ຮອງນາຍົກລັດຖະມົນຕີ ສອນໄຊ ສີພັນດອນຊີ້ນໍາການປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານ ຢູ່ 4 ແຂວງພາກໃຕ້
ກອງປະຊຸມຊຸກຍູ້ການປະຕິບັດແຜນພັດທະນາເສດຖະກິດ-ສັງຄົມ ແລະ ແຜນການລົງທຶນຂອງລັດປີ 2019 ແລະ ວຽກງານຈຸດສຸມປີ 2020 ຢູ່ 4 ແຂວງພາກໃຕ້ ໄດ້ຈັດຂຶ້ນໃນວັນທີ 30 ຕຸລານີ້ທີ່ແຂວງຈໍາປາສັກ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມັນຕີ, ວ່າການລັດຖະມົນຕີກະຊວງແຜນການ ແລະ ການລົງທຶນ, ມີເຈົ້າແຂວງ-ຮອງເຈົ້າແຂວງ, ຕາງໜ້າສະພາປະຊາຊົນຂັ້ນແຂວງ, ຫົວໜ້າພະແນກການອ້ອມຂ້າງ ແລະ ພະນັກງານຫລັກແຫລ່ງຈາກ 4 ແຂວງພາກໃຕ້ເຂົ້າຮ່ວມຢ່າງພ້ອມພຽງ. ເພື່ອປຶກສາຫາລື ແລະ ຕິດຕາມການຜັນຂະຫຍາຍດໍາລັດສະບັບເລກທີ 560/ນຍ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດປະຈໍາປີ 2019 ແລະ ຄໍາສັ່ງເລກທີ 06/ນຍ ວ່າດ້ວຍການສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປະຈໍາປີ 2019 ເພື່ອຊຸກຍູ້ 4 ແຂວງພາກໃຕ້ໃຫ້ສາມາດບັນລຸຕາມເປົ້າໝາຍ ແລະ ຄາດໝາຍສູ້ຊົນທີ່ວາງໄວ້ຮອດທ້າຍປີ 2019. ພ້ອມທັງຄົ້ນຄວ້າການສ້າງແຜນພັດທະນາເສດຖະກິດ-ສັງຄົມປະຈໍາປີ 2020 ໃຫ້ມີຄວາມສອດຄ່ອງ ແລະ ສາມາດປະຕິບັດໄດ້ຕາມທ່າແຮງ ແລະ ເງື່ອນໄຂຕົວຈິງຂອງແຕ່ລະທ້ອງຖິ່ນ.
ໂອກາດນີ້,
ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ອໍານາດການປົກຄອງ, ກໍຄືການນຳຂອງ 4 ແຂວງດັ່ງກ່າວ ທີ່ໄດ້ເອົາໃຈໃສ່ຊີ້ນໍາ-ນຳພາການຜັນຂະຫຍາຍເນື້ອໃນຈິດໃຈຂອງມະຕິ ແລະ ນະໂຍບາຍຂອງລັດຖະບານເຂົ້າສູ່ລວງເລິກ,
ເຊິ່ງເຮັດໃຫ້ເສດຖະກິດສືບຕໍ່ຂະຫຍາຍຕົວສະເລ່ຍລວມຍອດຜະລິດຕະພັນພາຍໃນ (GDP) ຂອງແຂວງເຊກອງແມ່ນ 8%, ແຂວງອັດຕະປື 7,59%, ແຂວງສາລະວັນ 8% ແລະ ແຂວງຈຳປາສັກ
8,16%. ພ້ອມນັ້ນ, ຍັງມີຫລາຍຕົວເລກດ້ານສັງຄົມບັນລຸຄາດໝາຍທີ່ວາງໄວ້. ພ້ອມທັງຊີ້ນໍາໃຫ້ການນໍາ 4 ແຂວງ
ກໍຄືພະແນກການອ້ອມຂ້າງແຂວງໃຫ້ເອົາໃຈໃສ່ສະ ຫລຸບການປະຕິບັດແຜນພັດທະນາເສດຖະກິດ-ສັງຄົມ
ແລະ ແຜນງົບປະມານແຫ່ງລັດໃນໄລຍະຜ່ານມາຢ່າງພາວະວິໄສ ເພື່ອໃຫ້ສາມາດຕີລາຄາໄດ້ດ້ານດີ, ຂໍ້ຄົງຄ້າງ ແລະ
