ສປປ ເກົາຫລີ ປະກາດທົດລອງລູກສອນໄຟຂະໜາດໃຫຍ່ພິເສດ
ສື່ທາງການ ສປປ ເກົາຫລີ ລາຍງານວ່າ: ສປປ ເກົາຫລີ ຫາກໍປະສົບຜົນສຳເລັດໃນການທົດລອງ “ລະບົບເຄື່ອງຍິງຈະຫລວດຂະໜາດໃຫຍ່ພິເສດແບບຄັ້ງລະຫລາຍລູກ” ພາຍໃຕ້ການຄວບຄຸມຂອງທ່ານ ກິມ ຈອງອິນ ຜູ້ນຳ ສປປ ເກົາຫລີ ໂດຍເຊື່ອກັນວ່າອາດຈະໝາຍເຖິງລູກສອນໄຟ 2 ລູກ ທີ່ ສປປ ເກົາຫລີ ຍິງສູ່ທະເລຍີ່ປຸ່ນໃນວັນທີ 28 ພະຈິກ.
ໃນວັນທີ 28 ພະຈິກຜ່ານມາ, ທ່ານ ຊິເງກິ ທາກິຊາກິ ອະທິບໍດີກົມກິດຈະການອາຊີ ແລະ ໂອຊີນີ ຂອງກະຊວງການຕ່າງປະເທດຍີ່ປຸ່ນ ໄດ້ໂທລະສັບຫາລືກັບທ່ານ ສະເຕີເຟນ ບີກັນ ຜູ້ແທນພິເສດຂອງອາເມລິກາດ້ານກິດຈະການ ສປປ ເກົາຫລີ ແລະ ຕ່າງເຫັນພ້ອມກັນວ່າ: ການຍິງທົດລອງດັ່ງກ່າວເປັນການທ້າທາຍຂອງ ສປປ ເກົາຫລີ, ພ້ອມຊີ້ວ່າ: ການຮ່ວມມືໄຕພາຄີລະຫວ່າງອາເມລິກາ, ຍີ່ປຸ່ນ ແລະ ສ.ເກົາຫລີ ເປັນສິ່ງຈຳເປັນທີ່ສຸດ.
ການຍິງທົດລອງໃນວັນທີ 28 ພະຈິກ ຖືເປັນການຍິງທົດລອງລູກສອນໄຟຄັ້ງທຳອິດຂອງ ສປປ ເກົາຫລີ ໃນເດືອນນີ້ ແລະ ເປັນຄັ້ງທີ 13 ຂອງປີ ຫລັງຈາກເລີ່ມຍິງມາແຕ່ເດືອນພຶດສະພາ ລວມທັງເປັນການຍິງທົດລອງລູກສອນໄຟຄັ້ງທຳອິດ ນັບແຕ່ ສ.ເກົາຫລີ ຕັດສິນໃຈຕໍ່ອາຍຸຂໍ້ຕົກລົງແບ່ງປັນຂໍ້ມູນຂ່າວສານລະຫວ່າງ ສ.ເກົາຫລີ ກັບ ຍີ່ປຸ່ນ ໃນວັນທີ 22 ພະຈິກຜ່ານມາ.
