ລັດຖະບານ ຈະເລັ່ງແກ້ໄຂສິ່ງກົດໜ່ວງການລົງທຶນ

ໃນວັນທີ 12 ພະຈິກນີ້, ກະຊວງອຸດສາຫະກຳ ແລະ ການຄ້າ ຮ່ວມກັບສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ໄດ້ຈັດກອງປະຊຸມທຸລະກິດລາວ ຄັ້ງທີ 12 ຂຶ້ນທີ່ຫໍປະຊຸມແຫ່ງຊາດ, ໂດຍເປັນປະທານຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ມີລັດຖະມົນຕີກະຊວງອຸດສາຫະກຳ ແລະ ການຄ້າ, ບັນດາຜູ້ປະກອບການ, ສະມາຄົມທຸກກິດ, ຜູ້ຕາງໜ້າອົງການຈັດຕັ້ງສາກົນຕ່າງໆ ປະຈໍາລາວ ເຂົ້າຮ່ວມນຳດ້ວຍ.

    ໃນກອງປະຊຸມ, ທ່ານ ສົມດີ ດວງດີ ໄດ້ມີຄຳເຫັນວ່າ: ການປັບປຸງສະພາບແວດລ້ອມໃນການດຳເນີນທຸກລະກິດໃຫ້ດີຂຶ້ນເປັນວຽກງານໜຶ່ງ ທີ່ຈະເຮັດໃຫ້ການ ເພີ່ມຂຶ້ນ,ພ້ອມທັງຈະເຮັດໃຫ້ການຜະລິດສິນຄ້າເພີ່ມຂຶ້ນ, ສ້າງໃຫ້ຖານລາຍຮັບຂອງຊາດໝັ້ນຄົງທາງດ້ານການເງິນ ພ້ອມທັງຈະຫຼຸດຜ່ອນເສດຖະກິດນອກລະບົບເຮັດໃຫ້ເສດຖະກິດມະຫາພາກດີຂຶ້ນເທື່ອລະ ໂດຍສະເພາະແມ່ນ ຂະແໜງອຸດສາຫະກຳ,ທ່ອງທ່ຽວ ແລະ ການປຸງແຕ່ງຜະລິດຕະພັນກະສິກໍາ.

ທ່ານ ອຸເດດ ສຸວັນນະວົງ ປະທານ ສຄອຊ ໃຫ້ຮູ້ວ່າ: ນັບແຕ່ກອງປະຊຸມທຸລະກິດລາວ ຄັ້ງທີ 11 ຜ່ານມາ, ສຄອຊ ໄດ້ຮ່ວມກັບກະຊວງອຸດສາຫະກໍາ ແລະ ການຄ້າ ໄດ້ເອົາໃຈໃສ່ປັບປຸງ ແລະ ແກ້ໄຂບັນຫາຕ່າງໆຂອງພາກທຸກລະກິດນຳສະເໜີໄປແຕ່ລະບາດກ້າວ ຄື: 100 ກວ່າບັນຫາ ແລະ ໄດ້ຄັດຈ້ອນບັນຫາທີ່ມີຄວາມສຳຄັນ  ແລະ ມີຜົນກະທົບຫຼາຍຕໍ່ ພາກທຸລະກິດ ແລະ ຂະແໜງການພາກລັດທີ່ກ່ຽວຂ້ອງ ໂດຍໄດ້ກຳນົດບັນຫາບູລິມະສິດສະເພາະໄດ້ທັງໝົດ 23 ບັນຫາ ເຊັ່ນ: ຂົງເຂດຊ່ວຍສາອາກອນ, ການອຳນວຍຄວາມສະດວກໃຫ້ແກ່ການນຳເຂົ້າ ແລະ ສົ່ງອອກ, ການກໍ່ຕັ້ງທຸລະກິດ, ການສົ່ງເສີມການທ່ອງທ່ຽວທີ່ຍືນຍົງ ແລະ ຂົງເຂດອື່ນໆ ໂດຍໄດ້ແກ້ໄຂ 7 ບັນຫາ ເຊິ່ງກອງປະຊຸມກໍໄດ້ຕົກລົງເຫັນດີຕໍ່ກັບທິດທາງໃນການແກ້ໄຂ 16 ບັນຫາບູລິມະສິດທີ່ຍັງຄົງຄ້າງດັ່ງກ່າວ.  ພ້ອມນີ້ ຍັງມີຄວາມສ່ຽງສູງ ເປັນຕົ້ນ ໜີ້ສາທາລະນະ, ການຂຸດຄົ້ນຊັບພະຍາກອນທໍາມະຊາດທີ່ີມີອັດຕາສູນເສຍໃນະລະດັບສູງ ແລະ ອຸດສາຫະກຳທີ່ເປັນເຫດໃຫ້ເກີດບັນຫາມົນລະພິດເພີ່ມຂຶ້ນ. ນັບແຕ່ປີ 2013 ເປັນຕົ້ນມາ, ອັດຕາການຂະຫຍາຍຕົວຂອງເສດຖະກິດລາວໄດ້ເລີ່ມຫຼຸດລົງເລື້ອຍໆເຖີງ 6,5% ໃນປີ 2019. ຕາມການຄາດຄະເນຂອງທະນາຄານໂລກ.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ຂະແໜງການກ່ຽວຂ້ອງໃນໄລຍະຜ່ານມາ,ພ້ອມທັ້ງໄດ້ເນັ້ນໃຫ້ເພີ່ມມາດຕະການປັບປຸງສະພາບແວດລ້ອມການດຳເນີນທຸລະກິດໃຫ້ສອດຄ່ອງ, ການລົງທຶນຂອງລັດໃສ່ໂຄງລ່າງພື້ນຖານ ເພື່ອສ້າງໃຫ້ມີສິນຄ້າສົ່ງອອກຫຼາຍຂື້ນ, ເພີ່ມຜະລິດຕະພາບຂອງພາກທຸລະກິດ ແລະ ຫຼຸດຜ່ອນຕົ້ນທຶນຄ່າໃຊ້ຈ່າຍ ໃນການດຳເນີນທຸລະກິດດ້ວຍການປັບປຸງກົນໄກການຄຸ້ມຄອງຂອງພາກລັດ ແລະ ປັບປຸງຂັ້ນຕອນການອະນຸມັດຕ່າງໆໃຫ້ສະດວກ, ວ່ອງໄວ ແລະ ໂປ່ງໃສ, ເພີ່ມທະວີຄວາມເອົາໃຈໃສ່ຕໍ່ວຽກຊ່ວຍສາອາກອນ ໃນການບໍລິການປະຕູດຽວ,  ເອື້ອອໍານວຍຄວາມສະດວກໃຫ້ການຄ້າ ແລະ ການບໍລິການຂົງສົ່ງ ລວມທັງການຊຸກຍູ້ສົ່ງເສີມການທ່ອງທ່ຽວໃນພາກທຸລະກິດໃຫ້ຫຼາຍຂຶ້ນ ແລະ ໃຫ້ມີການຕິດຕາມກວດກາຄຸ້ມຄອງຢ່າງເຂັ້ມງວດ ຕໍ່ຄວາມໂປງໃສ່ ແລະ ຮັບໃຊ້ປະຊາຊົນຢ່າງແທ້ຈິງ, ໃຫ້ສາມາດແຂ່ງຂັນ ກັບຕ່າງປະເທດ ແລະ ສາກົນໄດ້ ເພື່ອກ້າວໄປສູ່ການເຮັດໃຫ້ປະເທດຊາດຫຼຸດພົ້ນອອກຈາກສະຖະພາບດ້ອຍພັດທະນາເທື່ອລະກ້າວ.