ສິ່ງທີ່ໜ້າສົນໃຈກ່ຽວກັບດຳລັດວ່າດ້ວຍທຸລະກິດນ້ຳມັນເຊື້ອໄຟ
ສະບາຍດີເພື່ອນຜູ້ອ່ານ, ມື້ນີ້ຜູ້ຂຽນຂໍແລກປ່ຽນບາງບັນຫາທີ່ໜ້າສົນໃຈກ່ຽວກັບການອອກເອກະສານທາງດ້ານນິຕິ ກຳໃໝ່ໆ ເພື່ອເປັນເຄື່ອງມືໃນການຄຸ້ມຄອງລັດ, ຄຸ້ມຄອງທຸລະກິດ… ແມ່ນເປັນສິ່ງທີ່ຖືກຕ້ອງ ແລະ ຈຳເປັນຕ້ອງມີ. ແຕ່ບົນພື້ນຖານບັນດານິຕິກຳ ຫລື ດຳລັດເລົ່ານັ້ນ ຕ້ອງເປັນຜົນດີໃຫ້ແກ່ປະເທດຊາດ ແລະ ເພື່ອຄວາມເຕີບໃຫຍ່ເຂັ້ມ ແຂງຂອງທຸລະກິດ.
ແຕ່ຖ້າວ່າ ເປັນນິຕິກຳ ຫລື ດຳລັດ ທີ່ຈະເປັນການທຳລາຍມ້າງເພຄວາມເຕີບໃຫຍ່ເຂັ້ມແຂງຂອງທຸລະກິດ, ເຮັດໃຫ້ທຸລະກິດໃຫຍ່ ກັບກາຍເປັນທຸລະກິດນ້ອຍ (ແຕກອອກເປັນປ່ຽງໆ), ເພີ່ມລາຍຈ່າຍ, ເອື້ອອຳນວຍໃຫ້ແກ່ບາງບໍລິສັດ, ເປັນການສ້າງຊ່ອງຫວ່າງທີ່ບໍ່ດີ ແລະ ດ້ານລົບອື່ນໆ. ແມ່ນບໍ່ຄວນເຮັດ. ຖ້າໄດ້ອອກປະກາດນຳໃຊ້ໄປແລ້ວ ກໍຄວນເບິ່ງຄືນແລ້ວແກ້ໄຂສ່ວນທີ່ບໍ່ສອດຄ່ອງ.
ກ. ສິ່ງທີ່ຖືກຕ້ອງຄວນຮັກສາຜັນຂະຫຍາຍ ແລະ ຈັດຕັ້ງປະຕິບັດ.
1. ບໍລິສັດທີ່ດຳເນີນທຸລະກິດນ້ຳມັນມາໄດ້ຫລາຍສິບປີແລ້ວ, ມີປະສິດທິຜົນ, ມີໂຄງປະກອບການຈັດຕັ້ງທີ່ເຂັ້ມແຂງ ແລະ ເຄື່ອງມືຄົບຊຸດ… ແມ່ນຄວນຮັກສາ (ບໍ່ແຍກ)
2. ຜູ້ໃດຢາກສ້າງຕັ້ງບໍລິສັດຂຶ້ນໃໝ່ ຕາມຮູບແບບແຕ່ລະປະເພດບໍລິສັດ ແມ່ນຕ້ອງໃຫ້ຄົບເງື່ອນໄຂ ແລະ ມາດຕະຖານ ທີ່ແຕ່ລະຂະແໜງການຂອງລັດ ໄດ້ກຳນົດໄວ້.
3. ປະກອບເອກະສານທີ່ຖືກຕ້ອງ ເພື່ອຂໍອະນຸຍາດສ້າງຕັ້ງບໍລິສັດ ນຳກະຊວງການຄ້າ.
4. ການອອກໃບທະບຽນວິສາຫະກິດ ແລະ ໃບອະນຸຍາດໃຫ້ເຄື່ອນໄຫວທຸລະກິດ.
5. ກວດກາ, ຕິດຕາມ ແລະ ຄວບຄຸມ ການດຳເນີນທຸລະກິດ ທີ່ກ່ຽວກັບນ້ຳມັນໃຫ້ໄດ້ດີ.
6. ກວດກາມາດຕະຖານຂອງປ້ຳບໍລິການນ້ຳມັນ, ຄຸນນະພາບ ແລະ ປະລິມານນ້ຳມັນ.
7. ກວດກາຄວາມຖືກຕ້ອງ ໃນການນຳເຂົ້າສິນຄ້ານ້ຳມັນແຕ່ລະຊະນິດ ໃນທົ່ວປະເທດ.
