ທົ່ວໂລກເດີນຂະບວນວັນຢຸດຕິການໃຊ້ຄວາມຮຸນແຮງຕໍ່ແມ່ຍິງ
ຄົນທົ່ວໂລກຮ່ວມເດີນຂະບວນເນື່ອງໃນວັນຢຸດຕິການໃຊ້ຄວາມຮຸນແຮງຕໍ່ແມ່ຍິງສາກົນ ໃນວັນທີ 25 ພະຈິກນີ້.
ການເດີນຂະບວນໃນເທື່ອນີ້ສະທ້ອນເຖິງກະແສບໍ່ພໍໃຈທີ່ເພີ່ມຂຶ້ນເລື່ອງລະບົບຢຸດຕິທຳບໍ່ສາມາດລົງໂທດຜູ້ກະທຳຜິດໄດ້ ຫລັງທ້າຍອາທິດຜ່ານມາມີການເດີນຂະບວນປະທ້ວງການຄາດຕະກຳແມ່ຍິງທີ່ເອີ້ນວ່າ: ອິຖີຄາດ. ຂໍ້ມູນຂອງສະຫະປະຊາຊາດເປີດເຜີຍວ່າ: ປີ 2017 ມີເດັກຍິງ ແລະ ແມ່ຍິງທົ່ວໂລກຖືກຂ້າປະມານ 87.000 ຄົນ, ຜູ້ເດີນຂະບວນຢູ່ນະຄອນຫລວງມົດສະກູຂອງຣັດເຊຍເນັ້ນເລື່ອງລັດຖະບານບໍ່ອອກກົດໝາຍຄຸ້ມຄອງແມ່ຍິງ, ຂະນະທີ່ແມ່ຍິງຢູ່ຊູດັງຊຸມນຸມໃນເມືອງຫລວງເປັນເທື່ອທຳອິດໃນຮອບຫລາຍທົດສະວັດຮຽກຮ້ອງເສລີພາບ, ສັນຕິພາບ ແລະ ຄວາມຍຸຕິທຳ, ສ່ວນຢູ່ນະຄອນຫລວງເມັກຊິກ ກຸ່ມຄົນປິດບັງໃບໜ້າທຳລາຍຊັບສິນສາທາລະນະປະທ້ວງທາງການທີ່ບໍ່ຢຸດຢັ້ງການຄາດຕະກຳແມ່ຍິງ ແລະ ການຂົມຂື່ນທີ່ເພີ່ມສູງຂຶ້ນ.
ປະທານາທິບໍດີອາຟຣິກາໃຕ້ໃຊ້ວັນດັ່ງກ່າວເປີດຕົວໂຄງການເອື້ອອຳນວຍໃຫ້ເຫຍື່ອຄວາມຮຸນແຮງໄດ້ຮັບຄວາມຍຸຕິທຳເພີ່ມຂຶ້ນ ແລະ ຮຽກຮ້ອງຜູ້ຊາຍໃຫ້ຖິ້ມທັດສະນະຄະຕິຢຽດເພດ ແລະ ຖືວ່າຜູ້ຊາຍເປັນໃຫຍ່. ສ່ວນນາຍົກລັດຖະມົນຕີ ເອດວດ ຟີລິບ ຂອງຝຣັ່ງ ເປີດເຜີຍວ່າ: ຈະສະເໜີມາດຕະການໃໝ່ຕໍ່ລັດຖະສະພາໃນເດືອນມັງກອນທີ່ຈະໃຫ້ຜົນທັນທີ ດ້ວຍການຢຸດຕິຄວາມໄຮ້ເຫດຜົນ ແລະ ຄວາມບົກຜ່ອງໃນຂໍ້ກົດໝາຍ. ຂໍ້ມູນຂອງ AFP ລະບຸວ່າ: ນັບແຕ່ຕົ້ນປີຈົນເຖິງປັດຈຸບັນ ມີແມ່ຍິງຢູ່ຝຣັ່ງຖືກຄົນຮັກ ຫລື ຄົນຮັກເກົ່າຂ້າ 117 ຄົນ, ທຳຮ້າຍຮ່າງກາຍ ຫລື ປະທຸບຮ້າຍທາງເພດ 213.000 ຄົນ ແລະ ພົບວ່າຄະດີອິຖີຄາດທຸກຄະດີໃນເດືອນນີ້ເກີດຂຶ້ນທັງທີ່ມີສັນຍານເຕືອນລ່ວງໜ້າວ່າມີການໃຊ້ຄວາມຮຸນແຮງຕໍ່ແມ່ຍິງ, ແຕ່ເຈົ້າໜ້າທີ່ລົ້ມເຫລວໃນການປົກປ້ອງພວກນາງ.
