ລະວັງ! ສິນຄ້າຫັດຖະກຳລາວມີການປອມແປງ
ໂດຍ: ທ່ຽງທຳ
ສະບາຍດີ, ເພື່ອນຜູ້ອ່ານ ທີ່ຮັກແພງ ຄຳວ່າ: ລາວເຮັດລາວໃຊ້ ລາວໄດ້ລາວຈະເລີນ ຊຶ່ງເປັນນະໂຍບາຍເພື່ອສົ່ງເສີມການຜະລິດສິນຄ້າພາຍໃນໃຫ້ເຂັ້ມແຂງ, ແຕ່ໃນປັດຈຸບັນຄຳເວົ້າດັ່ງກ່າວອາດຈະຄ່ອຍສູນຫາຍໄປເທື່ອລະ ໜ້ອຍ, ເມື່ອການສົ່ງເສີມຜູ້ ຜະລິດພາຍໃນຍັງມີໜ້ອຍ, ດັ່ງການຜະລິດກະສິກຳກໍ ຄ່ອຍໆຖືກແກ່ງແຍ້ງໄປແລ້ວ, ມາບົດນີ້, ເຮົາລາມມາໃສ່ການຜະລິດຫັດຖະກຳອັນ ເປັນກຳລັງແຮງໜຶ່ງຂອງຊາວລາວ ກໍເລີ່ມຈະຖືກແກ່ງແຍ້ງໄປອີກແລ້ວ, ດັ່ງຫັດຖະກຳຕ່ຳຫູກ ຜະລິດຕ່ຳແພ, ສິ້ນໄໝຕ່າງໆອັນເປັນທີ່ນິຍົມຂອງຊາວລາວເຮົາ, ແຕ່ປັດຈຸບັນນີ້ ນອກຈາກຈະພົບ ອຸປະສັກຕ່າງໆແລ້ວ, ພັດຍັງມາພົບວ່າສິ້ນໄໝດັ່ງກ່າວ ມີການປອມແປງຈາກນັກທຸລະກິດຫົວໃສຕ່າງປະເທດ, ດັ່ງແມ່ຄ້າຂາຍເຄື່ອງແພໄໝ ແລະ ສິ້ນໄໝໃນຕະຫລາດເຊົ້າໃຫ້ຮູ້ວ່າ: ການປອມແປງສິ້ນໄໝລາວໄດ້ເກີດມີຂຶ້ນມາເກືອບ 2 ປີແລ້ວ, ຊຶ່ງມີການລັກລອບນຳເຂົ້າຈາກຕ່າງປະເທດມາຂາຍໃນລາຄາຖືກຕາມທ້ອງຕະຫລາດບ້ານເຮົາ, ນັບແຕ່ເຫນືອຈົນຮອດໃຕ້ມາກົດໜ່ວງດ້ານລາຄາຂອງສິນຄ້າລາວ, ໂດຍສະເພາະສິ້ນໄໝແທ້ຂອງລາວເຮົາຈົນເກືອບບໍ່ໄດ້ຂາຍ ແລະ ເຮັດໃຫ້ຜູ້ຕໍ່າຫູກ ທໍໄໝ ລາວ ເຮົານັບມື້ທົດຖອຍ, ເພາະລາຄາສິ້ນໄໝກ໋ອບປີ້ຜືນໜຶ່ງມີພຽງ 70-80 ພັນກີບ. ສ່ວນ ຂອງເຮົາຊຶ່ງເປັນຂອງແທ້ກໍອາດຈະມີລາຄາຫລາຍກວ່ານັ້ນ.