8. ກວດກາຄວາມຖືກຕ້ອງໃນການຄິດໄລ່ ແລະ ມອບເງິນພາສີ, ອາກອນຕ່າງໆ ໃຫ້ລັດ.
9. ດັດສົມຜູ້ປະກອບການ ທຸລະກິດ ກ່ຽວກັບນ້ຳມັນ ໃນຂອບເຂດທົ່ວປະເທດ.
10. ກຳນົດໂຄງສ້າງລາຄານ້ຳມັນໃນແຕ່ລະໄລຍະ ໃຫ້ຖືກຕ້ອງ ແລະ ສົມເຫດສົມຜົນ.
11. ປະຕິບັດນະໂຍບາຍຍ້ອງຍໍ ຕໍ່ກັບຜູ້ທີ່ເຮັດໄດ້ດີ ແລະ ປະຕິບັດວິໄນຕໍ່ຜູ້ທີ່ກະທຳຜິດ.
(11 ຂໍ້ທີ່ກ່າວມາ +…. ແມ່ນເປັນໜ້າທີ່ຂອງມະຫາພາກ)
ຂ. ສິ່ງທີ່ບໍ່ເໝາະສົມ, ບໍ່ຄວນເຮັດ ຫລື ບໍ່ຄວນຜັນຂະຫຍາຍຕ້ອງໄດ້ແກ້ໄຂ.
1. ການແຍກບໍລິສັດໃຫຍ່ ໃຫ້ກາຍເປັນບໍລິສັດນ້ອຍ ແມ່ນບໍ່ສອດຄ່ອງເຫດຜົນຄື:
1.1 ພາໃຫ້ບໍລິສັດ ທີ່ໃຫຍ່ ແລະ ເຂັ້ມແຂງຢູ່ແລ້ວກາຍເປັນບໍລິສັດນ້ອຍ ທີ່ອ່ອນແອ.
1.2 ພາໃຫ້ໂຄງປະກອບການຈັດຕັ້ງຈາກ 1 ຈະເພີ່ມເປັນ 2,3 ຫລື ຫລາຍກວ່ານັ້ນ.
1.3 ຈະເພີ່ມລາຍຈ່າຍສິ້ນເປືອງຂຶ້ນຕື່ມຕາມໂຄງປະກອບການຈັດຕັ້ງແບບຄູນ2…
1.4 ຈະແຍກສຳນັກງານ, ແຍກພະນັກງານ, ແບ່ງຊັບສິນ ແລະ ໜີ້ສິນ, ມີບັນຊີຂອງໃຜມັນ.
1.5 ຈະສ້າງພາລະບົດບາດ, ສິດ ແລະ ໜ້າທີ່ຂອງແຕ່ລະບໍລິສັດຄືນໃໝ່, ກຳນົດກາຈ້ຳ.
ສັນຍາລັກຂອງບໍລິສັດ (LOGO), ເຄື່ອງແບບຂອງພະນັກງານຄືນໃໝ່ທັງໝົດ.
1.6 ຄວາມຄ່ອງຕົວໃນການດຳເນີນທຸລະກິດ ແມ່ນຈະບໍ່ໂລ່ງລ່ຽນຄືກັບເປັນບໍລິສັດດຽວ ຫລື ອາດຈະເກີດມີຂໍ້ຂັດແຍ່ງ ນຳກັນ ແລ້ວສົ່ງຜົນກະທົບທຸລະກິດກໍເປັນໄດ້.
2. ເປັນການສ້າງເງື່ອນໄຂ ໃຫ້ແກ່ຜູ້ທີ່ເຮັດທຸລະກິດນ້ຳມັນບໍ່ຖືກຕ້ອງ ສວຍໃຊ້ດຳລັດນີ້.
3. ຈະເປັນການເພີ່ມຊ່ອງຫວ່າງບ່ອນອີງເພື່ອໃຫ້ບຸກຄົນສວຍໃຊ້ໃນການຄິດໄລ່ພາສີ ແລະ ອາກອນຕ່າງໆ ແລ້ວບໍ່ເອົາເງິນມອບເຂົ້າງົບປະມານຂອງລັດ.
4. ເປັນການສວນກະແສກ່ຽວກັບກົງຈັກການຈັດຕັ້ງຂອງລັດຖະບານ ທີ່ຢາກເຮັດໃຫ້ການຈັດຕັ້ງຂອງລັດ, ຂອງລັດວິສາຫະກິດ ແລະ ຫົວໜ່ວຍທຸລະກິດຕ່າງໆ ມີຄວາມກະທັດຮັດ, ເຂັ້ມແຂງ, ມີປະສິດທິພາບ ແລະ ມີປະສິດທິຜົນສູງ.
