ພິທີມອບ-ຮັບຫົວໜ້າກອງບັນຊາການ ປກສ ແຂວງສະຫວັນນະເຂດຊຸດໃໝ່

       ເພື່ອເປັນການປັບປຸງລະບົບກົງຈັກການຈັດຕັ້ງຂອງກອງບັນຊາການ ປກສ ແຂວງສະຫວັນນະເຂດ ໃຫ້ໜັກແໜ້ນ-ເຂັ້ມແຂງທາງດ້ານການເມືອງ-ແນວຄິດ ແລະ ດ້ານການຈັດຕັ້ງ ໃຫ້ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ດັ່ງນັ້ນ, ໃນທ້າຍອາທິດທີຜ່ານມານີ້, ແຂວງສະຫວັນນະເຂດ,ໄດ້ຈັດພິທີມອບ-ຮັບຫົວໜ້າກອງບັນຊາການ ປກສ ແຂວງຂຶ້ນ ທີ່ຫ້ອງການ ປກສ ແຂວງ, ໂດຍເຂົ້າຮ່ວມໃນພິທີ ມີທ່ານ ພັອ ຄຳພົນ ສີຫາປັນຍາ ຫົວໜ້າກອງບັນຊາການ ປກສ ແຂວງສະຫວັນນະເຂດ(ຜູ້ເກົ່າ) ແລະ ທ່ານ ພັອ ສົມໝາຍ ພົມມະຈັນ ຮັກສາການຫົວໜ້າກອງບັນຊາການ ປກສ ແຂວງສະຫວັນນະເຂດ(ຜູ້ໃໝ່), ມີຄະນະພັກ-ຄະນະບັນຊາກອງບັນຊາການ ປກສ ແຂວງ,ຄະນະຫ້ອງ,ຄະນະກອງບັນຊາການປກສ ເມືອງທົ່ວແຂວງ -01 ນະຄອນ,ມີພະນັກງານນັກຮົບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

      ໃນພິທີ ທ່ານ ພັອ ຄຳພົນ ສີຫາປັນຍາ ຫົວໜ້າກອງບັນຊາການ ຜູ້ເກົ່າ ກໍ່ໄດ້ຂຶ້ນລາຍງານ ແລະ ກ່າວມອບວຽກງານໃນການປະຕິບັດໜ້າທີ່ໃນໄລຍະຜ່ານມາ,ຈຸດພິເສດຂອງກອງບັນຊາການ ປກສ ແຂວງ,ຜົນງານການເຄື່ອນໄຫວໃນການຊີ້ນຳໆພາໃນບັນດາວຽກງານວິຊາສະເພາະຕ່າງໆ ເຊິ່ງປັດຈຸບັນກຳລັງ ປກສ ແຂວງຈະຕ້ອງໄດ້ສຸມໃສ່ແກ້ໄຂມີຄື: ບັນຫາຢາເສບຕິດ,ຄ້າຂາຍເຖື່ອນ,ອຸບັດຕິເຫດຕາມທ້ອງຖະໜົນຫຼວງ ແລະ ດ້ານວຽກງານນຳພາການເມືອງ-ແນວຄິດອື່ນໆທີ່ຈະຕ້ອງສຶບຕໍ່ ແກ້ໄຂໃຫ້ມີປະສິດທິຜົນ./.