ຮອງລັດຖະມົນຕີກະຊວງກະສິກໍາ ແລະ ປ່າໄມ້ ແນະນໍາໃຫ້ຊາວກະສິກອນ ເອົາໃຈໃສ່ຜະລິດສິນຄ້າຫຼຸດຜ່ອນການນໍາເຂົ້າ

ເຊົ້າວັນທີ 7 ພະຈິກ ນີ້ ທ່ານ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ລົງພົບປະໂອ້ລົມຊາວກະສິກອນຢູ່ຕະຫຼາດລາວ-ອົດຊີ ທີ່ເມືອງ ສີໂຄດຕະບອງ ນະຄອນຫຼວງວຽງຈັນ, ເພື່ອປຶກສາຫາລື, ສົນທະນາ ລະຫວ່າງ ຜູ້ປະກອບການ ແລະ ຜູ້ຜະລິດ ໄດ້ຮ່ວມກັນກະຕຸກຊຸກຍູ້ການຜະລິດພາຍໃນໃຫ້ແຂງແຮງ ເພາະຜ່ານມາຍັງເຫັນວ່າ ການຜະລິດພວກເຮົາຍັງກະແຈກກະຈາຍ, ເຮັດພໍໃຜພໍລາວ, ບໍ່ເປັນລະບົບ ສົ່ງຜົນໃຫ້ການສະໜອງສິນຄ້າບໍ່ພຽງພໍກັບຄວາມຕ້ອງການຂອງຕະຫຼາດ, ເກີດມີແມ່ຄ້າ-ພໍ່ຄ້າຄົນກາງສວຍໂອກາດລັກລອບນໍາເຂົ້າສິນຄ້າຈາກພາຍນອກເຂົ້າມາຕີຕະຫຼາດພາຍໃນ, ຂາດການປະສານສົມທົບກັນລະຫວ່າງຜູ້ຜະລິດ ແລະ ຕະຫຼາດ. ພ້ອມນັ້ນ ການເຂົ້າເຖິງແຫຼ່ງທຶນຂອງຜູ້ຜະລິດຍັງມີໜ້ອຍ,

ດັ່ງນັ້ນ ທ່ານ ຮອງລັດຖະມົນຕີເນັ້ນວ່າ: ໃນຕໍ່ໜ້ານີ້, ຜູ້ຜະລິດຈະຕ້ອງໄດ້ຈັດຕັ້ງເປັນກຸ່ມ ເພື່ອເຮັດໃຫ້ຊາວກະສິກອນມີຕະຫຼາດຮອງຮັບແນ່ນອນ, ບໍ່ຖືກເອົາລັດເອົາປຽບດ້ານລາຄາ, ເຂົ້າໃຈມາດຕະຖານຂອງສິນຄ້າ ທັງເຮັດໃຫ້ພໍໍ່ຄ້າ-ແມ່ຄ້າຄົນກາງສາມາດເຂົ້າເຖິງສິນຄ້າທີ່ໄດ້ຄຸນນະພາບ ແລະ ພ້ອມນັ້ນກໍຈະຕ້ອງໄດ້ສົ່ງເສີມການປູກພືດໃຫ້ເປັນສິນຄ້າທີ່ສະອາດ, ໄດ້ມາດຕະຖານໃຫ້ເປັນລະບົບທີ່ເຂັ້ມແຂງ, ຍືນຍົງ ແລະ ເປັນຂະບວນ ເພື່ອຫຼຸດຜ່ອນການນໍາເຂົ້າສິນຄ້າຈາກຕ່າງປະເທດ ທີ່ບໍ່ປອດໄພເພື່ອຮັບປະກັນໃຫ້ຜູ້ຜະລິດ ແລະ ຜູ້ປະກອບການມີລາຍຮັບທີ່ໝັ້ນຄົງ.

