ໄພພິບັດຍ່ອມເກີດຂຶ້ນໄດ້ທຸກເມື່ອ
ໂດຍ: ທິດກ່ຳ.
ໃນຕອນເຊົ້າຕູ່ຂອງວັນທີ 21 ພະຈິກຜ່ານມາ, ໄດ້ມີປາກົດການແຜ່ນດິນໄຫວຢູ່ເມືອງຫົງສາແຂວງໄຊຍະບູລີ ເຊິ່ງມີຄວາມສັ່ນສະເທືອນຮຸນແຮງເຖິງ 6,4 ຣິກເຕີ, ປາກົດການແຜ່ນດິນໄຫວຄັ້ງນີ້ເຫັນວ່ານັບມື້ຮຸນແຮງຂຶ້ນເລື້ອຍໆຖ້າທຽບໃສ່ຫລາຍໆຄັ້ງທີ່ເກີດຂຶ້ນຢູ່ທາງພາກເໜືອຂອງລາວເຮົາໃນຫລາຍໆປີຜ່ານມາ ເຊັ່ນ: ແຖວແຂວງຜົ້ງສາລີ, ຫົວພັນ ເພາະວ່າໃນແຕ່ລະຄັ້ງຜ່ານມານັ້ນ ມີພຽງ 2-3 ຣິກເຕີ ເປັນພຽງຄວາມຮູ້ສຶກສັນສະເທືອນເລັກນ້ອຍເທົ່ານັ້ນ. ແຕ່ວ່າສຳລັບຄັ້ງນີ້ໄດ້ສ້າງຄວາມເສຍຫາຍບໍ່ໜ້ອຍຕໍ່ຊັບສິນ ແລະ ເຮືອນຊານທີ່ຢູ່ອາໄສຂອງປະຊາຊົນເມືອງຫົງສາ ກໍຄືປະຊາຊົນບັນດາເຜົ່າຊາວແຂວງໄຊຍະບູລີໂດຍລວມ. ປາກົດການສັ່ນສະເທືອນໄດ້ແກ່ຍາວມາຫລາຍຄັ້ງຕິດຕໍ່ກັນເປັນໄລຍະໆເຖິງ 100 ກວ່າຄັ້ງ ຈົນເຮັດໃຫ້ຄົນທັງຫລາຍໃຜກໍມີຄວາມແຕກຕືນເສຍຂວັນຢ້ານກົວບໍ່ກ້າເຂົ້າໄປນອນໃນເຮືອນ. ຍັງບໍ່ພຽງເທົ່ານັ້ນ, ຄວາມແຮງສັ່ນສະເທືອນຍັງສະທ້ອນລົງມາຮອດນະຄອນຫລວງວຽງຈັນ, ບັນດາແຂວງພາກເໜືອຂອງລາວ ແລະ ໄທ ພາກັນອົນລະເວງແຕກຕື່ນໄປຕາມໆກັນ.
ປີນີ້, ຖືເປັນປີທີ່ປະເທດເຮົາໄດ້ຮັບຜົນກະທົບຈາກໄພພິບັດຢ່າງໃຫຍ່ຫລວງອັນເປັນການທຳລາຍເສດຖະກິດ-ສັງຄົມຂອງປະເທດຫລາຍຄົມຄວນ, ຊ່ວງລະດູຝົນພັດເກີດໄພນ້ຳຖ້ວມຢູ່ແຂວງພາກກາງ ແລະ ພາກໃຕ້, ຍ່ານພາກກາງ ແລະ ພາກເໜືອ ພັດປະສົບບັນຫາການຂາດເຂີນນ້ຳ, ເກີດໄພແຫ້ງແລ້ງ ບາງພື້ນທີ່ບໍ່ມີນ້ຳພຽງພໍຕໍ່ການຜະລິດ.
ຢູ່ນະຄອນຫລວງວຽງຈັນເຮົາເຂດເມືອງໄຊທານີ, ໄຊເສດຖາ ນ້ຳປະປາ ໃຊ້ບໍ່ພຽງພໍມາຫລາຍວັນ, ພໍຕົກມາຮອດລະດູແລ້ງພັດເກີດມີປາກົດການແຜ່ນດິນໄຫວຢ່າງບໍ່ຄາດຄິດ. ນີ້ຄືສິ່ງບອກເຕືອນໃຫ້ຄົນລາວເຮົາທຸກຄົນຕ້ອງໄດ້ພ້ອມກັນຮັບຮູ້ເຂົ້າໃຈ ແລະ ພ້ອມກັນມີວິທີການ ເພື່ອຮັບມືໄວ້ລ່ວງໜ້າ ແລະ ຮັບປະກັນຢ່າງເຕັມທີ່.
