນການຂະຫຍາຍຕົວທາງດ້ານການທ່ອງທ່ຽວ, ເຊິ່ງຖືເປັນອຸດສາຫະກໍາໜຶ່ງເພື່ອຊຸກຍູ້ການພັດທະນາຂອງແຂວງ, ເພາະວ່ານະຄອນຫລວງພະບາງເປັນເມືອງມໍລະດົກໂລກ ແລະ ມີ ແຫລ່ງທ່ອງທ່ຽວ 220 ກວ່າແຫ່ງ, ຈຶ່ງເຮັດໃຫ້ເສດຖະກິດຂອງແຂວງເຕີບໂຕສະເລ່ຍ 8,4%, ລາຍໄດ້ຂອງປະຊາຊົນບັນລຸ 2.148 ໂດລາສະຫະລັດຕໍ່ຄົນຕໍ່ປີ, ບັນດາພື້ນຖານໂຄງລ່າງກໍໄດ້ຮັບການພັດທະນາເປັນກ້າວໆ, ປັບປຸງສິ່ງອໍານວຍຄວາມສະດວກເພື່ອຊຸກຍູ້ສົ່ງເສີມການທ່ອງທ່ຽວເປັນຕົ້ນແມ່ນໄດ້ເພີ່ມຖ້ຽວບິນຫຼວງພະບາງ-ນະຄອນຫລວງວຽງຈັນ, ອັນສະແດງໃຫ້ເຫັນວ່າຂະແໜງການທ່ອງທ່ຽວໄດ້ເຕີບໂຕຫລາຍ, ເຊິ່ງມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຫລວງພະບາງນັບມື້ຫລາຍຂຶ້ນ.
ສໍາລັບວຽກງານການແກ້ໄຂຄວາມທຸກຍາກ ຖືວ່າມີແຜນຍຸດທະສາດ, ໂດຍໄດ້ຈັດແບ່ງທຶນງົບປະມານຈຳນວນໜຶ່ງເຂົ້າໃນວຽກງານດັ່ງກ່າວ, ຊຶ່ງມີຄວາມພະຍາຍາມເລັ່ງໃສ່ສົ່ງເສີມການທ່ອງທ່ຽວໃຫ້ເຂົ້າເຖິງຂົງເຂດໝູ່ບ້ານເປັນຕົ້ນສ້າງບ້ານວັດທະນະທໍາ, ບ້ານມີແຫຼ່ງທ່ອງທ່ຽວເຮັດໃຫ້ປະຊາຊົນມີສ່ວນຮ່ວມກ່ຽວກັບການທ່ອງທ່ຽວແບບປະຊາຊົນມີສ່ວນຮ່ວມ, ຊຸກຍູ້ສົ່ງເສີມການເຮັດກະສິກໍາເພາະວ່າກະສິກໍາແມ່ນຕິດພັນກັບຊີວິດການເປັນຢູ່ຂອງປະຊາຊົນ; ອີງໃສ່ທ່າແຮງແຕ່ລະຂົງເຂດບາງບ້ານມີທ່າແຮງດ້ານການລ້ຽງສັດກໍສົ່ງເສີມການລ້ຽງສັດເປັນຕົ້ນການລ້ຽງສັດປີກ, ງົວ, ຄວາຍ ໂດຍມີການປູກຫຍ້າຫັນປ່ຽນແບບວິທີການລ້ຽງທີ່ມີແບບແຜນເປັນຈຸ, ເປັນໜ່ວຍ, ບ່ອນທີ່ມີເງື່ອນໄຂກະສິກໍາຊຸກຍູ້ໂດຍການປູກສາລີ, ພືດຕະກຸນຖົ່ວຕ່າງໆ, ໝາກແຕງ, ປູກປໍສາ, ເປືອກເມືອກ ອັນນີ້ກໍເປັນການສ້າງລາຍຮັບໃຫ້ແກ່ປະຊາຊົນຊ່ວຍແກ້ໄຂຄວາມທຸກຍາກໄດ້.