ທ່ານນາງ ມອກ ຜູ້ຜະລິດ ທັງເປັນຜູ້ຮັບຊື້້-ຂາຍ ພືດຜັກ ຈາກບ້ານ ຫ້ອມໃຫ້ຮູ້ວ່າ: ປະຊາຊົນສ່ວນຫຼາຍຢຶດຖືອາຊີບປູກພືດຜັກເຊັ່ນ: ຫອມປ້ອມ, ຫອມບົ່ວ, ຫອມລາບ ແລະ ອື່ນໆ ແຕ່ປັດຈຸບັນ ການປູກຍັງພົບຄວາມລໍາບາກ ເພາະບໍ່ສາມາດຜະລິດໄດ້ຕາມລະດູການຄື ໄລຍະເດືອນ 4- 9 ຈະບໍ່ສາມາດຜະລິດໄດ້ເຮັດໃຫ້ຂາດແຄນ ຈໍາເປັນຕ້ອງໄດ້ຊື້ຕໍ່ຈາກຕະຫຼາດພາຍນອກມາຂາຍໃຫ້ລູກຄ້າ. ບາງມື້ຄວາມຕ້ອງການຂອງລູກຄ້າໜ້ອຍ ເອົາມາຫຼາຍຂາຍບໍ່ໝົດ ຍ້ອນລາຄາເໜັງຕີງໄປເລື້ອຍໆ ແລະ ເຮັດໃຫ້ຂາດທຶນ.

ທ່ານ ຂາວ ພໍ່ຄ້າຮັບຊື້-ຂາຍຜັກອີກທ່ານໜຶ່ງໃນຕະຫຼາດລາວ-ອົດຊີໃຫ້ຮູ້ວ່າ: ໃນຂອດການຜະລິດ ຍັງບໍ່ເປັນລະບົບ, ບໍ່ສາມາດປູກນອກລະດູໄດ້ ຊຶ່ງແຕກຕ່າງຈາກປະເທດເພື່ອນບ້ານທີ່ຜະລິດໄດ້ທຸກລະດູການ, ຈຶ່ງກໍ່ໃຫ້ເກີດການນໍາເຂົ້າຈາກປະເທດເພື່ອນບ້ານ, ຊຶ່ງຜ່ານມາແມ່ນນໍາເຂົ້້າຜ່ານດ່ານຂົວມິດຕະພາບ ແລະ ໜອງດາ, ແຕ່ປັດຈຸບັນການນໍາເຂົ້າກໍລໍາບາກຂຶ້ນ ເພາະວ່າຜູ້ບໍລິໂພກ ກັງວົນເລື່ອງຄວາມສະອາດ ແລະ ປອດໄພ ເມື່ອນໍາເຂົ້າມາແລ້ວບໍ່ໄດ້ຂາຍ. ສະນັ້ນ ຈຶ່ງຈໍາເປັນຕ້ອງໄດ້ປູກ ແລະ ຮັບຊື້ຢູ່ບ້ານເຮົາ ແຕ່ກໍບໍ່ສະໜອງພືດຜັກໃຫ້ພຽງພໍຕາມຄວາມຕ້ອງການຂອງສັງຄົມ, ພ້ອມນັ້ນຜູ້ມີທຶນໜ້ອຍກໍປູກໜ້ອຍ ແຕ່ຜູ້ທີ່ມີທຶນຫຼາຍຊໍ້າພັດຂາດດ້ານເຕັກນິກ. ດັ່ງນັ້ນ, ພວກເຮົາຈຶ່ງຕ້ອງການນັກວິຊາການລົງໃຫ້ຄໍາແນະນໍາວິທີການປູກ ເພື່ອໃຫ້ໄດ້ຮັບຜົນດີ ແລະ ມີຄຸນນະພາບ.

ທ່ານນາງ ນ້ອຍ ແມ່ຄ້າຂາຍສົ່ງຜັກກະລໍ່າປີເວົ້າວ່າ: ຜັກກະລໍ່າປີສ່ວນຫຼາຍແມ່ນນໍາມາຈາກຕ່າງແຂວງ ໂດຍສະເພາະປາກຊ່ອງ-ມາຈໍາໜ່າຍຢູ່ນະຄອນຫຼວງວຽງຈັນ, ຕົນເອງກໍພົບບັນຫາເລື່ອງລາຄາຕົກຕໍ່າຄື ມື້ມີຫຼາຍລາຄາ ໝື່ນລະ 25.000 ກີບ, ມື້ໜ້ອຍກໍຂ້ອນຂ້າງໄດ້ລາຄາສູງ 40.000 ກີບຕໍ່ໝື່ນ, ໂດຍທີ່ລາຄາແມ່ນຂຶ້ນກັບການເໜັງຕີງຂອງຕະຫຼາດ. ດັ່ງນັ້ນ, ຈຶ່ງເຮັດໃຫ້ການສົ່ງເສີມການຜະລິດສິນຄ້າພາຍໃນເຮົາມີຄວາມຫຍຸ້ງຍາກ.