ດັ່ງທ່ານ ຫານຊະນະ ສີສານ ປະທານສະມາຄົມຫັດຖະກຳລາວ ໃຫ້ຮູ້ວ່າ: ປັດຈຸບັນການນຳເຂົ້າສິ້ນຈາກຕ່າງປະເທດ ນອກຈາກຈະເປັນການຫຍໍ້ທໍ້ແລ້ວກົດລາຄາແລ້ວ, ຍັງສົ່ງຜົນກະທົບຕໍ່ວັດທະນະທຳລາວ, ໂດຍສະເພາະການອະນຸລັກຮັກສາອາຊີບຫັດຖະກຳລາວໃຫ້ຄົງຢູ່, ເນື່ອງຈາກປັດຈຸບັນການຜະລິດສ່ວນໃຫຍ່ແມ່ນອາໃສ່ເຄື່ອງຈັກ, ສະນັ້ນການຜະລິດສິ້ນໄໝຂອງຄົນລາວແມ່ນມີລັກສະນະທຳມະຊາດ, ໂດຍສະເພາະແມ່ນການຕຳຫູກທໍໄໝ, ຊຶ່ງຈະມີມາດຕະຖານ ດີກວ່າ ແລະ ເປັນທຳມະຊາດກ່ວາ, ສ່ວນສິ້ນກ໋ອບປີ້ຂອງຕ່າງປະເທດ ແມ່ນຈະແຕກຕ່າງກັັນ, ນັບທັງດ້ານລາຄາ ແລະ ຄຸນນະພາບຂອງມັນ. ນອກນີ້, ກໍຍັງພົບບັນຫາເລື່ອງວັດຖຸດິບຂອງກຸ່ມຜະລິດສິ້ນໄໝ, ສະນັ້ນຈຶ່ງເກີດມີການນຳເຂົ້າສິ້ນຈາກຕ່າງປະເທດເຂົ້າມາຈຳໜ່າຍແທນໃນທ້ອງຕະຫລາດ, ປັດຈຸບັນສະມາຄົມມີກຸ່ມຜະລິດສິ້ນໄໝພຽງ 30 ກ່ວາກຸ່ມ, ເນື່ອງຈາກການຜະລິດ ແລະ ຈຳໜ່າຍຫລຸດລົງ. ຍ້ອນຜົນກະທົບຈາກສິນຄ້ານຳເຂົ້າຈາກຕ່າງປະເທດ.
ປະທານສະມາຄົມຫັດຖະກຳລາວ ໃຫ້ຮູ້ອີກວ່າ: ປັດຈຸບັນ ເມື່ອຄວາມຈະເລີນ ຫລື ເສດຖະກິດການຕະຫລາດ ໄດ້ແຜ່ເຂົ້າມາ, ສື່ລາມົກ, ຄວາມຮຸນແຮງ ຫລື ເວົ້າຢ່າງ ໜຶ່ງຄືວັດທະນະທຳແບບຕາເວັນຕົກກໍໄດ້ແຜ່ຜາຍເຂົ້າມາເຊັ່ນກັນ, ອັນໄດ້ເຮັດໃຫ້ຜູ້ ຄົນທັງຫລາຍໂດຍສະເພາະຜູ້ທີ່ອາໃສໃນຕົວເມືອງໃຫຍ່ໆປະຖິ້ມຮີດຄອງປະເພນີວັດທະນະທຳ, ການແຂ່ງຂັນດ້ານທຸລະກິດທີ່ດຸເດືອດ, ກະແສນີຍົມວັດຖຸນັບມື້ນັບທະວີຂຶ້ນ, ໄດ້ເຮັດໃຫ້ວັດທະນະທຳ, ວິຖີຊີວິດຂອງຄົນລາວໃນເມື່ອກ່ອນຄ່ອຍໆຂາດຫາຍໄປ, ເມື່ອວັດທະນະທຳສູນເສຍໄປຈິດໃຈຂອງຄົນກໍຍ່ອມປ່ຽນແປງໄປ, ແຕ່ສິ່ງເຫລົ່ານີ້ຍັງບໍ່ລ້າສວາຍເທື່ອສຳຫລັບຄົນລາວ, ໃນເມື່ອວ່າຍັງມີຄົນລາວຮັກ ແລະ ຫວງແຫນວັດທະນະທຳຂອງຊາດຂອງຕົນໄວ້, ແມ່ຍິງລາວຍັງນຸ່ງສິ້ນ, ຜູ້ເຖົ້າຜູ້ແກ່ຍັງນິຍົມເຂົ້າວັດ ແລະ ເຮັດບຸນສິນກິນທານ, ເຊື່ອວ່າປະເທດລາວຍັງຄົງຈະເປັນດິນແດນແຫ່ງອະລິຍະທຳອັນງົດງາມອີກຢ່າງຍາວນານ.
