ບັງກະລາເທດເລັ່ງອົບພະຍົບຄົນນັບລ້ານໜີພາຍຸໂມຣາ
ທາງການບັງກະລາເທດເລັ່ງອົບພະຍົບປະຊາຊົນຢູ່ເມືອງແຄມຝັ່ງປະມານ 1 ລ້ານຄົນໄປພື້ນທີ່ປອດໄພ, ພາຍຫລັງພາຍຸໂມຣາພັດຂຶ້ນຝັ່ງທາງຕາເວັນອອກສຽງໃຕ້ຂອງປະເທດໃນຕອນເຊົ້າວັນທີ 30 ພຶດສະພານີ້ ໂດຍມີຄວາມໄວລົມສູງສຸດ 117 ກິໂລແມັດຕໍ່ຊົ່ວໂມງ ເຮັດໃຫ້ເກີດລົມພັດແຮງ ແລະ ຝົນຕົກໜັກເປັນບໍລິເວນກວ້າງ ລວມທັງສົ່ງຜົນກະທົບຕໍ່ສະພາບອາກາດຂອງໄທ, ມຽນມາ ແລະ ທາງຕອນເໜືອຂອງອິນເດຍບາງສ່ວນ.
ມີການປະກາດເຕືອນໄພຢູ່ເມືອງແຄມຝຮັ່ງຫລາຍແຫ່ງ ລວມທັງເມືອງຈິດຕະກອງ ແລະ ຄອກບາຊາ ໂດຍເປັນການປະກາດເຕືອນໄພລະດັບສູງສຸດລະດັບ 10 ເຊິ່ງໝາຍເຖິງໄພທີ່ມີອັນຕະລາຍຮ້າຍແຮງ, ສ່ວນເມືອງແຄມຝ່ັງທີ່ຢູ່ຫ່າງອອກໄປທາງຕາເວັນຕົກມີການປະກາດເຕືອນໄພລະດັບ 8.
ພາຍຸໂມຣາ ເຊິ່ງເຄື່ອນທີ່ຢູ່ອ່າວເບງກອລທະວີຄວາມຮຸນແຮງຂຶ້ນ, ພາຍຫລັງພັດຖະຫລົ່ມສີລັງກາເມື່ອ 2 ວັນກ່ອນ ເຮັດໃຫ້ເກີດນ້ຳຖ້ວມໜັກເປັນບໍລິເວນກວ້າງ ແລະ ດິນເຈື່ອນ ຈົນມີຜູ້ເສຍຊີວິດ 200 ກວ່າຄົນ ແລະ ສູນຫາຍອີກນັບຮ້ອຍຄົນ.
ຢູ່ເມືອງຈິດຕະກອງຂອງບັງກະລາເທດ ປະຊາຊົນຫລາຍແສນຄົນຕ່າງພາກັນອົບພະຍົບໄປສູນອາໄສຊົ່ວຄາວ 500 ແຫ່ງ ເຊິ່ງສ່ວນຫລາຍເປັນໂຮງຮຽນ ແລະ ບ່ອນເຮັດວຽກຂອງລັດຖະບານ ແລະ ມີການປະກາດໃຫ້ຜູ້ຢູ່ອາໄສໃນພື້ນທີ່ຕີນພູອົບພະຍົບອອກມາດ່ວນ ເນື່ອງຈາກຢ້ານວ່າຝົນທີ່ຕົກໜັກຈະເຮັດໃຫ້ເກີດດິນເຈື່ອນ.
ຄາດວ່າພື້ນທີ່ຕໍ່າຢູ່ເມືອງຈິດຕະກອງ ແລະ ຄອກບາຊາຈະຖືກນ້ຳຖ້ວມ ພາຍຫລັງພາຍຸພັດເຂົ້າ ເນື່ອງຈາກມີຄວາມສ່ຽງຈະເກີດຄື້ນພາຍຸພັດເຂົ້າຝັ່ງ ຄວາມສູງ 1,2-1,5 ແມັດໄດ້.
ໂຄສົກສຳນັກງານຈັດການໄພພິບັດຂອງບັງກະລາເທດບອກກັບສຳນັກຂ່າວ AFP ວ່າ: ທາງການໄດ້ຕັ້ງເປົ້າເລັ່ງອົບພະຍົບປະຊາຊົນໄປຢູ່ບ່ອນປອດໄພໃຫ້ໄດ້ປະມານ 1 ລ້ານຄົນ ກ່ອນພາຍຸຈະພັດຂຶ້ນຝັ່ງ ແລະ ປັດຈຸບັນນີ້ສາມາດອົບພະຍົບປະຊາຊົນຈາກພື້ນທີ່ສ່ຽງໄພອອກໄປໄດ້ປະມານ 300.000 ຄົນແລ້ວ.
ສ່ວນກົມອຸຕຸນິຍົມວິທະຍາຂອງໄທຢືນຢັນວ່າ: ເສັ້ນທາງຂອງພາຍຸໂມຣາຈະບໍ່ພັດຜ່ານພື້ນທີ່ປະເທດໄທແນ່ນອນ, ແຕ່ຈະສົ່ງຜົນກະທົບຕໍ່ສະພາບອາກາດທາງອ້ອມ ໂດຍຈະກະຕຸ້ນໃຫ້ລົມມໍລະສຸມຕາເວັນຕົກສຽງໃຕ້ທີ່ພັດປົກຄຸມທະເລອັນດາມັນ ແລະ ປະເທດໄທມີກຳລັງແຮງຂຶ້ນ ເຮັດໃຫ້ເກີດຝົນຕົກໜັກໃນຫລາຍພື້ນທີ່.
