ອີທີແອລ ເປີດໃຫ້ບໍລິການລະບົບ 4.5G
ໃນວັນທີ 15 ພະຈິກນີ້, ບໍລິສັດ ອີທີແອລ ຈຳກັດ ໄດ້ຈັດພິທີເປີດໃຫ້ບໍລິການລະບົບ 4.5G ຂຶ້ນຢ່າງເປັນທາງ ການທີ່ໂຮງແຮມ ແລນມາກ ນະຄອນ ຫລວງວຽງຈັນ, ໂດຍການເຂົ້າຮ່ວມ ຂອງທ່ານ ປອ. ທັນສະໄໝ ກົມມະສິດ ລັດຖະມົນຕີກະຊວງໄປສະນີໂທລະຄົມ ມະນາຄົມ ແລະ ການສື່ສານ, ມີທ່ານ ບຸນສະ ເຫຼີມໄຊ ເຄນນາວົງ ຮອງລັດຖະ ມົນຕີກະຊວງໄປສະນີໂທລະຄົມມະນາ ຄົມ ແລະ ການສື່ສານ, ທ່ານ ຮວງ ສູຢຸນ (Huang SHUYUN) ຜູ້ອຳນວຍການ ບໍລິສັດ ອີທີແອລ ຈໍາກັດ ພ້ອມດ້ວຍຕົວແທນຈຳໜ່າຍຂອງອີທີແອລ ແລະ ແຂກເຂົ້າຮ່ວມເປັນຈຳນວນຫລາຍ.
ທ່ານ ໄຊສະຫງ່າ ບຸນນະຜົນ ຜູ້ຊ່ວຍອຳນວຍການໃຫຍ່ ຫົວໜ້າພະແນກລູກຄ້າອົງກອນໃຫ້ຮູ້ວ່າ: ປັດຈຸບັນນີ້ ອີທີແອລ ໄດ້ເປີດໃຫ້ບໍລິການ 4.5G ແລ້ວຈໍານວນ 1336 ຈຸດທົ່ວປະເທດ, ນອກຈາກນີ້ ອີທີແອລ ຍັງມີແຜນສືບຕໍ່ຂະຫຍາຍພື້ນທີ່ໃຫ້ບໍລິການ 4.5G ຕື່ມອີກເພື່ອຕອບ ສະໜອງຄວາມຮຽກຮ້ອງຕ້ອງການຂອງລູກຄ້າຫຼາຍຂຶ້ນ. ເນື່ອງຈາກການສື່ສານແບບໄຮ້ສາຍໄດ້ຖືກພັດທະນາໄປຢ່າງວ່ອງໄວ ແລະ ມີຄວາມກ້າວໜ້າ.
ດັ່ງນັ້ນ, ບໍລິສັດ ອີທີແອລ ຈຳກັດ ເຊິ່ງເປັນໜຶ່ງເຄືອຂ່າຍທີ່ໃຫ້ບໍລິການດ້ານການສື່ສານໂທລະຄົມມະນາຄົມໃນ ສປປ ລາວ ກໍໄດ້ພັດທະນາຕົນເອງເພື່ອນໍາເອົາເຕັກໂນໂລຊີໃໝ່ໆທີ່ທັນສະໄໝ ແລະ ກ້າວໜ້າມາໃຫ້ບໍລິການແກ່ສັງຄົມລາວດີຂຶ້ນ ແລະ ການເປີດນຳໃຊ້ລະບົບ 4.5G ໃນຄັ້ງນີ້ຖືເປັນຂີດໝາຍສໍາຄັນຂອງວຽກງານການສື່ສານໂທລະຄົມມະນາຄົມຂອງລາວກໍຄື ອີທີແອລ ແລະ ຜູ້ຊົມໃຊ້ໃນລາວເຊິ່ງຈະໄດ້ສໍາຜັດກັບ ເຕັກໂນໂລຊີທີ່ໄຮ້ສາຍ ແລະ ສາມາດຕິດຕໍ່ສື່ສານກັນແບບບໍ່ມີຂີດຈຳກັດພ້ອມ ນີ້ບໍລິສັດຍັງໄດ້ມີການພັດທະນາ 3 ສິ່ງໃຫມ່ຄື: ຜະລິດຕະພັນໃໝ່, ເຄືອຂ່າຍໃໝ່ ແລະ ບໍລິການໃໝ່ທີ່ສາມາດຕອບສະໜອງຄວາມຕ້ອງການຂອງຜູ້ຊົມໃຊ້ໂທລະຄົມມະນາຄົມໄດ້ຢ່າງດີ.
ແລະ ແນ່ນອນວ່າ ອີທີແອລ ຈະບໍ່ຢຸດຢັ້ງໃນການພັດທະນາທາງດ້ານສື່ສານ ເພື່ອຕອບສະໜອງການຊົມໃຊ້ທີ່ປ່ຽນແປງໄປເລື້ອຍໆ ແລະ ກ້າວໄປສູ່ຍຸກຂອງ 5G ໃນອະນາຄົດອັນໃກ້ໆນີ້.
