13 ວິທີຊ່ວຍລ້ຽງລູກໃຫ້ສະຫລາດ (I)
ເພື່ອນຜູ້ອ່ານຮູ້ບໍ່ວ່າ: ຕາມປົກກະຕິ ຖ້າເດັກມີການພັດທະນາຕົນເອງຂະຫຍາຍຕົວໄວກວ່າເກນປົກກະຕິ ຄືຮູ້ໄຫ້ນຳໃຜຜູ້ໜຶ່ງກ່ອນອາຍຸ 2 ເດືອນ, ຮູ້ງວາກໜ້າຟັງສຽງເອີ້ນຂອງໃຜຜູ້ໜຶ່ງກ່ອນອາຍຸ 4 ເດືອນ, ຮູ້ຈັບບາຍກ່ອນອາຍຸ 5 ເດືອນ, ຮູ້ແອບເວົ້າບ໋ອບໆແບ໋ບໆກ່ອນອາຍຸ 8 ເດືອນ ແລະ ອື່ນໆນັ້ນ, ບັນດານັກວິທະຍາສາດຢືນຢັນວ່າເດັກຜູ້ນັ້ນມີຄວາມສະຫລາດ ເພາະມັນສະແດງໃຫ້ເຫັນຄວາມອາດສາມາດຮັບຮູ້ດີ, ສຳຜັດໄດ້ໄວນັ້ນແມ່ນການຂະຫຍາຍຕົວຂອງມັນສະໝອງເດັກໄວກວ່າປົກກະຕິ. ແຕ່ໃນຕົວຈິງແລ້ວ ເດັກນ້ອຍບາງຄົນຈະບັນລຸໄດ້ເຖິງຄວາມສະຫລາດດັ່ງກ່າວຫາກໃນເມື່ອຜູ້ເປັນພໍ່ເປັນແມ່ມີວິທີການສຶກສາລູກດ້ວຍຄວາມຕັ້ງໜ້າພະຍາຍາມແຕ່ຕົ້ນ ແລະ ຜູ້ເປັນພໍ່ເປັນແມ່ຈະເຮັດແນວໃດ ເພື່ອໃຫ້ລູກຂອງຕົນມີຄວາມສະຫລາດຫລັກແຫລມຄືດັ່ງກ່າວ ເຊິ່ງຄຳຕອບມີຄື:
1. ວົ້າອອກມາທຸກຢ່າງສິ່ງໃດທີ່ຜູ້ເປັນແມ່ເຫັນ ແລະ ສາມາດປະພຶດຕໍ່ລູກ:
ໃນເມື່ອເວລາຢູ່ເຮືອນ ຜູ້ເປັນແມ່ສາມາດປ່ຽນຜ້າອ້ອມ, ແຕ່ງນົມໃຫ້ລູກ ແລະ ໃນຂະນະນັ້ນຕົນເອງກໍຕ້ອງມີການປະພຶດ ແລະ ພັນລະນາໃຫ້ລູກສິ່ງທີ່ເຮົາເຮັດ. ເມື່ອອອກຈາກເຮືອນໄປແມ່ກໍອາດຊີ້ໃຫ້ລູກເບິ່ງຕົ້ນໄມ້, ໂຕນົກ ຫລື ນັບເບິ່ງລົດຕ່າງໆທີ່ພວມແລ່ນຢູ່ກາງຖະໜົນ. ເບື້ອງຕົ້ນເຮົາເບິ່ງຄືວ່າຈະບໍ່ມີຄວາມໝາຍຫຍັງ ຍ້ອນວ່າເດັກຈະບໍ່ສົນໃຈ ແລະ ມີປະຕິກິລິຍາຫຍັງຕໍ່ການປະພຶດດັ່ງກ່າວ, ແຕ່ໃນຕົວຈິງແລ້ວ ເດັກກຳລັງຮັບຮູ້ ແລະ ຄ່ອຍໆຮຽນເອົາຜ່ານຄຳເວົ້າ ແລະ ການປະພຶດຕ່າງໆຂອງແມ່. ຄວາມອາດສາມາດຮັບຮູ້ຂອງເດັກຕໍ່ສະພາບແວດລ້ອມອ້ອມຕົວ ແລະ ຄຳເວົ້າຂອງແມ່ນັ້ນ, ສູນກາງປະສາດ ແລະ ມັນສະໝອງຂອງເດັກຈະບັນທຶກໄວ້ທຸກໆຂັ້ນຕອນຂອງມັນ ແລະ ສິ່ງນີ້ຈະຊ່ວຍໃຫ້ເດັກມີການພັດທະນາຕົນເອງໄດ້ຢ່າງຕັ້ງໜ້າ.
