EC ເຜີຍຄວາມເຊື່ອໝັ້ນທາງເສດຖະກິດເຂດໃຊ້ເງິນເອີໂຣເພີ່ມຂຶ້ນ
ຄະນະກຳມາທິການເອີຣົບ (EC) ເປີດເຜີຍວ່າ: ຄວາມເຊື່ອໝັ້ນທາງເສດຖະກິດໃນເຂດໃຊ້ເງິນເອີໂຣປັບເພີ່ມຂຶ້ນສູງເກີນຄາດສູ່ລະດັບ 101,3 ຈຸດໃນເດືອນພະຈິກ ຈາກລະດັບ 100,8 ໃນເດືອນຕຸລາ ແລະ ສູງກວ່າການຄາດຄະເນຂອງນັກວິເຄາະໃນລະດັບ 101,0.
EC ລະບຸວ່າ: ຄວາມເຊື່ອໝັ້ນທາງເສດຖະກິດທີ່ເພີ່ມຂຶ້ນດັ່ງກ່າວເປັນຜົນມາຈາກຄວາມເຊື່ອໝັ້ນທີ່ເພີ່ມຂຶ້ນໃນຂະແໜງບໍລິການທີ່ສຳຄັນ, ຄວາມເຊື່ອໝັ້ນທີ່ເພີ່ມຂຶ້ນໃນຂະແໜງອຸດສາຫະກຳ ແລະ ຜູ້ບໍລິໂພກມີຄວາມເຊື່ອໝັ້ນເພີ່ມຂຶ້ນນຳອີກ.
ທັງນີ້ ຄວາມເຊື່ອໝັ້ນໃນຂະແໜງບໍລິການ ເຊິ່ງຄິດເປັນອັດຕາສ່ວນ 2 ໃນ 3 ຂອງ GDP ເຂດໃຊ້ເງິນເອີໂຣ ເພີ່ມຂຶ້ນສູ່ລະດັບ 9,3 ໃນເດືອນພະຈິກ ຈາກລະດັບ 9,0 ໃນເດືອນຕຸລາ ແລະ ຄວາມເຊື່ອໝັ້ນດ້ານອຸດສາຫະກຳ ປັບຂຶ້ນສູ່ລະດັບ -9,2 ໃນເດືອນພະຈິກ ຈາກລະດັບ -9,5 ໃນເດືອນຕຸລາ.
ນອກຈາກນີ້ ຄວາມເຊື່ອໝັ້ນຂອງຜູ້ບໍລິໂພກຍັງເພີ່ມຂຶ້ນສູ່ລະດັບ -7,2 ໃນເດືອນພະຈິກ ຈາກລະດັບ -7,6 ໃນເດືອນຕຸລາ. ຂະນະທີ່ຄວາມເຊື່ອໝັ້ນດ້ານການຄ້າຍ່ອຍເພີ່ມຂຶ້ນສູ່ລະດັບ -0,2 ໃນເດືອນພະຈິກ ຈາກລະດັບ -0,9 ໃນເດືອນຕຸລາ.
ຂະນະທີ່ທະນາຄານກາງເອີຣົບ (ECB) ເປີດເຜີຍຂໍ້ມູນວ່າ: ຂະແໜງທະນາຄານປ່ອຍກູ້ໃຫ້ແກ່ບໍລິສັດຕ່າງໆໃນເຂດໃຊ້ເງິນເອີໂຣເພີ່ມຂຶ້ນ 3,8% ໃນເດືອນຕຸລາ ຈາກລະດັບ 3,6% ໃນເດືອນກັນຍາ ເຊິ່ງຊ້າລົງຈາກລະດັບສູງເປັນປະຫວັດສາດ.
ສ່ວນການປ່ອຍກູ້ໃຫ້ພາກຄົວເຮືອນ ເພີ່ມຂຶ້ນສູ່ລະດັບ 3,5% ໃນເດືອນຕຸລາ ຈາກລະດັບ 3,4% ໃນເດືອນກັນຍາ ເຊິ່ງເປັນລະດັບສູງສຸດນັບແຕ່ຕົ້ນປີ 2009.
ທັງນີ້ ECB ລະບຸວ່າ: ທະນາຄານຕ່າງໆຍັງປ່ອຍສິນເຊື່ອຢ່າງຕໍ່ເນື່ອງ ເຖິງວ່າໃນອັດຕາທີ່ຊ້າລົງກໍຕາມ ຫລັງຈາກ ECB ໄດ້ອະນຸມັດມາດຕະການກະຕຸ້ນເສດຖະກິດຄັ້ງໃໝ່ໃນເດືອນກັນຍາຜ່ານມາ ໂດຍມີເປົ້າໝາຍໃຫ້ທະນາຄານການຄ້າມີການປ່ອຍກູ້ຕໍ່ໄປ ເພື່ອກະຕຸ້ນການຟື້ນຕົວທາງເສດຖະກິດ.
