ງານບຸນນະມັດສະການພະທາດຫຼວງວຽງຈັນ ປີນີ້ ມີຮ້ານວາງສະແດງສິນຄ້າຕົວແບບກວ່າ 200 ຫ້ອງເຂົ້າຮ່ວມ
ງານບຸນນະມັດສະການພະທາດຫລວງວຽງຈັນ ປະຈຳປີ 2019 ໄດ້ເປີດຂຶ້ນຢ່າງເປັນທາງການແຕ່ວັນທີ 5 ຫາ 11 ພະຈິກນີ້, ໂດຍການເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ຊຶ່ງມີຮ້ານວາງສະແດງສິນຄ້າໂອດ໋ອບ, ຕົວແບບ, ສິນຄ້າຜະລິດຕະພັນພາຍໃນດີເດັ່ນ ອື່ນໆກ່ວາ 200 ຫ້ອງເຂົ້າຮ່ວມວາງສະແດງ.
ທ່ານ ເຈົ້າຄອງນະຄອນຫລວງວຽງຈັນ ໃຫ້ຮູ້ວ່າ: ການຈັດງານບຸນນະມັດສະການພະທາດຫຼວງວຽງຈັນ ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງບຸນນະມັດສະການພະທາດຫຼວງ ຂອງຊາດລາວ ກໍຄື ຊາວນະຄອນຫລວງ ທີ່ເຄີຍສືບທອດກັນມາແຕ່ບູຮານນະການໃຫ້ດຳລົງຄົງຢູ່ນຳຊາວລາວຕະຫຼອດໄປ ພ້ອມທັງເປັນການສ້າງໂອກາດ ຊຸກຍູ້ສົ່ງເສີມການທ່ອງທ່ຽວ-ການຄ້າ “ໜຶ່ງເມືອງ ໜຶ່ງຜະລິດຕະພັນ” ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດ໋ອບ ທີ່ກາຍເປັນກາໝາຍແຫ່ງຊາດ ແລະ ສິນຄ້າຂອງບັນດາວິສາຫະກິດຂະໜາດນ້ອຍ-ກາງ ໄດ້ມາວາງສະແດງ ຈຳໜ່າຍທັງພາຍໃນ ແລະ ຕ່າງປະເທດ ນອກນັ້ນ ເພື່ອເຮັດໃຫ້ງານບຸນນະມັດສະການພະທາດຫຼວງວຽງຈັນ ແລະ ງານຕະຫຼາດນັດວາງສະແດງຂາຍສິນຄ້າ ມີບັນຍາກາດເບີກບານມ່ວນຊື່ນ ຮັກສາໄດ້ຄວາມສາມັກຄີເປັນປຶກແຜ່ນ ຍົກສູງຄຸນຄ່າມໍລະດົກມິ່ງຂອງຊາດລາວ ຮັບປະກັນໄດ້ຄວາມສະຫງົບ ຄວາມເປັນລະບຽບຮຽບຮ້ອຍ ທາງດ້ານການຄ້າຂາຍ, ການຄຸ້ມຄອງຢ່າງຖືກຕ້ອງ ແລະ ຫຼຸດຜ່ອນປາກົດການຫຍໍ້ທໍ້ທີ່ເກີດຂຶ້ນພາຍໃນງານຈາກປີຜ່ານມາ ແລະ ຮັກສາໄດ້ຄວາມສະອາດຈົບງາມ.
ງານບຸນນະມັດສະການພະທາດຫຼວງປີນີ້ ຈັດຂຶ້ນແຕ່ວັນທີ 5-11 ພະຈິກ, ຊຶ່ງ 2019 ຄື: ພິທີເປີດງານວາງສະແດງສິນຄ້າ ແລະ ສະຫຼຸບການປະຕິສັງຂອນພະທາດຫຼວງວຽງຈັນ ຄັ້ງທີ IV, ວັນທີ 9 ພະຈິກ ພິທີສູດປະລິຕະມຸງຄຸນທີ່ພະທາດຫຼວງ, ວັນທີ 10 ພະຈິກ ພິທີແຫ່ຜາສາດເຜິ້ງ, ວັນທີ 11 ພະຈິກ ພິທີໃສ່ບາດຖວາຍສັງຂະທານ, ເວລາ 13:00 ໂມງ ພິທີແຫ່ລູກຄີ ແລະ ການແຂ່ງຂັນກີລາພື້ນບ້ານຕີຄີ, ພິທີວຽນທຽນ ແລະ ຈູດທູບທຽນ ບັ້ງໄຟສັກກະລະບູຊາອົງພະທາດ ສ່ວນງານວາງສະແດງສິນຄ້າ ຢູ່ສູນການຄ້າລາວ-ໄອເຕັກ ຈັດຂຶ້ນຮອດວັນທີ 17 ພະຈິກ ຈຶ່ງຈະອັດລົງ.
ສຳລັບການວາງສະແດງສິນຄ້າທີ່ເດີນພະທາດຫຼວງ ສະໜາມຫຼວງ ປະກອບມີ: ສິນຄ້າໂອດ໋ອບ ສິນຄ້າຄອບຄົວຕົວແບບ ສິນຄ້າຜະລິດຕະພັນພາຍໃນ ແລະ ວາງສະແດງສິນຄ້າ ປະເພດທ່ອງທ່ຽວ 215 ຫ້ອງ, ສິນຄ້າປະເພດບໍລິສັດ ຂາເຂົ້າ-ຂາອອກ, ເສື້ອຜ້າ, ສິນຄ້າທົ່ວໄປ ແລະ ເຄື່ອງຫຼິ້ນ 669 ຫ້ອງ, ປະເພດອາຫານ, ເຄື່ອງດື່ມ, ເຂົ້າຫຼາມ, ປີ້ງໄກ່, ຢູ່ຂອບເຂດຮອບນອກ 134 ຫ້ອງ ລວມທັງໝົດປະມານ 1.018 ຫ້ອງ ສ່ວນຢູ່ສູນການຄ້າ ລາວ-ໄອເຕັກ ມີບູດໄວ້ຮອງຮັບ 488 ບູດ.
ສ່ວນວຽກງານສິລະປະວັນນະຄະດີ-ກີລາ ປະກອບມີ: ການສະແດງການຟ້ອນ, ຂັບລຳ ຈາກກອງສິລະປະກອນສູນກາງ ສິລະປະກອນກອງທັບ ສິລະປະຈາກເມືອງ ສູນວັດທະນະທຳເດັກ ແລະ ສະໂມສອນດ່ານຊ້າງ ແລະ ກີລາຕີມວຍ ຮ່ວມສະແດງໃນແຕ່ລະຄືນເພື່ອສ້າງບັນຍາກາດເຮັດໃຫ້ງານມີຄວາມເບີກບານມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມຂອງຊາດລາວເຮົາໃຫ້ຍືນຍົງຄຽງຄູ່ກັບຊາດລາວຕະຫຼອດໄປ.