ໃນອະດີດຕະການຜ່ານມາ, ປະເທດລາວເຮົາບໍ່ເຄີຍມີ ແລະ ບໍ່ເຄີຍໄດ້ຍິນຄຳວ່າແຜ່ນດິນໄຫວ, ຄົນລາວເຮົາໝົດປະເທດໃຜກໍຮັບຮູ້ ແລະ ເຂົ້າໃຈວ່າເປັນປະເທດທີ່ບໍ່ມີທະເລ, ບໍ່ມີມະຫາສະໝຸດ, ປັດສະຈາກແຜ່ນດິນໄຫວ ແລະ ຄື້ນສືນາມິ ແລະ ບັນຫາໄພພິບັດອື່ນໆທີ່ເກີດຈາກພາຍຸ ພໍຕົກມາເຖິງຍຸກນີ້ມັນໄດ້ກັບເກີດກັບຄົນລາວເຮົາແລ້ວ.
ປັດຈຸບັນໄພພິບັດທີ່ໄດ້ມາຂົ່ມຂູ່ຄົນລາວເຮົາແມ່ນເກີດຮ້ອນ, ເກີດໜາວ, ເກີດແລ້ງ, ເກີດຖ້ວມ, ເກີດແຜ່ນດິນໄຫວ, ອາດຈະຍັງບໍ່ທັນເກີດແຕ່ຄື້ນສຶນາມິ, ຂັ້ນຕໍ່ໄປພາຍໜ້າ ໄພພິບັດດັ່ງກ່າວອາດຖະຫລົ່ມຂົ່ມຂູ່ຄົນລາວເຮົາໄປຕະຫລອດ ຫລື ອາດຈະມີໄພພິບັດອື່ນໆເກີດຂຶ້ນໂດຍທີ່ເຮົາບໍ່ຄາດຝັນຢ່າງແນ່ນອນ.
ເມື່ອຕັ້ງໂຈດກັນວ່າ, ໄພພິບັດຕ່າງໆເຫລົ່ານີ້ມັນເກີດຂຶ້ນໄດ້ຍ້ອນຫຍັງ? ທຸກສິ່ງຢ່າງມັນກໍຍ້ອນໜ່ວຍໂລກພິພົບມີການປ່ຽນແປງໄປໃນຕົວຂອງມັນ. ແນ່ນອນ, ໃນເມື່ອໜ່ວຍໂລກມີການໝູນວຽນປ່ຽນໄປທຳມະຊາດ ແລະ ສິ່ງແວດລ້ອມ ກໍມີການປັບປ່ຽນໄປຕາມວາຕະຈັກຂອງມັນເອງ. ໄປຄຽງຄູ່ກັນນັ້ນ, ຈຳນວນພົນລະເມືອງຂອງໂລກ ກໍຄືຂອງແຕ່ລະປະເທດກໍນັບມື້ເພີ່ມຂຶ້ນ, ປັດໄຈຄວາມຮຽກຮ້ອງຕ້ອງການທາງດ້ານວັດຖຸ ແລະ ຈິດໃຈການດຳລົງຄົງຕົວກໍນັບມື້ເພີ່ມຂຶ້ນ, ການພັດທະນາສ້າງສາ, ຄວາມກ້າວໜ້າທາງດ້ານເຕັກໂນໂລຊີ ແລະ ການແກ້ງແຍ້ງແຂ່ງຂັນກັນເພື່ອຄວາມຢູ່ລອດ ຍິ່ງໃຫຍ່ເຮັດໃຫ້ຄົນເຮົາທຳລາຍທຳມະຊາດ ແລະ ສິ່ງແວດລ້ອມໄປຕິກໆ.
ສິ່ງທີ່ກ້າວມາທັງໝົດເຫລົ່ານີ້, ຄືປັດໄຈ ແລະ ແຫລ່ງທີ່ມາຂອງຄຳວ່າໄພພິບັດ. ແນ່ນອນໃນເມື່ອຄົນເຮົາທຳລາຍທຳມະຊາດໄປຫລາຍເທົ່າໃດທຳມະຊາດກໍກັບມາທຳລາຍຄົນເຮົາຫລາຍກວ່ານັ້ນ. ນີ້ຄືກົດເກນກະທົບໃນການຍືນຍົງຄົງຕົວ ແລະ ສູ້ຢັນກັນລະຫວ່າງຄົນເຮົາກັບທຳມະຊາດ.
