ສະພາຮັບຮອງເອົາລັດຖະມົນຕີກະຊວງແຜນການ ແລະ ການລົງທຶນ ແລະ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວຕາມການສະເໜີຂອງນາຍົກ
ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ທີ່ໄຂຂຶ້ນໃນວັນທີ 7 ພະຈິກນີ້, ຊຶ່ງເປັນມື້ທໍາອິດຂອງກອງປະຊຸມດັ່ງກ່າວ ແລະ ກໍໄດ້ດໍາເນີນວາລະລົງຄະແນນສຽງຮັບຮອງເອົາທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ຄວບຕໍາແໜ່ງລັດຖະມົນຕີກະຊວງແຜນການ ແລະ ການລົງທຶນ ແລະ ຮັບຮອງເອົາທ່ານ ກິແກ້ວ ໄຂຄໍາພິທູນ ເປັນລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຕາມການສະເໜີຂອງນາຍົກລັດຖະມົນຕີແຫ່ງ ສປປ ລາວ ດ້ວຍສຽງສ່ວນຫລາຍ.
ພາຍຫລັງສໍາເລັດການລົງຄະແນນຮັບຮອງຄືດັ່ງກ່າວແລ້ວ, ກໍໄດ້ມີສະມາຊິກສະພາແຫ່ງຊາດຈໍານວນໜຶ່ງຂຶ້ນປະກອບຄໍາເຫັນຕໍ່ທີ່ປະຊຸມ, ຊຶ່ງໄດ້ສະແດງຄວາມຍິນດີ ແລະ ຊົມເຊີຍຕໍ່ການຊັບຊ້ອນບຸກຄະລາກອນຂອງລັດຖະບານໃນ ເທື່ອນີ້ ແມ່ນເໝາະສົມກັບການເຂົ້າມາຊີ້ນໍາ-ນໍາພາວຽກງານດັ່ງກ່າວ, ເນື່ອງຈາກວ່າທັງສອງທ່ານລ້ວນແຕ່ເປັນຜູ້ມີຄວາມຮູ້, ຄວາມສາມາດ, ມີແນວຄິດການເມືອງໜັກແໜ້ນ, ມີປະສົບການ ແລະ ຜົນສໍາເລັດຫລວງຫລາຍໃນການປະຕິບັດໜ້າທີ່ວຽກງານຂອງພັກ-ລັດຖະບານ ໄດ້ມອບໝາຍໃຫ້ໃນໄລຍະຜ່ານມາ ແລະ ເຊື່ອໝັ້ນວ່າທັງສອງທ່ານຈະສືບຕໍ່ຊີ້ນໍາ-ນໍາພາວຽກງານໃນຂະແໜງການຮັບພິຊອບຂອງຕົນມີຜົນສໍາເລັດໃໝ່ໃຫຍ່ຫລວງກວ່າເກົ່າ.
