ລັດຈະເລັ່ງແກ້ໄຂຂໍ້ຄົງຄ້າງເພື່ອຮັບປະກັນ ໃຫ້ການພັດທະນາປະເທດບັນລຸຕາມແຜນ
ໃນໂອກາດລາຍງານຕໍ່ກອງປະຊຸມສະພາແຫ່ງຊາດທີ່ພວມດໍາເນີນໃນປັດຈຸບັນນີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຍົກໃຫ້ເຫັນວ່າ: ຕະຫລອດໄລຍະຜ່ານມາ, ລັດຖະບານໄດ້ສຸມຄວາມພະຍາຍາມເພື່ອບໍລິຫານປະເທດໃຫ້ກ້າວເດີນໄປຕາມແຜນພັດທະນາກໍານົດໄວ້, ແຕ່ກໍປາສະຈາກບໍ່ໄດ້ໃນຂໍ້ຄົງຄ້າງຫລາຍດ້ານທີ່ຈະຕ້ອງຮີບຮ້ອນແກ້ໄຂເພື່ອສ້າງເງື່ອນໄຂໃຫ້ປະເທດເຮົາສືບຕໍ່ພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 ໄປຕາມແຜນການທີ່ສະພາແຫ່ງຊາດຮັບຮອງ.
ທ່ານນາຍົກ ໃຫ້ຮູ້ວ່າ: ຂໍ້ຄົງຄ້າງຂອງພວກເຮົາຍັງແມ່ນການຂະຫຍາຍຕົວດ້ານເສດຖະກິດຍັງບໍ່ສູງ, ຂະແໜງການຜະລິດພື້ນຖານສ້າງລາຍຮັບທີ່ຍືນຍົງຍັງບໍ່ຫລາຍ, ສະມັດຕະພາບການຜະລິດບໍ່ສູງ, ອຸດສາຫະກໍາປຸງແຕ່ງບໍ່ທັນຂະຫຍາຍຕົວດີ, ທັງບໍ່ສາມາດແຂ່ງຂັນກັບສີນຄ້າປະເທດໃກ້ຄຽງໄດ້, ອັນເປັນສາເຫດຫລັກພາໃຫ້ເງິນຕາໄຫລອອກຕ່າງປະເທດທີ່ບໍ່ສາມາດຄຸ້ມຄອງໄດ້, ການປັບປຸງວິສາຫະກິດມີຄວາມຫລ້າຊ້າ ຍ້ອນມີບັນຫາສະສົມຊໍາເຮື້ອມາດົນ ແລະ ບາງບໍລິສັດພວມຈົ່ມເລິກລົງສູ່ວິກິດການແລ້ວ, ການແກ້ໄຂສະພາບແວດລ້ອມ, ຂັ້ນຂອດ ແລະ ຄວາມໂປ່ງໃສໃນການລົງທຶນ ແລະ ດໍາເນີນທຸລະກິດຍັງບໍ່ທັນບຸກທະລຸແທ້, ບັນຍາກາດການທ່ອງທ່ຽວບໍ່ຄຶກຄັກ, ການເກັບລາຍຮັບບໍ່ຄົບຖ້ວນ, ການຄຸ້ມຄອງລາຄາສີນຄ້າຍັງເຮັດບໍ່ທັນໄດ້ດີ, ການຜະລິດພາຍໃນບໍ່ພົ້ນເດັ່ນ, ການຄຸ້ມຄອງການລົງທຶນຂອງລັດບໍ່ເຂັ້ມງວດ ແລະ ບັນຫາອື່ນໆ.
ສະນັ້ນ, ໃນຕໍ່ໜ້ານີ້, ລັດຖະບານຈະສູ້ຊົນແກ້ໄຂ ແລະ ນໍາໃຊ້ມາດຕະການ ຄື: ສູ້ຊົນເກັບລາຍຮັບງົບປະມານໃຫ້ໄດ້ຫລາຍຂຶ້ນ, ເລັ່ງປະຕິບັດໂຄງການລົງທຶນຂອງລັດ, ລະດົມແຫລ່ງທຶນດຸ່ນດ່ຽງງົບປະມານ, ຄຸ້ມຄອງອັດຕາແລກປ່ຽນ, ຄົ້ນຄວ້າວິທີການເພີ່ມຄັງສໍາຮອງ, ຄຸຸ້ມຄອງລາຄາ ແລະ ການນໍາເຂົ້າສີນຄ້າທີ່ຜະລິດໄດ້ພາຍໃນ, ສົ່ງເສີມການຜະລິດ ແລະ ຊົມໃຊ້ພາຍໃນ, ຊຸກຍູ້ການສະໜອງສີນເຊື່ອໃຫ້ພາກທະລະກິດ, ສົ່ງເສີມ SME ແລະ ນໍາໃຊ້ກອງທຶນ SME ໃຫ້ມີປະສິດທິຜົນ, ຊຸກຍູ້ການປະຕິບັດໂຄງການພັດທະນາ ແລະ ໂຄງການລົງທຶນຂະໜາດໃຫຍ່ຂອງພາກທຸລະກິດໃຫ້ປະຕິບັດຕາມແຜນການ ແລະ ປັບປຸງກົນໄກຜ່ານປະຕູດຽວ, ສົ່ງເສີມການທ່ອງທ່ຽວໃຫ້ແຂງແຮງ, ການພັດທະນາສີມືແຮງງານ, ການພັດທະນາຊົນນະບົດ, ຟື້ນຟູໄພພິບັດທໍາມະຊາດ ແລະ ການພັດທະນາໃນຂົງເຂດອື່ນໆ.
ທ່ານນາຍົກ ກ່າວວ່າ: ເພື່ອຢາກເຮັດໄດ້ແນວນັ້ນ, ກ່ອນອື່ນລັດຖະບານຈະ ເລັ່ງປັບປຸງຫລາຍດ້ານຄື: ປັບປຸງການມອບໝາຍໜ້າທີ່, ການແບ່ງວຽກງານ, ການມອບຄວາມຮັບພິຊອບຂອງຄະນະພັກ-ຄະນະນໍາ ແລະ ພະນັກງານແຕ່ລະຂັ້ນທົ່ວກົງຈັກການຈັດຕັ້ງນັບທັງສູນກາງ ແລະ ທ້ອງຖິ່ນ, ປັບປຸງແບບແຜນວິທີເຮັດວຽກທີ່ຍັງອືດອາດ, ແກ້ແນວຄິດຂອງພະນັກງານທີ່ຂາດຄວາມເປັນເຈົ້າ, ຂາດຄວາມກ້າຫານ, ຂາດຫົວຄິດປະດິດສ້າງ ແລະ ຂາດການຕິດຕາມກວດກາ, ປັບປຸງກົນໄກການປະສານງານລະຫວ່າງຂະແໜງການຂັ້ນສູນກາງ ແລະ ທ້ອງຖິ່ນ, ປັບປຸງການຈັດຕັ້ງທີ່ຍັງຊໍ້າຊ້ອນ, ບໍ່ສອດຄ່ອງ ແລະ ບໍ່ແທດເໝາະກັບສະພາບຕົວຈິງ, ພ້ອມທັງປັບປຸງບຸກຄະລາກອນໂດຍການຂັດຈ້ອນເອົາພະນັກງານທີ່ມີຄຸນສົມບັດ, ມີຄວາມຮູ້ຄວາມສາມາດທີ່ເໝາະສົມກັບຄວາມຮັບພິຊອບຂອງວຽກງານ.
