ປີ 2019 ພົ້ນເດັ່ນແມ່ນຄະດີຢາເສບຕິດ
ຕາມການລາຍງານຂອງປະທານ ສານປະຊາຊົນສູງສຸດ ຕໍ່ກອງປະຊຸມສະໄໝສາມັນ ຂອງສະພາແຫ່ງຊາດ ຊຶ່ງພວມດໍາເນີນຢູ່ນີ້ ໃຫ້ຮູ້ວ່າ: ປີ 2019 ນີ້, ຢູ່ທົ່ວປະເທດເຮົາມີຄະດີຮ້ອງຟ້ອງຂຶ້ນສານຫຼາຍເຖິງ 10.958 ເລື່ອງ, ໃນນັ້ນ, ຄະດີຄ້າງມາ 2.457 ເລື່ອງ ແລະ ແກ້ໄຂແລ້ວ 8.007 ເລື່ອງ ເທົ່າກັບ 73,09% ຂອງຄາດວາງໄວ້, ການຂໍອຸທອນ, ການຂໍລົບລ້າງ ແລະ ການຂໍຮື້ຟື້ນຄະດີມາໃໝ່. ທ່ານປະທານສານໃຫ້ຮູ້ວ່າ: ຄະດີທີ່ພົ້ນເດັ່ນ ແລະ ເກີດຂຶ້ນຫຼາຍກວ່າໝູ່ແມ່ນ ຄະດີຄ້າຂາຍຢາເສບຕິດ ມີ 2.426 ເລື່ອງ.
ສ່ວນຄະດີແພ່ງ ແມ່ນຄະດີສັນຍາກູ້ຢືມ ມີ 366 ເລື່ອງ, ທັດລົງມາແມ່ນຄະດີຄອບຄົວ ສາຍຜົວ-ເມຍຂໍຢ່າຮ້າງ ມີ 353 ເລື່ອງ, ສະເພາະຄະດີຂັ້ນຮື້ຟື້ນທີ່ຫົວໜ້າອົງການໄອຍະການປະຊາຊົນສູງສຸດ ສະເໜີຕໍ່ສານປະຊາຊົນສູງສຸດ ໃນປີ 2019 ລວມມີ 50 ເລື່ອງ, ແກ້ໄຂແລ້ວ 40 ເລື່ອງ ແລະ ພ້ອມນີ້ສານປະຊາຊົນຍັງໄດ້ຄົ້ນຄວ້າອອກຄໍາຊີ້ຂາດໂທດປະຫານຊີວິດ 9 ເລື່ອງ.
ໃນກອງປະຊຸມບັນດາສະມາຊິກສະພາແຫ່ງຊາດ ໄດ້ປະກອບຄໍາຄິດເຫັນ ແລະ ສະເໜີໃຫ້ເອົາໃຈໃສ່ປັບປຸງກົນໄກ, ແບບແຜນວິທີການດໍາເນີນຄະດີຢູ່ສານໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທໍາ.