5. ເຖິງຈະແຍກເປັນ 2 ບໍລິສັດຄື ບໍລິສັດນຳເຂົ້າ-ສົ່ງອອກ ແລະ ບໍລິສັດຈຳໜ່າຍພາຍໃນແຕ່ວ່າລາຍຮັບຂອງລັດກໍຈະບໍ່ເພີ່ມຂຶ້ນພໍເທົ່າໃດ, ຊ້ຳບໍ່ພໍຍັງຈະຫລຸດລົງຕື່ມອີກ.
6. ເຮັດໃຫ້ລາຄານ້ຳມັນຂາຍຍ່ອຍຢູ່ປ້ຳຈະແພງຂຶ້ນ ກະທົບເສດຖະກິດ ແລະ ສັງຄົມ.
# ສິ່ງທີ່ຄວນເອົາໃຈໃສ່.
- ທຸກໆເອກະສານທາງການ ເຊິ່ງນັບທັງລັດຖະທຳມະນູນ, ກົດໝາຍ, ດຳລັດ, ຄຳສັ່ງ ແລະ ແຈ້ງການຕ່າງໆທີ່ໄດ້ປະກາດໃຫ້ນຳໃຊ້ໄປແລ້ວນັ້ນ ໃນເມື່ອມີອັນບໍ່ສອດຄ່ອງກໍສາມາດປັບປຸງ, ແກ້ໄຂ ຫລື ລົບລ້າງໄດ້.
- ຄວາມເວົ້າທີ່ວ່າ: (ມີດຳລັດແລ້ວ ໃຫ້ເຮັດໄປກ່ອນ, ແລ້ວຈຶ່ງແກ້ຕາມຫລັງ), ແມ່ນເປັນຄວາມເວົ້າທີ່ບໍ່ເໝາະ ທີ່ຈະໃຊ້ກັບການກະທຳທີ່ເປັນອັນຕະລາຍ, ກິດຈະການກໍ່ສ້າງທີ່ມີມູນຄ່າສູງ… ເຊິ່ງລວມທັງ (ການແຍກບໍລິສັດນ້ຳມັນໃຫຍ່ ໃຫ້ເປັນບໍລິສັດນ້ອຍ).
- ລັດຖະບານ ກໍຄືກະຊວງອຸດສາຫະກຳ ແລະ ການຄ້າ ຄວນກຳນົດຄຸນລັກສະນະ ແລະ ຮູບແບບທຸລະກິດນ້ຳມັນເຊັ່ນ: ບໍລິສັດຂອງລັດ 100%, ລັດຫຸ້ນສ່ວນກັບເອກະຊົນ, ລັດຮ່ວມທຶນກັບຕ່າງປະເທດ ແລະ ບໍລິສັດຂອງເອກະຊົນ 100%.
- ທຸກໆ ຄວາມຄິດເຫັນ ຈະແມ່ນຈາກພາກສ່ວນທີ່ກ່ຽວຂ້ອງ, ນັກວິຊາການ ຫລື ບຸກຄົນທີ່ທັກທ້ວງ ສະເໜີ ເພື່ອໃຫ້ລັດຖະບານ ແລະ ພາກສ່ວນທີ່ກ່ຽວຂ້ອງຮັບຮູ້ ແລ້ວປັບປຸງແກ້ໄຂດຳລັດສະບັບນີ້ ແມ່ນເປັນສິ່ງທີ່ດີ ທີ່ສຸດ ແລະ ກໍບໍ່ໃຫ້ການນຳກະຊວງອຸດສາຫະກຳ ແລະ ການຄ້າ ກໍຄືລັດຖະບານ ຖືບັນດາຄວາມຄິດເຫັນຕ່າງໆ ນັ້ນວ່າ (ເປັນການຕໍ່ຕ້ານພັກ-ລັດ ຫລື ຂັດຂວາງແນວທາງ) ແຕ່ຢ່າງໃດ.
- ຖ້າວ່າຮັບຮູ້ ແລະ ເຫັນໃນສິ່ງທີ່ເປັນບັນຫາ ແລະ ບໍ່ສອດຄ່ອງ, ແຕ່ຍັງຝືນສືບຕໍ່ເຮັດ ໃນເມື່ອເກີດມີຄວາມເສຍຫາຍຕາມມາ… ແມ່ນບໍ່ຄວນເຮັດຢ່າງຍິ່ງ.
ວຽງຈັນ, ວັນທີ 27/11/2019