ເພື່ອຫລີກລ້ຽງໄພພິບັດຕ່າງໆນາໆທີ່ອາດຈະມາສັງເວີຍຊີວິດຄົນລາວເຮົາຕ້ອງພາກັນເຮັດແນວໃດ? ທາງອອກທີ່ດີໃນໄລຍະປັດຈຸບັນທັນດ່ວນນັ້ນ ກໍຕ້ອງໄດ້ຕິດຕາມຂໍ້ມູນຂ່າວສານຈາກອຸຕຸນິຍົມ ແລະ ອຸທົກກະສາດ ເພາະສິ່ງນີ້ຄືການບອກເຕືອນໃຫ້ພວກເຮົາຮັບຮູ້ໄວ້ລ່ວງໜ້າ ແລ້ວຫາວິທີທາງແກ້ໄຂຫລົບຫລີກ. ອັນສອງມາແມ່ນສ້າງສິ່ງທົດແທນໃຫ້ທຳມະຊາດໄດ້ຍືນຍົງຄົງຕົວໄດ້ຫລາຍໆ ກ່ອນໂລກໜ່ວຍນີ້ຈະດັບຂັນ ແລະ ສະຫລາຍໄປຕາມກົດເກນໃນຕົວຂອງມັນເອງເຊັ່ນ: ທຳລາຍປ່າຢູ່ບ່ອນໃດກໍໃຫ້ປູກປ່າທົດແທນເພື່ອຄວາມສົມດູນ, ມີການພັດທະນາສ້າງສາຢູ່ບ່ອນໃດເຮົາຕ້ອງໄລ່ລຽງຢ່າງຄັກແນ່, ຄິດເຖິງຜົນໄດ້ຜົນເສຍ, ບໍ່ໃຫ້ເຫັນແກ້ໄດ້ແຕ່ພັກພວກ ແລະ ກຸ່ມກ້ອນຂອງຕົນເອງ ຕ້ອງເບິ່ງຜົນປະໂຫຍດລວມຂອງໂລກ, ຂອງຊາດ ແລະ ຂອງແຜ່ນດິນ.
ໃນແຜນພັດທະນາປູກປ່າໃຫ້ມີພື້ນທີ່ສີຂຽວຂອງພັກ ແລະ ລັດຖະບານເຮົາໄດ້ຄາດຄະເນໃນປີ 2015 ໃຫ້ໄດ້ 45%, ປີ 2020 ໃຫ້ໄດ້ 70% ຂອງພື້ນທີ່ໃນທົ່ວປະເທດ, ແຕ່ວ່າມາຮອດດຽວນີ້ອີງຕາມວະລະສານສາກົນທີ່ກ່ຽວຂ້ອງໄດ້ໃຫ້ຂໍ້ມູນເມື່ອບໍ່ດົນນີ້ວ່າ: ປະເທດເຮົາໄດ້ເຖິງ 80 ກວ່າເປີເຊັນແລ້ວ. ນີ້ແມ່ນຜົນສຳເລັດໃນການປິດປ່າ, ປູກປ່າ ນັບແຕ່ປີ 2015 ເປັນຕົ້ນມາ, ຂັ້ນຕໍ່ໄປພວກເຮົາຕ້ອງພ້ອມກັນປູກປ່າ ແລະ ປົກປັກຮັກສາປ່າໃຫ້ຫລາຍຂຶ້ນຊັກໄຊ້.
ອັນສຳຄັນຕ້ອງສະກັດກັ້ນພວກຈັງໄຮໄປຫາລັກຕັດໄມ້ທຳລາຍປ່າ, ເປັນຫູເປັນຕາຊ່ວຍກັນ, ເຫັນຢູ່ບ່ອນໃດໃຫ້ສົ່ງຂ່າວລາຍງານລັດຖະບານ ຫລື ອົງການທີ່ກ່ຽວຂ້ອງ, ຜູ້ໃດຝ່າຝືນຕ້ອງຈັບມາລົງໂທດຕາມກົດໝາຍ ເພາະພວກນີ້ລະເປັນຕົວການທຳລາຍຄວາມຈິບຫາຍວາຍວອດຂອງປະເທດຊາດ.