2. ອ່ານປຶ້ມເລື່ອງຕ່າງໆໃຫ້ເດັກຟັງແຕ່ເບື້ອງຕົ້ນ:
ມີຫລາຍຄົນກໍອາດຈະຫົວຂວັນເມື່ອເຫັນແມ່ຂອງເດັກໃຜຜູ້ໜຶ່ງອ່ານປຶ້ມໃຫ້ລູກຟັງແຕ່ອາຍຸ 6 ເດືອນ, 7 ເດືອນ. ຖ້າຄິດແນວນັ້ນແມ່ນຜິດພາດທີ່ສຸດ ແລະ ເຖິງວ່າເດັກຍັງບໍ່ທັນຮູ້ ແລະ ເຂົ້າໃຈຫຍັງ, ແຕ່ກໍອາດຈະຊ່ວຍໃຫ້ເດັກຮູ້ຈັບ ແລະ ຄ່ອຍໆຮຽນເປີດປຶ້ມແຕ່ລະໜ້າໄປຕາມລຳດັບໄດ້ ແລະ ຈະຊ່ວຍໃຫ້ເດັກຮຽນຮູ້ບາງຢ່າງຈາກສຽງອ່ານ ແລະ ການສະແດງອອກທ່າທີຕ່າງໆຂອງແມ່ໃນເວລາອ່ານປຶ້ມດັ່ງກ່າວ. ໃນທີ່ສຸດເດັກຈະມີຄວາມຮັກ ແລະ ຈີ່ປຶ້ມເລື່ອງຕ່າງໆເຫລົ່ານັ້ນໄດ້ໃນເວລາຫລາຍເດືອນຕໍ່ມາ ແລະ ເດັກສາມາດເລືອກປຶ້ມທີ່ຕົນມັກອອກມາຈາກຕູ້ປຶ້ມ ເພື່ອບົ່ງບອກໃຫ້ແມ່ອ່ານໃຫ້ຟັງຕໍ່ໄປ.
3. ນຳໃຊ້ຮູບແບບບັດທີ່ມີສີສັນ ແລະ ຮູບພາບຕ່າງໆ:
ວິທະຍາສາດໄດ້ພິສູດໃຫ້ເຫັນເຖິງຄຸນຄ່າຂອງການນຳໃຊ້ບັດຕ່າງໆໃນການສິດສອນເດັກແດງ (ໃຊ້ຮູບພາບເພື່ອອະທິບາຍ ຫລື ພັນລະນາສິ່ງໃດໜຶ່ງ) ເຊິ່ງຜູ້ເປັນແມ່ສາມາດສ້າງຂຶ້ນມາດ້ວຍຕົນເອງ ອາດນຳໃຊ້ເຈ້ຍແຂງມາຕັດເປັນຮູບ 4 ແຈສາກ ແລະ ແຕ້ມຮູບຕົວໜັງສື ຫລື ຕົວເລກໃດໜຶ່ງໃສ່ດ້ານໜຶ່ງ, ສ່ວນດ້ານໜຶ່ງແມ່ນແຕ້ມຮູບພາບ ແລະ ໃຫ້ເດັກຈັບຫລິ້ນບັດນີ້ເປັນປະຈຳໃນແຕ່ລະມື້ ເຊິ່ງມັນຈະຊ່ວຍກະຕຸ້ນມັນສະໝອງຂອງເດັກຂະຫຍາຍຕົວຢ່າງໜ້າເພິ່ງພໍໃຈ.
