ລາວເລີ່ມພັດທະນາລະບົບກວດຄົນເຂົ້າ-ອອກເມືອງທີ່ໃຊ້ປື້ມຜ່ານແດນທັນສະໄໝ
ກະຊວງປ້ອງກັນຄວາມສະຫງົບໄດ້ມືຮ່ວມກັບກຸ່ມບໍລິສັດ ຊີເຄການຄ້າ ຂາອອກ-ຂາເຂົ້າ ຈໍາກັດ ແລະ ບໍລິສັດ ບົວທິບລາວ ຈໍາກັດ ເພື່ອພັດທະນາລະບົບກວດຄົນເຂົ້າ-ອອກເມືອງທີ່ນໍາໃຊ້ປື້ມຜ່ານແດນທັນສະໄໝ (E-Borderpass) ແລະ ລະບົບໂອໂຕເກດ (AutoGate System) ຢູ່ດ່ານສາກົນຕ່າງໆໃນທົ່ວປະເທດ, ເພື່ອແນໃສ່ເຮັດໃຫ້ວຽກງານດັ່ງກ່າວມີຄວາມສະດວກ, ວ່ອງໄວ ແລະ ທັນສະໄໝ ຕາມແນວທາງຫັນເປັນທັນສະໄໝໃຫ້ທຽບເທົ່າສາກົນ, ພ້ອມທັງເປັນການຍົກລະດັບວຽກງານຂອງກໍາລັງປ້ອງກັນຄວາມສະຫງົບ ໃນການປົກປ້ອງສິດຜົນປະໂຫຍດຂອງປະຊາຊົນໃຫ້ມີຄວາມປອດໄພ, ເຊິ່ງປື້ມຜ່ານແດນທີ່ຈະພັດທະນາຂຶ້ນມາໃໝ່ນີ້ ຜະລິດດ້ວຍເຄື່ອງມືຂອງເຕັກໂນໂລຊີລະດັບສູງ, ສາມາດບັນຈຸຂໍ້ມູນຕ່າງໆຜູ້ນໍາໃຊ້ໄດ້ຫລາຍ ແລະ ສາມາດເຊື່ອມຕໍ່ຂໍ້ມູນໄປສູ່ລະບົບໂອໂຕເກດ, ເຊິ່ງຈະເຮັດໃຫ້ການກວດກາຄົນເຂົ້າ-ອອກເມືອງຂອງເຈົ້າໜ້າທີ່ ຕມ ມີປະສິດທິຜົນ ແລະ ວ່ອງໄວ.
ພິທີລົງນາມການຮ່ວມມືພັດທະນາລະບົບດັ່ງກ່າວໄດ້ມີຂຶ້ນໃນວັນທີ 18 ພະຈິກຜ່ານມານີ້ຢູ່ນະຄອນຫລວງວຽງຈັນ, ໂດຍມີທ່ານລັດຖະມົນຕີກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມ.