ກາລະໂອກາດ ເພື່ອພ້ອມກັນຊອກຫາມາດຕະການແກ້ໄຂໃຫ້
ເໝາະສົມ ແລະ ທັນສະພາບການ, ເຮັດໃຫ້ສາມາດບັນລຸໄດ້ຕາມແຜນ ຫລື ລື່ນຄາດໝາຍແຜນການວາງໄວ້, ໂດຍສະເພາະບັນດາແຂວງທີ່ໄດ້ຮັບຜົນກະທົບຈາກໄພພິບັດທາງທໍາມະຊາດໃນໄລຍະຜ່ານມາ ຕ້ອງສຸມໃສ່ການຟື້ນຟູໂຄງລ່າງພື້ນຖານໃຫ້ສາມາດກັບມານໍາໃຊ້ເຂົ້າໃນການຜະລິດລະດູແລ້ງ ເພື່ອທົດແທນຜົນຜະລິດທີ່ໄດ້ຮັບຜົນເສຍຫາຍຈາກໄພພິບັດດັ່ງກ່າວ, ໃຫ້ເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນທີ່ມີທ່າແຮງໃຫ້ສາມາດສະໜອງຄວາມຕ້ອງການພາຍໃນ ທັງຫລຸດຜ່ອນການເອື່ອຍອີງ ແລະ ນໍາເຂົ້າຈາກຕ່າງປະເທດລົງເທື່ອລະກ້າວ, ຄຽງຄູ່ກັບການປັບປຸງຄຸນນະພາບສິນຄ້າ ແລະ ການຊຸກຍູ້ສົ່ງເສີມເພື່ອເພີ່ມການສົ່ງອອກໃຫ້ຫລາຍຂຶ້ນ, ເອົາໃຈໃສ່ເກັບລາຍຮັບໄດ້ຕາມແຜນ ຫລື ລື່ນແຜນທີ່ວາງໄວ້, ໄປພ້ອມໆກັບການເຂັ້ມງວດໃນການຄຸ້ມຄອງລາຍຈ່າຍທີ່ບໍ່ຈໍາເປັນຕາມທິດປະຢັດຂອງລັດຖະບານ.
ນອກນີ້ ກໍໃຫ້ເອົາໃຈໃສ່ແກ້ໄຂປັບປຸງຂອດຂັ້ນການດໍາເນີນທຸລະກິດ ແລະ ການຄ້າ ແລະ ການສົ່ງອອກຕາມແນວຊາຍແດນ ເພື່ອສ້າງບັນຍາກາດການລົງທຶນໃຫ້ມີຄວາມໂລ່ງລ່ຽນ, ໂປ່ງໃສ ແລະ ສະດວກວ່ອງໄວ, ທັງຊຸກຍູ້ບັນດາໂຄງການຕ່າງໆໃຫ້ດໍາເນີນໄປຕາມແຜນວາງໄວ້. ສໍາລັບການສ້າງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດປະຈໍາປີ 2020 ແມ່ນເປັນປີທີ່ສໍາຄັນຫລາຍ, ເນື່ອງຈາກເປັນປີສຸດທ້າຍຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020). ສະນັ້ນ, ເພື່ອສ້າງພື້ນຖານທີ່ໜັກແໜ້ນໃຫ້ແກ່ການຫັນໂຄງປະກອບເສດຖະກິດໄປຕາມທິດຂະຫຍາຍຕົວດ້ວຍຈັງຫວະທີ່ໝັ້ນທ່ຽງ, ສົມດຸນ ແລະ ສ້າງພື້ນຖານນໍາພາປະເທດຫລຸດພົ້ນ ອອກຈາກສະຖານະພາບດ້ອຍພັດທະນາຕາມທິດຍືນຍົງ ແລະ ສີຂຽວ, ຕ້ອງມີຈຸດສຸມ, ມີຄຸນນະພາບສູງຂຶ້ນ ແລະ ຕິດພັນກັບການນໍາໃຊ້ຜົນປະໂຫຍດຈາກບັນດາໂຄງການໃຫຍ່ຂອງລັດຖະບານ ເປັນຕົ້ນ: ທາງລົດໄຟ, ຂົວ, ທາງດ່ວນ, ທ່າບົກ (ສາງຄ່ຽນຖ່າຍສິນຄ້າ) ແລະ ໂຄງການອື່ນໆ ເພື່ອເປັນການຊຸກຍູ້, ດຶງດູດ ແລະ ນໍາຜົນປະໂຫຍດສູງສຸດມາໃຫ້ແກ່ບັນດາແຂວງ ກໍຄືປະເທດຊາດ ໄປຕາມທິດການພັດທະນາເຊື່ອມໂຍງເຊື່ອມຈອດກັບພາກພື້ນ ແລະ ສາກົນ.
