ຈີນຍົກເລີກຂວ້ຳບາດການນຳເຂົ້າຊີ້ນສັດປີກຈາກອາເມລິກາ
ຈີນ ປະກາດຍົກເລີກການຂວ້ຳບາດນຳເຂົ້າຊີ້ນສັດປີກຈາກອາເມລິກາ ເພື່ອທົດແທນບັນຫາຂາດເຂີນຊີ້ນໝູ ເນື່ອງຈາກການລະບາດຂອງພະຍາດອະຫິວາໝູອາຟຣິກາ ທີ່ເຮັດໃຫ້ໝູໃນປະເທດຈີນຕາຍໄປຫລາຍລ້ານໂຕໃນໄລຍະໜຶ່ງປີຜ່ານມາ.
ທັງນີ້ ຜູ້ແທນການຄ້າອາເມລິກາ ເຊື່ອວ່າທ່າທີຫລ້າສຸດຂອງຈີນຈະຊ່ວຍເພີ່ມມູນຄ່າການສົ່ງອອກຊີ້ນສັດປີກຂອງອາເມລິກາ ເຊິ່ງລວມທັງຊີ້ນໄກ່, ຊີ້ນເປັດ ແລະ ໄກ່ງວງ ໄດ້ປະມານປີລະ 1.000 ລ້ານໂດລາສະຫະລັດ ເຊິ່ງການຕັດສິນໃຈຂອງຈີນໃນເທື່ອນີ້ ມີຂຶ້ນໃນຂະນະທີ່ຜູ້ແທນຂອງຈີນ ແລະ ອາເມລິກາ ກຳລັງສະຫລຸບຂັ້ນຕອນສຸດທ້າຍຂອງຂໍ້ຕົກລົງການຄ້າເຟສ 1.
ການປະກາດຍົກເລີກຂວ້ຳບາດນຳເຂົ້າຊີ້ນສັດປີກຈາກອາເມລິກາ ສົ່ງຜົນໃຫ້ລາຄາຫຸ້ນຂອງບໍລິສັດຜູ້ຜະລິດຊີ້ນສັດປີກຢູ່ອາເມລິກາເພີ່ມຂຶ້ນ ລວມທັງບໍລິສັດໄທສັນ ຟູດ ເພີ່ມຂຶ້ນ 2,1%, ບໍລິສັດແຊນເດີສັນ ຟາມ ເພີ່ມຂຶ້ນ 4,1% ແລະ ພິລກຣິມ ໄພຣ ຄອບ ເພີ່ມຂຶ້ນ 1%.
ຈີນ ເລີ່ມຂວ້ຳບາດສັດປີກ ແລະ ໄຂ່ໄກ່ຈາກອາເມລິກາ ໃນເດືອນມັງກອນ 2015 ເນື່ອງຈາກການລະບາດຂອງໄຂ້ຫວັດສັດປີກຢູ່ອາເມລິກາ ເຊິ່ງຖືເປັນການປິດຕະຫລາດທີ່ສ້າງລາຍໄດ້ໃຫ້ແກ່ບໍລິສັດອາເມລິກາປະມານປີລະ 500 ລ້ານໂດລາສະຫະລັດ.
